Nel como' de mia nona…

In classe con la nostra maestra gavemo parla' tanto dela tecnologia de adeso, usemo quasi tuti i telefonini, i tablet, le machine fotografiche digitali . Ma … e…le fotografie … podemo vedile solo sui telefonini . Che tristesa ! I nostri fioi non podera' sfogliar i nostri album de famiglia. Cosa ghe laseremo ? Cosa ghe raconteremo? Semo andadi a casa quel giorno e pensavimo a quel che gavevimo parla' in classe.

Come i se fotografava i nostri noni se non esisteva i telefonini? Gavemo scoperto che i usava le machine fotografiche, ghe ne iera de tuti i tipi.

Le nostre none ne ga' verto el cassetto del como' e… meraviglia… „Nona quante fotografie, ma non le ze' a colori, le ze' in bianco e nero!“ Nona, jera tuta emosionada, pareva una muleta, la ga' subito dito de non tocar niente, quel iera el suo tesoro nascosto, i sui ricordi piu' bei , la sua infansia, la sua giovinesa… La ga' ciolto due sedie, una per mi e una per ela, e la ga' comincia' a contarme…la sua vose jera cambiada, i sui oci se gaveva iluminado. „Varda , questa ze' nona de picia…“

Quando gavevimo el compleanno, la mama ne faseva la torta e un po' de biscoti e festegiavimo tuti insieme contenti .

In asilo ierimo sempre in tanti, ierimo vestidi tuti uguali el grembiule con el coleto bianco. Nele stanze se scaldavimo con le stufe a legni.

A scuola i banchi iera de legno, non gavevimo tanti quaderni, un astuccio con la penna e la matita. Le picie portava i vestitini, le gaveva i cavei lunghi con i fiocheti in testa. I mascieti portava le braghe fin sora el ginocio.

A scuola anche noi recitavimo, cantavimo e ballavimo dipendeva dell' ocasion.

I noni andava a militari, mio nono ga' fato la Marina, el jera due ani, la' el ga' impara' a farse el leto a lavarse i vestiti, el se divertiva tanto, el ga' conosu' tanti novi amici.

Alla domenica se andava a pasegiar tuti bei cambiadi, qualche volta se fotografavimo davanti l' Arena o davanti l' Arco dei Sergi. Se ne piaseva qualche bel ragaso lo guardavimo , ma de lontan. Le ragase non portava le braghe ma solo vestiti o cotole. Le petinature jera tute uguali, meta' lunghesa.

Se usava fa un ricordo in forma de cartolina postale.

Febraio jera periodo de Carneval , el Martedi' grasso mia nona prontava sugo de gal e i macaroni e tra una pietansa e l' altra la cantava:“Finido Carneval, finido i soni, finido de magna' i macaroni.“ A Carneval se magnava anche i grostoli.

Quando che i se sposava , le nose durava piu' giorni, circa tre e le vegniva festegiade a casa. Tuta la setimana se prontava i dolci:biscoti, amareti, papini. I sposi se aviava in ciesa con el corteo, tuti i invitati li seguiva, davanti iera i sonadori. Prima de mesanote i sposi andava a casa, li compagnava i amici con i „torsi“ (fiaccole) e con tanti canti. Rivadi a casa i torsi vegniva mesi davanti la porta , i sposi doveva saltar el fogo per entrar a casa.

Ogni fotografia che guardavimo , mia nona faseva un sospiro, poi …la se ga' ferma' un momento, la ga' soriso… „Nona cosa ze'?“ „Questi ze' mia mama e mio papa' de pici, mia mama guardava mio papa' za' in quela volta!“

Quanti bei ricordi … Li gavemo sfogliadi mia nona e mi. Le vecie fotografie non ga' niente a che vedi con le foto de adeso che archiviemo nei nostri computer, forsi le sara' piu' bele, ma sicuramente le ze' sensa quel romanticismo che ga' le foto dei nostri noni.