scrivi all’autore nino@pumilia.it

oppure visita il sito

www.ninopumilia.it Copyright © Nino Pumilia 2011 Impaginazione e grafica Quest’opera è soggetta alla licenza Creative Commons Attribuzione-Non commerciale-Non opere derivate 2.5

Nino Pumilia

Storia di un sarchiapone mai nato

L’età di la ‘nnuccenza

A la stagghiata ormai era vicinu e sicutava tuttu fatiatu; era cuntentu chi da un gran casinu avia tiratu fora lu creatu. Lu suli ‘ntantu si facia strata e cuminciava la sesta tummata. “Nun vinni strammu, no, semu sinceri, lu pozzu diri chi in quattru e quattr’ottu d’un munnu chi ‘unn’ avia testa né peri ni fici un postu naisi, un salottu”. Appruvava e nun stava ‘nta la peddi, mentri facia l’ultimi ratteddi.

Tuttu riggìa cu grand’armonia, ogni ‘ngranaggiu girava perfettu, la forza di l’amuri lu muvia, cu tutta la maistria di l’architettu. Travagghiu di pregiata qualità, garantitu di ccà all’eternità. Lu suli ‘n celu la iurnata signa: lustru, caluri e vita ‘nturnu duna, pricisu poi, sicunnu la cunsigna, lu postu ceri a li stiddi e a la luna. St’affaccia e codda, ogni ghiornu avali, rapprisenta lu roggiu universali.

Arricogghi ‘nta conchi assai capienti la massa d’acqua chi cummogghia tuttu e porta cu chist’opira sapienti, dunni c’era la tremula, l’asciuttu. E datu chi ogni cosa havi a battiari, chiama l’asciuttu terra e l’acqua mari. Lu mastru chi finisci lu travagghiu, ripigghia ciatu, cu li mani a cintu; è surisfattu, arricogghi lu stigghiu e mentri fà: “ nun vinni tantu tintu”. Si scotula, si stuia lu sururi, e, cuntentu, ringrazia lu Signuri.

Supra un cozzu assittatu ‘nfacci ventu, lu Capumastru si guria la scena: la vita appena misa in muvimentu chi tracimava comu un ciumi in piena. Milli e mill’occhi ‘unn’eranu bastanti pi viriri zocch’è chi avia davanti. Ogni criatura appena scuvata, di la cchiù grossa a la cchiù mischina pigghiava postu ‘nta la so’ cuntrata, comu vulia la vuluntà divina. ‘Nta dda scena ad arti custruita nunn’arristau ‘n agnuni senza vita.

D’aceddi ‘n celu strippuna fistanti, di milli tagghi e di milli culura, urrianu ‘nta ll’aria, ma tanti, d’attuppari a lu suli la lustrura. Sbulazza un cantu pi lu firmamentu, ‘na musica cilesti, un godimentu. L’occhiu suvranu, puru a lu stracoddu, scruta lu mari tuttu, fina ‘n funnu; nenti ci scappa di la vita a moddu, di la balena finu a lu ritunnu. Sata supra di l’unna lu delfinu, pi ringraziari l’amuri divinu.

E ‘n terra, quant’armali, matri mia, nun si ponnu cuntari quantu sunnu. Lu solu unnegghè furmiculia di miliardi e miliardi e nunn’abbunnu. Ma chi mirudda avia Sua Maistà pi mmintarisi tanta varietà? Cci su’ li mansi e ci su’ li ribeddi, cu si nutri di carni e cu di pagghia, cu vesti di pelliccia, cu di peddi, cu allama, cu sta mutu e cu è chi arragghia. C’è cu aspetta chi agghiorna pi manciari, e c’è cu all’alba si ni va a curcari.

Cu pi lu friddu di lu mmernu arrazza e si ‘ntana aspittannu la staciuni e cu mmezzu lu ghiacciu alleiru sguazza, tinennu cauru lu pidduzzuni. All’inventiva, ‘nsumma, dannu sfou, si po diri chi armau un bellu zou. Creau d’ogni speci d’animali un masculu e ‘na fimmina, assortiti, però pi sparagnari matriali, ni fici single, l’ermafroditi. Avia ogni speci pi prima ‘ncumbenza d’assicurarisi la discinnenza.

Cu li ritagghi di crita arristata stava pinzannu all’ultima invenzioni; ‘nta un nenti l’havi ‘mmenti disignata: “ ‘na bestia strana fazzu, un sarchiaponi”. Ma mentri è all’opira, un dubbiu lu pigghia: “mancu ‘n armalu c’è chi m’assumigghia”? ‘Na zzotta d’acqua chi avia a lu ciancu, cunferma chi era giusta l’imprissioni. “ Anchi si sta scurannu e sugnu stancu, mi l’ha’ a livari sta surisfazioni”. Sulu a la larga, infatti, la so’ ‘mpigna assimigghiava a chidda di la signa.

Dda criatura ormai quasi finuta prima di nasciri muriu scacciata, picchì a la crita già mezza affriuta turnau a darici ‘na caddiata. Fu daccussì chi l’ultimu criatu fu fattu cu matriali riciclatu. Lu Pari voli farlu sumigghianti, voli passarici li so’ fattizzi, perciò si metti a lu specchiu davanti e a beddu cori ‘mpiccica biddizzi. Già si ni prea, prima chi l’allesti; mancu pari ‘ntrummatu cu li resti.

Un pupiddu, so’ patri spiccicatu, stacciutu e drittu comu ‘na cannila, un fiurinu, beddu, nutricatu, cu la peddi di cira e senza pila. All’ultimu ci lima qualchi sbuffu e ci sistema ad arti qualchi ciuffu. ‘Nta l’Eden lu metti ad abitari, chi di biddizzi e d’abbunnanza sbucca, dunni ci abbasta sulu addisiari, chiuriri l’occhi e grapiri la vucca. Un pararisu, nun ci manca nenti, eppuru Adamu nunn’eni cuntenti.

“Patri, lu postu è bonu, cosi giusti, ma mi sentu anticchedda assulazzatu; lu ruci di la vita nun l’austi, si viri chi nunn’hai a nuddu allatu. E’ bellu, siddu hai manciacina e nun c’è cu ti raspa la carina?” Quannu arriva tardiu e addisiatu, un nutricu la casa dilizìa; lu tempu è tuttu a iddu didicatu, cu l’annaca, lu pasci, lu mmizzia. L’amuri è la megghiu miricina, ma si la ddosi è forti, è la ruvina.

E lu cori di Diu onnipotenti è pi stu figghiu quantu ‘na muntagna: ‘na costula d’Adamu pi criscenti e ci stampa a du’ botti la cumpagna. ‘Na bedda figghia, all’omu sumigghianti, cu qualchi differenza piddavanti. Ah, ora si, ch’è ‘na villeggiatura! Dda ddintra nunn’esistinu li stenti; lu Patruzzu, amurusu, cu primura li pasci, nun ci fa mancari nenti. Ma l’avvisa:”accura, c’è un divietu. Filati ritti o finisci a fetu.

Lu viriti ddu pumu carricatu? E’ un peri chi mi tegnu pi simenza; statici arrassu, ‘un lu vogghiu tuccatu, picchì è la pianta di la canuscenza”. Mancu finiu di rillu …, scilarati, chi all’arvulu li viri appiccicati! “Fora, nisciti fora, sbriugnati, finiu pi vuatri ormai la vacanza! Lu Pararisu nun lu miritati, picchì fu troppu grossa la mancanza”! ‘Ncazzatu, Diu lu sgarbu nun supporta, punta lu itu e li metti a la porta.

Chi ci custau cara la tintizza! P’un pumu si iucaru l’avveniri, canciaru un postu ch’era ‘na biddizza, pi ‘na vita di stenti e dispiaciri. Spissu a nun rispittari la cunsigna si ci appizza lu scecu cu li ligna. Chi pena pi lu Patri chi li stracqua! Li figghi di lu cori, li patruna, a smannu si ni vannu, sutta l’acqua, scausi e nuri, comu du’ strazzuna! Ci proi du’ peddi, la pietà lu smovi: “li vrivogni attuppativi, chi chiovi!”

Finisci ccà l’età di la ‘nnuccenza. Senza cu lu cunsigghia e senza freni, sta all’omu chi scigliu l’indipendenza diciriri si fari mali o beni. Ogni ghiornu pi iddu c’è ‘na prova, esami di ‘na vita tutta nova.

La vita nova

A diri di l’antichi, la matina si viri già si la iurnata è bona, puru si dopu anticchia si scatina ‘na grannuliata di lampi e di trona. Pi Adamu, chi li primi passi movi, nun c’è spiranza, è l’alba e già ci chiovi. L’aspetta ‘na muntagna di suvizzu, nun ci la spunta cu tutta la lena; Eva, tra rutti, dogghi e sputarizzu nun metti un gnitu a moddu, è sempri prena. Ma lu ripaga di tanti fatichi, sfurnannuci ‘nta un nenti du’ nutrichi.

Sucaru latti di lu stessu pettu, la stessa manu li misi a la ddritta; ma, mentri Abeli vinni un omu schiettu, Cainu arrinisciu cu la pitta, a lu puntu chi frariciu e mmiriusu, misi a so’ frati Abeli fora usu. Si popula la terra tempu nnenti: masculi e fimmini, ittati a la rrutta, sfurnanu, maritati tra parenti, un riggimentu di malacunnutta. Cu l’occhi chiusi, a lu primu vagitu, già pigghianu la via di l’acitu.

Di l’astracu celesti Diu talia l’opera d’arti di l’ultimu iornu, chi cchiù passa lu tempu e cchiù falsia, e scanci di iri rittu, va a lu stornu. “Ch’assai unu l’alliscia e accarizia, e cchiù stu mulu fausu quacia. Scasciavi propriu l’ultimu disegnu: chiddu chi avia a cantari la me gloria e chi addutavi di cori e d’ingegnu m’arrinisciu un utri di boria. Po’ essiri chi quannu lu sciusciavi cu l’alitu divinu, lu ‘mbriacavi?”

Talia lu Patrinnostru a tutti banni, ma di chiddu chi cerca nun c’è rrastu, bontà, giuriziu, amuri, cori granni, nunn’esisti cchiù nnenti, è tuttu guastu. Si persi la simenza di lu giustu; pari chi a fari mali c’è cchiù gustu. Cu lu cori ‘ntuciatu di duluri, lu Giurici emetti la sintenza: “è megghiu fari scupa salaturi, chi nutricari sta mala simenza. “Ma, aspetta anticchia, unu onestu c’è!” Avia ittatu l’occhi su Noè.

Cu ‘na vuci chi metti suggizioni, chiama a rapportu lu vecchiu patriarca, ci fa un riassuntu di li so’ ‘ntinzioni e lu metti a lu zuzzu a fari l’arca. “Poi d’ogni armalu ‘mbarca ‘na parigghia cu li pruvvisti e la to famigghia”. “Ma, sicuru ni servi stu varcuni? Ccà semu luntaneddu di lu mari”. “Aspetta e viri siddu haiu ragiuni, lu senti chi cumincia a truniari?” Tempu chi Noè trasi e fa l’appellu, chi fora si scatina lu burdellu.

Sdilluvia, cumincia la mattanza, la terra è tutta sguiddari e lamenti, mentri lu mari timpistusu avanza, scupa, cummogghia e nun sparagna nenti. Sbutta Noè ‘nta ‘n agnuni ‘ngattatu: “minchia, lu Patrinnostru ch’è ‘ncazzatu!” Comu ‘na munnagghedda l’arca vola, sballuttuliata di lu fortunali e lu ventu furiusu l’arruzzola tra carcassi di omini e d’armali. Cariu tant’acqua chi, quannu scampau, ci vosi un annu prima chi asciucau.

Misi giuriziu l’omu? Lu capiu chi ogni vota chi fa ‘na mal’azioni, havi a rrenniri cuntu sempri a Diu e nun la scanza la punizioni? Si canusciu la storia, a mia mi pari chi lu malatu ha ghiutu a piggiurari. S’allarga e appurpa comu la gramigna ‘nta terri timpirati, friddi o stufi e genera, mutannusi la ‘mpigna li bianchi, i niuri e i giannarufi. Figghi d’un patri e frati finu a ‘eri, ora su’ peggiu di li furasteri.

Cu la turri, triunfu d’arroganza, si conza di lu ‘n tuttu la ‘nsalata quannu ‘nterveni la Summa Possanza mmastaddennuci puru la parlata. Si va cu li paroli a lu sparagnu, ma si ioca di cchiù a futti cumpagnu. L’omu ritorna a li so’ tintizzi. Quannu lu lignu è tortu è tempu persu, lu torci a lu cuntrariu, l’addrizzi, lu lenti e si ripigghia lu so’ versu. Cchiù tempu passa e cch’assai abbizia, abbusca, eppuru, ancora rispustia:

“Nun sugnu addevu cchiù, haiu ‘na menti, nun mi teniri cchiù manu manuzza, di zocch’eni la vita sugnu scienti. Chissa è testa chi pensa, ‘unn’è cucuzza!” Grira, appittanti, a lu Patri divinu: “Mi lu fabbricu iò lu me distinu!” Nun la rreggi lu Patri, si ni sdegna quannu lu senti ragiunari a trunzu e sputari a crianza e ritimegna. Ma s’abbannuna un figghiu, anchi si strunzu? Pi dari aiutu a stu ‘ran galantomu, scinnì ‘n terra di ‘n celu comu un omu.

Dd’attu fu acqua supra la ‘ncirata, nun lu capiu, nun canciau cupiuni e secuta la strata cuminciata: lu mulu ormai ittau lu sidduni. A un diu sulu oramai criri, lu diu di li tiranni, lu putiri. Un diu malignu chi ti fa nimici lu frati cu la peddi mascariata, cu ti parla e nun sai zoccu rici, cu abìta ‘nta ‘na terra mmiriata, e, pi cucucciu di li malifici, puru la stessa matri chi ti fici.

Di dda ‘n capu, dunni nasci la luci pi fari strata a l’umani passioni, lu senti murmuriari a mezza vuci: “megghiu s’avissi fattu un sarchiaponi”. Si fa scuru di bottu, poi un rumuri, comu d’un finistruni chi si chiuri.