“ Grado”

by: Aldo Tognon

Gèra ‘na volta un’isola felisse puzagia giusto in mezo a ‘na laguna, che ‘l sol de ‘l zorno fêva parè de oro e che la note ciara la luna ‘narzentagia i regaleva. De piera antica la vêva le casete e anche le so’ Cese e ‘l canpanil, e sòra ‘l fango, trà i rii, tagi a canai, issai gèra i “casuni”, capani de caneo co’i tamarisi e ‘n alboro pe’ l’onbra, pe’ duta la laguna sparpagnai.

Catao he ‘sto paradiso in tabachìn sora ‘na cartulina coloragia, che pûo he spedio a un gnò grando amico de via, lontan, ‘desso che sòn quà a Grado in ferie, a ciapà ‘l sol su questa bela spiagia. Me piase mundi questo posto, ‘chè pòsso ‘ndà ‘la sera a divertime opur a magnà ‘l pesse in ristorante… e dopo zè un bel vial pien de vitrine, co’l cine, bar e gelaterie, e in mezo a confusion de tanta zente zè senpre pien de zuvini che ‘i rîe.

Stufasse, quà, no’ esiste mai ‘chè zè senpre gargossa a divertisse: dopo zugao sora ‘l prao verde co’ le buse me fàsso ‘na gran corsa in foribordo pe’ ‘ndà fin de Lignan, via Porto Buso, in Aquaspless opur a balà ‘ntè ’i “night”.

Sarà anche confusion de auti e moto, de camionsini e tante biciclete però, e tu vòl mète, co’ belo e ‘mossionante zè cô in lugio duto ‘l paese se move in prucission !

E cô vièn zò la sera, cô zè la bava fresca, in mezo de le cale o le piassete tu và a sintî teatro: poesie, canti e comedie de ‘na volta, storie de zente, amor, mar e laguna, de vite alegre e buni sintiminti, de un mondo antico ormai desmentegao.

E pe’ finì, i alberghi: ‘sti grandi palassuni de vinti e passa piani, duti moderni e beli, ‘fassinanti, ‘chè drento zè gran lusso e caro, pien de foresti siuri, carghi de ori e de solduni che ormai, se sà, de meza Grado zè diventao i paruni.

Gèra ‘na volta un’isola felisse puzagia giusto in mezo a ‘na laguna…

* * *