ENTREGA TOTAL E matrimonio di E Reino Di dos edishon 2015 Copyright © House of Worship Foundation Iglesia House of Worship A - Erosweg 52 T - +5999-738-4344 E - raimy_arlette@yahoo.com W - www.how-online.org Diseño di portada: Raimy Jonathan Juliet Diseño gráfiko: Maristella Martis Edishon: Luisette Martis - Elma Huggins - Maristella Martis Un danki ta bai na: Furghen & Stephanie Servania i Albarick & Sonaly Bentura. ISBN: 978-99904-60-60-5

Un regalo pa pareha:

Fecha:

Di parti di iglesia House of Worship

Semper nos lo kòrda ku:

M atrimonio ta importante pa Dios, pasobra e hende ta importante pa Dios. P'esei e

matrimonio ta representá Kristu i Su iglesia. E intenshon di matrimonio ta, pa representá Kristu Su gran amor pa Su iglesia i amor di Su iglesia p’E. Sinembargo, hende a desviá kompletamente for di e intenshon di matrimonio i for di e amor di hende pa su próhimo.

P 'esei awe ta un bon oportunidat pa bo konsiderá e balor di bo matrimonio i e balor di bo próhimo.

Permití awe, pa Dios haña den bo kurason, e lugá ku El a reservá. Di manera ku E por tin un relashon divino ku bo, no di Kreador ku kreashon, pero di Tata pa yu.

T a p’esei El a manda Su úniko Yu, pa E tin e relashon divino ei ku bo. Pa asina restorá e

relashon di yu pa E Tata i bo relashon matrimonial tambe.

E dia matrimonial ta un dia masha grandi mes, sabiendo ku ta Señor den nos bida a trese nos aki,

tantu den nos matrimonio komo den nos relashon ku otronan.

A we nos ke ofresé bo e mihó regalo ku hende por risibí. E regalo ku ta garantisá éksito pa kada

bida, hogar i famia. E regalo di rekonsiliashon ku Dios.

A we kisas bo no a ni spera esaki, pero bo por tuma e desishon pa aseptá Kristu den bo

kurason. Beibel ta bisa: “Awe ta e dia di salbashon, p'esei no hasi bo kurason duru.” Pasobra e dia di awe ta un regalo, mañan nos no konosé.

Un mensahe matrimonial 10-11 Introdukshon 12-13

14-25

26-31

Prinsipionan matrimonial stablesé pa Dios

32-39

40-44

E hende hòmber i e hende muhé

Matrimonio

Loke e pareha mester hasi pa mantené e pakto matrimonial

45-49

Dios Su plan pa e hogar

50-57

Intimidat den matrimonio

58-65

Finansa den matrimonio

Preguntanan 66-78 Konklushon 79 Evaluashon 80-81 Orashon 82

Matrimonio,

un pakto (aliansa) entre un hòmber i un

muhé. E pakto akí ta Dios mes a instituí e.

Entrega total ta masha esensial.

Amor ta loke ta mantené e kalor.

Bon komunikashon,

ta e solushon den kualke bruashon.

Papia e bèrdat ta mantené unidat.

Sakrifisio ta dun’é hopi benefisio.

Transparensia,

ta hasi ku no tin nodi di tin bèrgwensa.

Mantené pashon,

pa e relashon keda den bon kondishon.

E ta, pa duna Dios gloria i onor

dor di mustra Kristu Su amor.

“I nan lo bira ún karni.”

Beibel ta bisa den e buki di Génesis 2:24: “P’esei un hòmber lo bandoná su tata i su mama i lo uni ku su esposa. I nan lo bira ún karni.” Sea ta pa falta di informashon òf pa motibu di ignoransia, hopi pareha nunka no a bandoná nan tata i mama, pa uni ku nan mes esposa/o i asina forma nan propio hogar. E pareha ku no bandoná su mayornan ta keda dependiente di su mayornan di tal manera, ku e lo no por funshoná liber den su matrimonio i asina forma su propio bibá ku su pareha kasá. Konsekuentemente nan no por bira un. Nos ta kere ku ta masha importante pa parehanan buska konseho, promé ku nan drenta enlase matrimonial. Tambe ta importante pa esnan ku ya a drenta den e bida matrimonial, sigui buska konseho pa refreskamentu di nan matrimonio. Por ehèmpel ora bo ta bai studia pa kualke profeshon, bo ta buska informashon te ora bo hañ’é. Tambe si bo ke studia un materia, bo ta buska informashon i bukinan ku ta papia tokante e materia. Asina tambe un pareha mester buska konosementu tokante matrimonio. No ta outomátikamente un matrimonio ta bai bon; e pareha mester prepará i informá su mes bon, pa asina e por tin un matrimonio eksitoso.

12

Loke a hasi nos matrimonio fuerte i pone ku e ta funshoná, ta e echo ku nos tin Kristu Hesus komo nos Rei i Salbador. Nos ta kere den E Palabra di Dios i ta aplik’é den nos bida. Nos a entregá nos mes totalmente na Dios i na otro. Semper nos ta keda kòrda ku nos ta un i ku Dios Su Palabra ta mas haltu ku nos emoshon, kièr, gana i rason. Si nos onra Dios Su Palabra, E ta bendishoná nos. Un matrimonio kaminda e pareha ta stima otro, ta den un akuerdo ku otro, ku huntu nan ta konfia Dios, stima Dios Su Palabra i ta onr’E, esaki ta poderoso. E pareha aki lo lanta yunan bendishoná, pa motibu di e prinsipionan di E Reino di Dios ku nan ta apliká den nan bida. Den matrimonio bo mester ta habrí ku otro. Si akaso bo no ta di akuerdo ku bo kasá den algu, kombersá kuné i lag’é sa kon bo ta sinti. Si bo tin mester di yudansa, bai den E Palabra. Buska hende ku sa kon pa yuda bo, ku ta dispuesto pa yuda bo restorá bo matrimonio i mustra bo e kaminda ku bo mester kana. Matrimonio ta un kos serio i ta rekerí sabiduria. Sabiduria ta e solushon bíbliko pa tur reto i problema ku nos ta enfrentá den matrimonio. Ta masha agradabel ora tur kos ta kana bon, pero por tin situashonnan difísil ku por pone ku e matrimonio no ta bai bon i esaki ta doloroso. P’esei nos ke duna nos aporte, kompartiendo ku bo kiko Dios a hasi den nos matrimonio i asina yuda fortifiká, sana i trese libertat den matrimonio di otronan. Nos deseo ta pa abo tambe por disfrutá di un entrega total. Pastornan Raimy i Arlette Juliet

13

1

Dios a krea hende hòmber i hende muhé ku e propósito pa nan por ta huntu den matrimonio. Kiko ta matrimonio? Matrimonio ta un pakto divino. E ta un akuerdo entre un hòmber i un muhé, ku a rekonosé ku nan ta dispuesto pa bandoná nan tata i nan mama i entregá nan bida na otro. Dos hende ku ta dispuesto pa bisa: “Loke ta di mi ta di bo, loke ta di bo ta di mi,” i ta hink'é den práktika tambe. Dos hende ku ta dispuesto pa traha huntu ku otro manera un tim. Dos hende ku ta dispuesto pa komplementá otro. Pa un matrimonio por wòrdu stablesé i rekonosé, e pareha mester ta kasá pa lei, pa despues e hasi su promesanan na otro i asina risibí e bendishon komo pareha kasá dilanti di Dios. E stèndert bíbliko pa matrimonio ta ku e hòmber i e muhé lo kompartí nan bida inkondishonalmente, te ora ku morto separá nan. E Palabra di Dios ta bisa den Mateo 19:6: “P’esei loke Dios a uni no laga ningun hende separá.”

1.1

16

Pues matrimonio ta un kombenio di bida largu ku ta solamente morto por terminá. E pareha no por pèrmití nada separá nan for di otro. E pareha no mester pèrmití faktornan manera trabou, preshon finansiero, mayornan, edukashon di yunan òf amistatnan bira un opstákulo den nan matrimonio.

E promesa na otro mester ta: Den tempu bon i den tempu malu, den salú i den malesa, den rikesa i den pobresa. Ora kualke situashon presentá, e dos personanan mester por para huntu, enfrentá e situashon i sali viktorioso.

17

E Palabra di Dios ta siña nos ku matrimonio ta onorabel.

Den E Palabra di Dios, matrimonio tin un balor masha haltu. Bo por bisa ku despues di kreashon, e promé akto di seremonia ta e akto di matrimonio. Maske ku Beibel no ta menshoná tantu kos di e seremonia mes, e ta menshoná sí na vários okashon tokante matrimonio. Dios a bisa ku no ta bon pa e hòmber ta su so i ta p’esei El a traha un yudadó ku ta pas kuné. Dios a manda Adam un soño profundo i a tuma un di su repchinan, i forma un muhé ku e repchi ku El a tuma for di e hòmber. El a trese e muhé pa Adam i e muhé akí a bira su esposa. Asina e promé akto matrimonial a tuma lugá. Skritura ta masha kla tokante matrimonio: e ta algu divino i ta ankrá den un pakto santu. E ta e promé institushon i e promé aliansa ku Dios a sera ku e ser humano. Di mesun manera tambe nos mester atené nos mes na e obligashon pa onra i obedesé leinan terenal, ku nos gobernantenan a pone enkuanto matrimonio.

1.2

18

Den e buki di Génesis, nos ta mira e promé matrimonio i e propósito ku Dios tin ku matrimonio; pa e hòmber uni ku su muhé, ke men un muhé so, i pa nan bira un. Dios a proponé pa e hòmber i e muhé ta kompañero di otro i ku nan lo tin un relashon íntimo ku otro. E muhé mester ta yudadó di su kasá. Nan dos mester traha huntu, komuniká ku otro, respetá otro i kere den otro. Den e buki di Malakias 2:14, nos por komprondé ku matrimonio ta un aliansa entre un hòmber i un muhé. Mihó bisá, e ta un pakto entre e esposo i e esposa. “Tòg boso ta bisa: 'Pa ki motibu?' Pasobra SEÑOR tabata testigu entre abo i e esposa di bo hubentut, kontra kende bo a trata ku traishon, maske ku e ta bo kompañera i bo esposa pa medio di aliansa.” Den e tradishonnan hudiu, e pueblo di Dios, esta, tur esnan ku ta stima i buska Dios, ta firma un dokumento durante di e kasamentu, kaminda nan ta bai di akuerdo ku e aliansa entre e pareha. E firmamentu di e akuerdo ta pa seya e aliansa. E intenshon di e seremonia matrimonial, ta pa e pareha demonstrá e kompromiso di nan pakto ku otro públikamente dilanti di Dios i di hende. No ta e seremonia di e fiesta ta e kos di mas importante den e matrimonio, pero ta e kompromiso di e pakto mester ta di gran balor.

1.3

20

Ta interesante pa konsiderá e tradishon i seremonia matrimonial di e hudiunan ‘Ketubah’ òf e kombenio matrimonial ku originalmente ta wòrdu lesá na arameo. E esposo ta aseptá sierto responsabilidat matrimonial manera: provishon di kuminda, kas i paña pa su esposa, i primintí pa sòru pa su nesesidatnan emoshonal tambe. E kombenio akí ta asina importante, ku e seremonia matrimonial ta wòrdu kompletá te ora ku e brùit i e brùidehòm kaba di firmá e kombenio. Ta prohibí pa un pareha hudiu biba huntu sin e dokumento akí. Pa e hudiu, e pakto matrimonial simbólikamente ta representá e aliansa entre Dios i Su pueblo Israel.

21

Matrimonio den Tèstamènt Nobo òf matrimonio kristian, tambe ta bai mas leu ku e aliansa terenal; e ta konsiderá komo un relashon divino entre Kristu i Su brùit, esta, e iglesia di Dios. Spiritualmente e ta representá nos relashon ku Dios. Den e karta ku Pablo a dirigí su mes na e efesionan, el a duna nan un tremendo splikashon tokante matrimonio. El a kompará e matrimonio di e esposa i e esposo, ku Kristu i e iglesia. (Efesionan 5:22-33)

1.4

22

E sposanan, sea sumiso na boso mes esposo, manera na Señor. Pasobra e esposo ta kabes di e esposa, meskos ku Kristu tambe

ta kabes di e iglesia, E mes siendo Salbador di e kurpa. Ma meskos ku e iglesia ta sumiso na Kristu, asina tambe e esposanan mester ta sumiso na nan esposo den tur kos.

E sposonan, stima boso esposa, meskos ku Kristu tambe a stima e iglesia i a entregá Su mes p'é, pa E santifik'é despues di a

purifik'é pa medio di e labamentu di awa ku e palabra, pa E presentá na Su mes e iglesia den tur su gloria, sin mancha ni ploi ni nada paresido, ma pa é por ta santu i sin kulpa.

A sina esposonan tambe mester stima nan esposa manera nan mes kurpa. Esun ku ta stima su esposa ta stima su mes;

pasobra nunka ni un hende no a odia su mes karni, ma ta aliment'é i ta kuid'é, meskos ku Kristu tambe ta hasi ku e iglesia, pasobra nos ta miembronan di Su kurpa, di Su karni i di Su wesunan.

P ’esei un hòmber lo bandoná su tata i su mama, i lo uni ku su esposa; i nan lo bira ún karni. E misterio aki ta grandi, ma mi

ta papia tokante di Kristu i e iglesia. Asina anto, laga kada un di boso tambe stima su esposa manera su mes; i e esposa pèrkurá pa e respetá su esposo.

23

Den e karta pa e korintionan (1 Korintionan 7:2-14, 17), Pablo a bai mas den detaye riba e preguntanan ku e rumannan a hasié tokante matrimonio. Algun konseho ku Pablo a duna e korintionan tokante di matrimonio: Pa motibu di inmoralidat, laga kada hòmber tin su mes esposa, i laga kada muhé tin su mes esposo. Laga e esposo kumpli ku su deber di matrimonio pa ku su esposa i meskos tambe e esposa pa ku su esposo. E esposa no tin outoridat riba su mes kurpa, sino e esposo; i meskos tambe e esposo no tin outoridat riba su mes kurpa, sino e esposa. Stòp di nenga otro, si no ta pa un tempu, ku konsentimentu di otro, pa boso por dediká boso mes na orashon; i bin huntu atrobe, pa satanas no tenta boso pa motibu di boso falta di dominio propio. Ma na esnan kasá mi ta duna instrukshon, no ami, sino Señor, ku e esposa no mester bai laga su esposo (ma si e bai tòg, lag'é keda sin kasa, òf rekonsiliá ku su esposo), i ku e esposo no mester manda su esposa bai. Ma na e otronan ami ta bisa, ku si un ruman tin un esposa ku no ta un kreyente, i e ta bai di akuèrdo pa biba huntu kuné, e esposo no mester mand'é bai. I un muhé ku tin un esposo ku no ta un kreyente, i e ta bai di akuèrdo pa biba huntu kuné, e no mester manda su esposo bai.

24

E esposo ku no ta un kreyente ta santifiká dor di su esposa, i e esposa ku no ta un kreyente ta santifiká dor di su esposo ku ta un kreyente; pasobra di otro manera boso yunan ta impuru, ma awor nan ta santu. Solamente, manera Señor a determiná pa kada un, manera Dios a yama kada un, lag’é kana di e manera aki. I asina mi ta ordená den tur e iglesianan.

25

2

28

Nos ta konvensí ku Dios a stablesé prinsipionan matrimonial, pa un matrimonio por bai bon i asina agradá Dios.

Felisidat matrimonial ta basá riba aplikashon di e prinsipionan di e pakto matrimonial.

Aplikashon di e prinsipionan akí ta trese hopi bendishon den un matrimonio. Esaki no ta un teoria; esaki ta loke nos a eksperensiá i ainda ta eksperensiando den nos mes bida. Den e buki di Génesis 2:18-25, nos por lesa algun di e prinsipionan ku Dios a stablesé.

29

E ora ei SEÑOR Dios a bisa: "No ta bon pa e hòmber ta so; lo Mi traha un yudadó p'é ku ta pas kuné." I for di tera SEÑOR Dios

a forma tur bestia di sabana i tur para di shelu, i a hiba nan pa e hòmber, pa mira kon e lo a yama nan; anto manera e hòmber a yama kada ser bibu, asina su nòmber tabata.

I e hòmber a duna nòmber na tur bestia di kria i para di shelu, i tur bestia di sabana, ma pa Adam no a wòrdu hañá un

yudadó ku tabata pas kuné.

A sina SEÑOR Dios a hasi e hòmber pega un soño profundo, i el a drumi; e ora ei El a tuma un di su repchinan i a sera e

karni na e lugá ei. I SEÑOR Dios a traha un muhé ku e repchi ku El a tuma for di e hòmber i a hib'é pa e hòmber.

I e hòmber a bisa: "Esaki ta awor wesu di mi wesunan, i karni di mi karni; e lo wòrdu yamá Muhé, pasobra el a wòrdu tumá

for di Hòmber."

P ’esei un hòmber lo bandoná su tata i su mama i lo uni ku su esposa. I nan lo bira ún karni. I e hòmber i su esposa tur dos

tabata sunú i no tabatin bèrgwensa.

1

2.1 No tin ningun otro ser, ni nada, ku por satisfasé e hòmber den su nesesidat natural. Ni su trabou, ni su logronan, ni su estudio. Ta solamente e muhé por satisfas’é. Dios a bisa ku lo E traha un yudadó ku ta pas kuné. Tur loke ku e hòmber tin mester, aparte di Dios, e muhé tin.

Un hòmber no por tin dos muhé. Dios, Kreador di tera i shelu i Kreador di hende, a kita solamente un repchi for di e hòmber pa e por tin un muhé. Dios sa mihó ku nos tur.

E hòmber tin ku warda riba Dios pa trese su kasá p’e. E tin ku

warda Dios form’é, pa e mes no tuma desishonnan robes. Adam a duna tur e bestianan nòmber, pero pa Adam no a wòrdu hañá un yudadó ku tabata pas kuné. Dios mes a mand’é un soño

profundo, pa e por a saka un repchi for di dje i asina forma su kasá p’e, i despues tres’é p’e.

E hòmber mester sa ku e muhé no ta un kriá doméstiko. Dios a krea e muhé pa komplementá e hòmber. Dios no a kue e wesu di su pia, pa e hòmber no trapa riba dje; ni E no a kue wesu for di su kabes, pa e muhé no manda riba dje. El a saka un repchi,

pa e muhé ta banda di e hòmber.

2

3

4

30

E hòmber mester keda kòrdá ku e muhé ta wesu di su wesu i karni di su karni, pa asina e por kuid’é, proteh’é, aliment’é i

kultiv’é. E palabra hòmber na hebreo ta ‘Ish’ ku ta nifiká: protektor i proveedó. Efesionan 5:28-29: “Asina esposonan tambe mester stima nan esposa manera nan mes kurpa. Esun

ku ta stima su esposa ta stima su mes; pasobra nunka ni un hende no a odia su mes karni, ma ta aliment'é i ta kuid'é....”

E hòmber tin ku bandoná su tata i su mama pa e uni ku su mes esposa. Esaki ta pa nan lòs for di kustumber i tradishonnan di nan mayornan, pa asina nan por siña konosé i diskubrí otro i

tin nan mes hogar ku nan mes identidat i prinsipionan.

Génesis 2:25: “I e hòmber i su esposa tur dos tabata sunú i no tabatin bèrgwensa.” E teksto akí ta mustra ku e pareha no mester tin ningun sekreto pa otro. Nan mester konfia otro den

tur kos i ku tur kos. Nan tin ku kompartí tur kos ku otro, por ehèmpel nan pensamentu, sentimentu, plan, logro, materialnan etc.

5

6

7

31

3

E fruta Spiritual lo mantené e matrimonio!

Unabes ku un pareha kaba di kasa, e pareha akí mester keda kuida e relashon matrimonial. Aki ta sigui shete punto ku un pareha mester apliká tur dia, pa asina ei mantené e pakto matrimonial. 1. Kòrda kontinuamente riba Esun ku a instituí matrimonio, ku ta Dios. 2. Rekordá e pakto i e promesanan kontinuamente. 3. Entregá nan mes na otro. 4. Sirbi otro. 5. Biba den konfiansa ku otro. 6. Ehersé amor tur momento. 7. Permití Dios Su Spiritu Santu guia nan. Ora un pareha permití Dios Su Spiritu Santu guia su matrimonio, e lo tin e fruta di Spiritu Santu. E fruta di E Spiritu Santu ta konsistí di nuebe parti.

34

AMOR Amor ta e promé kos ku un pareha mester tin pa otro. Tin hopi hende ku no sa e definishon di amor i ta p’esei nan ta konfundí hopi kos ku amor. E definishon di amor ta: Amor ta un deseo no egoista, leal i e gana di ta bon pa e otro. Ora nos tende e definishon di amor, nos tin ku komprondé ku ta un desishon no emoshonal, pero konsiente i boluntario. Den 1 Korintionan 13:4-8, Beibel ta duna e definishon i aplikashon di amor. Amor tin pasenshi Amor ta kariñoso i no ta yalurs Amor no ta gaba i no ta arogante Amor no ta komportá su mes indesente Amor no ta buska su propio interes Amor no ta wòrdu proboká Amor no ta warda renkor Amor no ta regosihá den inhustisia, ma ta regosihá den e bèrdat Tur kos amor ta tapa Tur kos amor ta kere Tur kos amor ta spera Tur kos amor ta soportá Amor nunka no ta faya. E pareha ku tin amor pa otro, lo vense tur opstákulo ku por presentá den nan bida matrimonial.

35

Ta amor ta loke ta hasi ku nan ta komprondé otro su doló, frustrashon, bashí i estado emoshonal. Amor ta sakrifiká, e ta duna, e ta entregá. Amor no ta kondishonal. E no ta basá riba emoshon, sintimentu òf sirkunstansia. Amor ta un desishon ku bo ta tuma konsientemente pa t’ei pa otro, bou di tur sirkunstansia. Amor real ta leal i fiel. Amor ta algu ku un pareha mester keda kuida. Pasobra si amor pa otro fria, stimashon pa otro kosnan manera material i plaka por drenta. Esakinan ta kosnan ku ta stroba e pareha di stima otro manera mester ta. Naturalmente tin mas kos ku por stroba amor di funshoná den un matrimonio, manera pleitu, maltrato, infidelidat, falta di komunikashon etc.

GOSO Goso ta un alegria intenso di paden ku ta brota bini pafó. E ta un satisfakshon pa ku bo bida personal, matrimonio, yunan etc. Esaki ta e parti ku ta fortalesé e pareha. Beibel ta bisa ku e “goso di Señor ta nos fortalesa.” (Nehemias 8:10). Ora bo tin goso, no tin lugá pa amargura. Goso ta bini di Dios; ta p’esei ta importante pa Dios ta den nos matrimonio.

PAS Loke mas hende tin mester ta pas. Pasobra pas ta libra nos di tur preokupashon.

36

Pas ta nifiká ousensia di guera, pleitu, zundramentu etc. Kaminda tin pas, tin harmonia i komprenshon. Hesus a bisa: “Mi pas mi ta duna boso.” (Juan 14:27) Ora ku e pas di Señor ta den e matrimonio, e pareha lo por solushoná tur kos den pas. “I e pas di Dios, ku ta surpasá tur komprendementu, lo warda boso kurason i boso mente den Kristu Hesus.” (Filipensenan 4:7)

PASENSHI Pasenshi ta e konfiansa di nos fe.

E ta parti integral di e fruta di Spiritu Santu. Pasenshi ta e kapasidat pa hasi nos soportá prueba di bida, soportá otro i pasa den momentonan difísil sin murmurá. Den tur matrimonio sa tin kosnan ku ta kana ménos dushi. No lubidá ku e hende ku bo a kasa kuné a bini di un otro hogar i a wòrdu eduká diferente for di bo. Ta p’esei e pareha mester tin pasenshi ku otro i tuma tempu pa siña konosé otro. Si no tin pasenshi lo tin disgustu, diskushon, pleitu i mal komprondementu. Promé ku tuma e desishon pa drenta den e bida matrimonial, tantu e hòmber komo e muhé mester sa ku e lo mester tin pasenshi ku su pareha. “Dios a demostrá Su pasenshi perfekto na nos.” (1 Timoteo 1:16)

37

KARIÑO Un hende kariñoso ta duna bon servisio ku hopi grasia. Semper e lo risibí fabor serka un otro. E ta un hende suave, yen di karisma i di un kurason bunita. Ku kariño nos por gana hopi. Den un matrimonio, karisma ta loke ta hasi e hogar agradabel. E manera kariñoso i amabel di papia ku otro, ta hasi ku e pareha ta keda ku gana di komuniká ku otro. Palabranan kariñoso ta kalma momentonan di tenshon. “Laga boso kariño ta konosí na tur hende.” (Filipensenan 4:5)

BONDAT Un hende ku ta generoso i sa di hasi bon obra ta ehersé bondat. Nos ta kere ku ta bon pa un pareha plania pa hasi bondat na otronan. Esaki ta trese bida den e matrimonio. Semper ta bon pa tuma desishon huntu, tokante ken nan lo bai yuda. Esaki ta hasi ku e pareha ta komuniká ku otro den áreanan sosial tambe. “I no laga nos kansa di hasi bon...” (Galationan 6:9)

FIELDAT Un hende fiel ta apliká fieldat tur ora. Bo por konta kuné den bon i den malu. Semper e t’ei i no ta import’é e sirkunstansia.

38

Den un matrimonio, fieldat ta loke ta mantené konfiansa. Ki dushi ta ora ku e pareha tin konfiansa den otro. “Konfia den SEÑOR i hasi loke ta bon; biba den e tera i alimentá bo mes ku Su fieldat.” (Salmo 37:3)

HUMILDAT Ta importante pa e pareha ta sumiso na otro. E pareha mester tin un temperamentu suave i humilde. Kaminda tin humildat, orguyo no por ta presente. Beibel ta siña nos, pa nos sea sumiso na otro den e temor di Kristu. Den un matrimonio, esaki ta hasi ku e pareha ta mira otro ku rèspèt. 1 Pedro 5:6: “Humiá boso mes anto bou di e man poderoso di Dios, pa E por halsa boso na e tempu apropiá,”.

DOMINIO PROPIO Un hende ku ta bou di kontròl di Spiritu Santu, tin dominio propio. E no ta laga su propio emoshonnan òf impulsividat manehá su bida. E sa di kontrolá su boka, su mannan, mihó bisá, henter su ser, pa niun palabra òf aktuashon robes di otronan deskontrol’é. E hende ku dominio propio, ta pensa promé ku e aktua. “Ma komo ku nos ta di dia, laga nos ta sobrio.” (1 Tesalonisensenan 5:8)

39

4

4.1 Algun ehèmpel ta: Pa e hende hòmber seksualidat ta mas importante - pa e hende muhé afekshon ta di gran balor. Pa e hòmber intimidat ta nifiká seksualidat - pa e muhé intimidat ta nifiká kombersá. E hòmber tin mester pa e muhé respet’é - e muhé mester sa ku e hòmber ta stim’é. Tantu e hòmber komo e muhé tin e nesesidat di tin amistat ku otro. Ta di sumo importansia pa e pareha sa e kosnan akí. Dor di tin konosementu di nan, e pareha lo por tin pasenshi ku otro i komprondé otro mihó.

42

E Palabra di Dios ta duna tantu e hòmber komo e muhé, diferente konseho (tepnan) balioso pa kontribuí na un matrimonio viktorioso. PA E HÒMBER Den 1 Pedro 3:7, ta pará skirbí: “Meskos boso, esposonan, biba ku boso esposanan ku komprenshon, manera ku un vaso mas delikado, komo ku e ta hende muhé; i dun'é onor komo ko‑eredero di e grasia di bida, pa boso orashonnan no wòrdu strobá.” Hòmber, Biba ku bo esposa ku komprenshon (sabiduria). Trata bo muhé manera e vaso di mas delikado, pasobra e ta pertenesé na e sekso mas débil. Dun’é onor, trat’é ku rèspèt. Lag’é sa ku bo stim’é. Yuda bo esposa ku e kuido di boso yunan. Komuniká tur momento ku bo esposa. Asumí bo responsabilidat komo kabes di kas.

4.2

43

PA E MUHÉ Tito 2:4-5, ta bisa: “Enkurashá e muhénan hóben pa stima nan esposo, pa stima nan yunan, pa ta huisioso, puru, bon ama di kas, kariñoso, siendo sumiso na nan mes esposo, pa e palabra di Dios no wòrdu deshonrá.” Muhé, Someté bo mes na bo esposo. Wak pa bo bunitesa ta sali for di kurason, pasobra esei ta bunitesa duradero di un spiritu suave i trankil. (Dios ta balorá esaki haltu) Onra bo esposo. Trat’é ku rèspèt. Sòru pa bo ta nèchi tur ora. Tene bo kas i bo hogar limpi. Sòru pa e muchanan ta na òrdu. Hopi pareha tin falta di e informashonnan akí, i ta p’esei hopi matrimonio ta kibra i e famia ta plama for di otro. Ta p’esei ta importante pa e pareha tin E Palabra di Dios den nan bida i ta apliká esaki den nan matrimonio. Kòrda ku un pareha ku tin temor pa Dios, ku ta hasi orashon huntu, lesa Beibel huntu i sirbi Dios huntu, ta un pareha bendishoná. (Salmo 128)

44

5

E hogar ta spiritual i un kas ta material. Hende ta konstruí un kas ku blòki, semènt, santu, palu etc. Pero un hogar bo ta

konstruí ku prinsipionan ku e famia ta stablesé. E hogar ta un lugá spesial; p’esei ta importante kua prinsipionan e famia ta skohe pa stablesé e hogar. Nos a skohe E Palabra di Dios pa stablesé e prinsipionan di nos hogar. E hogar ta é lugá pa siña tokante di Dios, e famia i e kosnan di bida. Hende mester pensa konstantemente riba Dios Su mandamentunan, siña nan na nan yunan i biba tur dia segun e liñanan di guia di E Palabra di Dios. Deuteronomio 6:6-7 “E palabranan akí, ku mi ta ordená bo awe, mester ta riba bo kurason. Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” Kada hende mester traha riba su hogar i hasié e lugá di mas dushi riba e mundu akí pa su famia por biba felis den dje.

5.1

46

Trata otro ku rèspèt. Konosé otro. Komuniká ku otro: Papia tokante e kosnan bon. Papia tambe tokante e problemanan, situashonnan i trata na yega na solushonnan konhuntamente. Skucha otro. Trata di komprondé otro su punto di bista. Den sírkulo familiar: Tuma tempu pa otro. Plania huntu. Kome huntu na e mesun mesa. Keda fiel na otro. No kambia bo prinsipionan. Siña pidi pordon ora bo tin falta. Yuda otro den trabounan di kas.

5.2

47

Ta bon pa para ketu na e puntonan akí i puntra bo mes esaki: Ki prioridat bo kasá tin pa bo? Ki efekto e desishonnan ku bo ta tuma tin riba bo matrimonio? Despues ku bo a logra tur kos, tur título, bo por konta ku bo hogar?

Felisidat? Hasi bo kasá i bo yunan felis. Pas? No hasi guera, biba den harmonia. Amor? Entregá bo bida i stima bo famia. Rèspèt? Respetá bo kasá. Goso? Kibra ku amargura i sak’é for di bo bida i duna kariño. Amistat? Kuminsá ta su amigu/a i gana su amistat. Pordon? Pidi pordon i pordoná. Tin hende ku nunka a pidi pordon. Tin biaha pa motibu di miedu i orguyo, nos no ta pidi pordon. Pero pidimentu di pordon ta algu poderoso; e ta sana herida, e ta kanselá e pleitu entre e pareha ora e wòrdu hasí realmente di kurason. Si bo no tin felisidat den bo hogar, abo lo no ta felis. Komuniká ku otro, sea un amigu/a i partner di otro. No traishoná otro, pero trata otro bon i kuida otro. Ta hopi importante pa komo pareha, bo bendishoná otro. Pasobra ora bo bendishoná un hende, ta e bendishon di Dios ta bini riba e persona su bida. Ta p’esei, papia palabranan di bendishon riba bo kasá i bo yunan. Proklamá e bondat di Dios riba otro su bida. Stima e otro manera bo mes, esaki ta bo próhimo di mas serka. Hasi orashon pa e protekshon di Dios keda riba bo matrimonio i bo famia. Kibra ku e plan di satanas i kuminsá apliká e plan di Dios den bo matrimonio.

48

Kiko bo ke kosechá for di bo hogar i den bida?

Komo hòmber i tata, Dios a duna nos un tremendo responsabilidat pa ta kabes di un hogar. Un hòmber mester tin sabiduria i komprondementu pa e por konstruí su kas i hogar. E mester di konosementu pa e kambernan wòrdu yená ku tur rikesa presioso i agradabel. (Proverbionan 24:3-4) Komo hòmber E hòmber ku haña un muhé, a risibí algu bon. E hòmber mester entregá su mes pa su esposa, purifiká i laba su esposa ku e awa di Dios Su Palabra. (Efesionan 5:25-26) Tambe e hòmber mester stima su esposa manera su mes kurpa.(Efesionan 5:28) Komo tata Un tata tin mester di palabra di instrukshon pa e por duna su yunan. (Proverbionan 4:1) Un tata mester lanta su yunan den disiplina i instrukshon di Señor. Un tata mester tin temor di Dios, pa e por dirigí su famia segun Dios Su Palabra.

49

5.3

6

Bida seksual di un pareha mester ta salú; esaki ta sumamente importante. No neglishá ni balotá balor di esaki. Un investigashon ku a wòrdu hasí, ta mustra ku tin dos motibu prinsipal ku ta kousa divorsio den parehanan. Mal maneho di finansa ta e motibu number un di divorsio i problema den relashon seksual ta motibu number dos.

6.1

52

Seksualidat ta un tópiko ku masha poko ta wòrdu papiá di dje. Tin biaha pa falta di bon informashon, kosnan no ta bai bon den e área akí. Ta masha importante pa deshasí di tur kos ku ta forma un opstákulo den e área di intimidat seksual. Un di e problemanan ku bo ta haña den e relashon di e pareha, ta kaminda tantu e hòmber komo e muhé ta ninga otro seksualmente. Tin pareha ta hasi esaki ku regularidat, sin duna otro splikashon di kiko ta e motibu ku nan no ke tene relashon seksual. Na lugá di duna un splikashon korekto, nan ta ofendé otro ku palabranan manera: Bo no ta bon, bo no ta sirbi, bo ta mahos, bo ta gordo òf flaku, bo boka ta hole stinki, bo ta hasié malu etc. Asina nan ta hasi uso di palabranan ofensivo pa ku otro. Esaki ta trese deskonfiansa i doló serka e pareha.

6.2

53

Beibel ta siña nos den e buki di 1 Korintionan kapítulo 7:3-5, e siguiente puntonan: 1. Laga e esposo kumpli ku su deber di matrimonio ku su esposa, i meskos tambe e esposa ku su esposo. 2. E esposa no tin outoridat riba su mes kurpa, sino e esposo; i meskos tambe e esposo no tin outoridat riba su mes kurpa, sino e esposa. 3. Stòp di nenga otro, si no ta pa un tempu, ku konsentimentu di otro, pa boso por dediká boso mes na orashon; i bini huntu atrobe, pa satanas no tenta boso pa motibu di boso falta di dominio propio.

54

Tin diferente motibu ku por stroba un pareha pa entregá nan mes seksualmente total na otro. Por ehèmpel: Miedu. Tiki òf ningun informashon tokante un relashon seksual. E echo di no ta wòrdu satisfasé. Daño risibí den e área akí ku no a wòrdu tratá kuné òf ta skondí ainda. Infidelidat. Esakinan ta algun di e problemanan ku ta eksistí den matrimonio, enkuanto intimidat seksual. E opstákulonan akí ta stroba e libertat ku ta masha importante den bida seksual di e pareha. Relashon seksual por ta parse un parti chikí di e matrimonio den su totalidat. Pero sin dje, e matrimonio no ta kompleto. Matrimonio no ta pa produsí yu so. Matrimonio ta pa e pareha entregá su mes totalmente na otro (e ta un akto di entrega total). Den e bunita akto akí ku Dios a destiná únikamente pa tuma lugá den matrimonio, e pareha ta entregá nan kurpa na otro. No tin ningun akto físiko entre un hòmber i un muhé ku por wòrdu deskribí komo, bira ún karni. (Genesis 2:24). Den e akto akí e pareha ta sirbi otro.

6.3

55

Nos ta kere ku ta masha importante, pa un pareha komuniká hopi den e área akí i asina evitá dolónan ku por presentá. Ta importante pa bo sa, si bo pareha tin mester di sanashon den e área akí tambe. Abo ta e mihó persona pa yud’é wòrdu saná. Intimidat seksual ke men ku bo ta sakrifiká bo mes, en bes di eksigí pa bo mes. Un pareha mester kultivá afekshon den su relashon. E esposo tin ku laga su kasá komprondé ku palabra i echo, ku e ta mas importante ku tur otro kos, despues di Dios. I e esposa tin ku laga su kasá komprondé ku palabra i echo, ku e ta mas importante ku tur otro kos, despues di Dios. Despues di nos amor pa Dios, nada otro mester haña prioridat mas grandi ku e amor ku nos tin pa nos kasá. Proverbio 5:15 “Bebe awa for di bo mes rembak, i awa fresku for di bo mes pos.” Proverbio 5:19 “Manera un biná amabel i un gasèl grasioso, laga su pechunan satisfasé bo tur ora; sea semper enkantá ku su amor.” Hebreo 13:4 “Laga matrimonio wòrdu onrá pa tur hende, i laga e kama matrimonial ta sin mancha; pasobra Dios lo huzga fornikadónan i adúlteronan.” Kantika di Salomon 8:6 “Pone mi manera un seyo riba bo kurason,..”

56

Loke un pareha mester hasi, pa mantené e pashon den nan

matrimonio ta:

57

Stima otro Tuma tempu ku otro

Papia amabel ku otro Brasa otro

Sunchi otro Karisia otro Konfia otro

Ta liber ku otro Tin un bida amoroso (fresku) tur ora

7

U n kompromiso matrimonial serio i bon komunikashon ta keda mantené, ora un pareha pone un bon guia i bareranan den

nan finansa. Un maneho finansiero bon balansá ta trese pas mental. Tur dos persona den e matrimonio, mester sa ku ta nan tur dos ta responsabel pa nan finansa ta den balansa. Mal komprondementu, mal maneho, falta di komunikashon, falta di libertat i sekresia den finansa di un matrimonio, ta ruina e matrimonio; esaki ta motibu number un di divorsio segun investigashonnan hasí (Dr. Phil). Deskonfiansa i preshon finansiero den un matrimonio ta hasi ku esaki ta filtra drenta den tur otro área di un matrimonio. Si un pareha no tin palabrashonnan adelantá den e área finansiero, esaki lo por trese hopi konflikto i desgustu den e matrimonio. Pa un pareha por tin éksito den e área finansiero, den su bida matrimonial i familiar, e hòmber i e muhé mester ta hendenan entregá na otro. E entrega akí ta hiba na konfiansa i libertat ku ta di sumo importansia pa e pareha su felisidat. Bo sa kiko ta dushi?

Loke Dios a uni, no laga ningun hende separá. (Mateo 19:6)

60

Ora bo sa ku e sèn ku boso a traha duru p’e ta bon manehá, bon kuidá i bon invertí. Esei ta trese trankilidat pa e pareha. Pa chikí ku e parti akí tambe por parse, si nos atendé robes kuné, e ta bira un motibu pa e enemigu di matrimonio drenta i trese un diluvio asina grandi ku e kas ta basha abou. Si tin un área ku mi a konosé mi kasá lihé den dje, ta den e área akí. E ta un persona ku a bendishoná i impreshoná mi ku su manera di atendé ku sèn. Mi por a eksperensiá su libertat finansiero for di dia ku mi a konos’é. Ora mi a konos’é, e no tabatin ningun debe, e no tabata interesado, su pañanan ku e tabata kumpra tabata na su nivel, i esei ta bisa hopi. Na mes momento esei a duna mi hopi konfiansa den dje i te awe mi ta disfrutá di e konfiansa i libertat ei. Tin biaha nos no ta para ketu pa sa, ku e hende ku nos a kasá kuné òf e hende ku nos ta bai kasa kuné, ta un hende ku ta òf por manehá sèn bon. Bo mester sa ku e hende ku bo ta bai kasa kuné òf ku bo ta kasá kuné, ta liber òf mará finansieramente, òf ku fásilmente e ta wòrdu tentá pa moda, modernismo, ambiente, influensiá dor di otronan den e área ku tin di aber ku sèn. Dos hende ku ta namorá di otro i ku tin plan pa drenta enlase matrimonial, mester papia tokante di sèn i kon ta bai maneh’é, promé ku nan kasa. Mester tin palabrashon! Kua palabrashon mester tin? Mester tin palabrashon kon ta bai atministrá e sènnan.

61

Tin diferente modèl kon pa atministrá sèn, pero nos ta kue e dos siguiente modèlnan.

MODEL 1 Den kaso di un pareha kaminda tur dos ta traha. Kada hende ta keda ku nan sèn (sèn separá), ta repartí ken ta paga awa, lus, telefòn, kuminda, gasolin etc. òf ta konta kiko e gastunan ta i pone sèn huntu i paga nan. Kada hende ta atministrá su mes sèn di loke a sobra.

MODEL 2 Den kaso di un pareha kaminda tur dos ta traha. Pone tur entrada salarial huntu riba un kuenta i tin un solo atministrashon. Esaki ta e modèl ku hopi pareha ta apliká i ta kosechá hopi benefisio for di dje. E no ta difísil i e ta kuadra ku e promesa di: loke ta di mi, ta di bo i loke ta di bo, ta di mi. Esaki ta e konsepto di kasa den komunidat di bienes ‘binnen gemeenschap van goederen’. Pa nos, esaki ta e modèl di: “Loke Dios a uni, no laga ningun hende separá!” (Mateo 19:6). E ta e modèl di mas bunita, pasobra e ta demonstrá ku nos ta konfia otro. Den un matrimonio ta bon pa sa ken den e pareha por atministrá mihó i laga e ta esun ku ta hasié. No ta importá ku si ta e hòmber òf e muhé, esaki tambe ta parti di entrega na otro.

62

Ta masha importante pa un pareha sinta huntu i plania nan finansa. Ponementu di sèn huntu ta hasi ku un pareha mester komuniká. Komunikashon ta primordial den un matrimonio. E sistema di pone sèn huntu ta yuda, ku ningun di dos no tin kos di skonde den e área aki. Naturalmente kada persona por tin nan ‘zakgeld’ i tin libertat riba esaki. E intenshon no ta pa nos oprimí otro finansieramente, pero pa hasi tur kos ku un bon palabrashon. Den e promé modèl, bo por haña kaso kaminda ku e hòmber òf muhé ta duna su mama, ruman òf kolega sèn sin ku e otro ta na altura di esaki. No ku duna bo mayornan sèn ta algu malu, pero ta bon pa komuniká esaki ku bo pareha. Tin kaso ku e muhé ta duna su mama sèn, pero e mama ta bai kasino ku e sèn i ora ku e hòmber tuma nota di esaki, e ta rabia i esaki ta trese malkontentu den nan hogar. Tambe por tin kaso ku tin un yu pafó di matrimonio i mester duna alimento òf otro kos ku e yu tin mester. Si esaki no wòrdu komuniká, e por trese deskonfiansa entre e pareha. P'esei nos ta kere ku ta masha importante pa komuniká tur kos ku otro tokante finansa i tur otro asuntu den e hogar. Tin kaso kaminda e hòmber no sa kuantu e muhé ta gana i vise vèrsa. Tin hende ku nunka a mira e slep di salario di su kasá. Esaki no ta salú pa un matrimonio; e ta mustra kon leu e pareha ta for di otro. Tin hòmber ku ta traha overtaim pa logra mas kos pa su hogar, di otro banda, e muhé ta gasta e sèn na kosnan innesesario. Tambe bo ta haña ku tin hòmber ta traha overtaim pa mantené un otro relashon; esei tambe ta kompletamente for di e òrdu di Dios i ta piká den bista di Dios.

63

Mi sa ku loke mi ta bai bisa aki ta un echo: un hende misterioso ku ningun hende no sa nada di dje, ta un hende ku tin kos di skonde i esei no ta saludabel pa un matrimonio. Nos mester eliminá tur opstákulo den e relashon ku nos kasá. Esaki ta trese konfiansa. Nos mester por ta íntegro na kas, promé ku nos por ta íntegro na trabou òf den nos ministerio. E Palabra di Dios ta bisa: “Lo mi kana den mi kas den e integridat di mi kurason.” (Salmo 101:2) Den Beibel koriente e ta bisa: “Mi ke tene mi andar ireprochabel, ki ora Bo ta bin serka mi? Mi ke biba ku konsenshi limpi den mi kas tambe.” Génesis 2:25, ta bisa ku "nan tabata sunú i no tabatin bèrgwensa". Nan no tabatin nada di skonde pa otro. Ta esei ta e plan di Dios pa e matrimonio, ku e hòmber i e muhé por ta liber ku otro. Libertat ta kosta; p'esei esun ku tin e, tin ku manten’é. Pa chikí ku e parti aki por parse, si nos atendé robes kuné, e ta bira un motibu pa e enemigu di matrimonio drenta i trese hopi diluvio.

64

Tep pa plania huntu den finansa: 1. Kon nos ta onra Dios ku nos finansa; nos mester resa na Dios pa sa kon nos ta manehá nos finansa. 2. Asuntunan di kas: koriente, awa, telefòn, gasolin, komestibel, seguro di kas i di outo, paña, debe etc. 3. Bida sosial: sali ku famia, plania fakansi. 4. Estudio di e muchanan. 5. Kon pa spar. 6. Kon pa konkretisá kosnan. 7. Hasi kompra pa kas. Tin kaso kaminda e hòmber ta plania su fakansi su so òf e ta bai fakansi ku su kasá, pero kada hende ta paga nan mes pasashi. Tin kaso kaminda e muhé a plania su fakansi ku su amiganan di trabou. Tin di e parehanan akí ta hendenan ku ta aparentá di ta masha bon ku otro, pero tòg nan ta sinti ku nan falta di algu. Bo por puntra bo mes: kon bini nan ta pensa asina? E kontesta ta: mal siñansa bíbliko, òf nan a haña konseho matrimonial ku falta di bon konosementu òf nan ta imitá un modèl di matrimonio ku no ta esun apropiá.

65

Kapítulo 1 — 1. Duna un definishon bíbliko di matrimonio. 2. Kiko ta hasi e matrimonio di pastornan Raimy i Arlette Juliet fuerte? 3. Ki ora un matrimonio ta wòrdu stablesé i rekonosé?

A base di loke nos a kompartí ku bo den e kapítulonan anterior, nos ke pa bo para ketu na e siguiente preguntanan. Ta e intenshon pa bo yena e kontestanan pa bo mes i kompartí e kontestanan i opservashonnan ku bo pareha. No djis kontestá ku sí òf nò, pero motivá bo kontesta.

66

4. Di akuerdo ku Dios Su Palabra, un matrimonio por wòrdu terminá? 5. Boso a risibí òf ta risibiendo konseho matrimonial bíbliko komo pareha, promé ku drenta enlase matrimonial? Sí Nò (marka un krus na e kontesta korekto) Si ta nò, lo boso ke hasi esaki ainda i dikon? 6. Kuantu sorto di matrimonio Dios ta rekonosé den e buki di Malakias kapítulo 2?

67

7. Un pareha kasá por nenga otro? 8. Despues di e kapítulo akí, mi ta bai traha riba e siguiente puntonan den mi bida i nos relashon: Kapítulo 2 — 1. Dikon Dios a traha un muhé pa e hòmber? 2. Ta un yudadó doméstiko Dios a traha pa e hòmber?

68

3. Un hòmber por tin mas ku un muhé? 4. Dikon ta bon pa un hòmber warda riba Dios pa su futuro esposa? 5. Por fabor lesa Efesionan 5: 22-32. A. Hende muhé, lesa versíkulo 22-24 i splika bo futuro esposo kiko bo a komprondé. B. Hende hòmber, lesa versíkulo 25-29 i splika bo futuro esposa kiko bo a komprondé. C. Pareha, lesa versíkulo 30-32 huntu i papia tokante esaki pa boso matrimonio.

69

Kapítulo 3 — 1. Despues di e matrimonio kiko ta importante pa e pareha kasá hasi? 2. Menshoná dos fruta di Spiritu Santu ku ta importante pa e matrimonio. 3. Menshoná dos ehèmpel kon amor pa otro mester ta! 4. Menshoná dos ehèmpel kon amor pa otro no mester ta!

70

5. Duna boso propio definishon di amor di akuerdo ku E Palabra di Dios. 6. Laga kada persona splika kiko e ta bai hasi pa mantené e amor ariba deskribí. 7. Matrimonio konosé momentonan dushi so? 8. Duna bo propio definishon di pasenshi i dominio propio.

71

9. Laga kada persona splika kon ta ku su pasenshi i dominio propio. Kapítulo 4 — 1. Menshoná tres kos ku pa e hende hòmber ta importante den matrimonio. 2. Menshoná tres kos ku pa e hende muhé ta importante den un matrimonio. 3. Kua tepnan Beibel ta duna e hende hòmber.

72

4. Kua tepnan Beibel ta duna e hende muhé. 5. Dialogá riba boso relashon i evaluá esaki relashoná ku e tepnan. 6. Hende muhé, abo sa kiko bo futuro esposo ta haña importante? Menshoná esakinan. 7. Hende hòmber, abo sa kiko bo futuro esposa ta haña importante? Menshoná esakinan.

73

Kapítulo 5 — 1. Duna boso definishon di un kas i un hogar. 2. Ki ora un hogar ta salú? 3. Ken tin e responsabilidat di ta kabes di kas di akuerdo ku Dios Su Palabra? 4. Kiko esaki ta nifiká pa e hende hòmber i su famia?

74

5. Lesa Proverbionan 4:1 i 24:3-4, Efesionan 5:28-29. Splika kiko boso ta komprondé i kiko esaki ta nifiká pa boso relashon. Kapítulo 6 — 1. Menshoná e dos motibunan ku den mayoria kaso, segun investigashon ku a wòrdu hasí, por influensiá un matrimonio.

2. Por fabor lesa 1 Korintionan kapítulo 7. Kiko boso ta komprondé di e versíkulo akí?

3. Por fabor lesa 1 Pedro 3: 1-7. Kiko boso ta komprondé ku e versíkulo akí?

75

4. Pa kua motibu un pareha por wòrdu strobá pa entregá nan mes seksualmente total na otro? 5. Kiko un pareha mester hasi pa mantené pashon den nan matrimonio?

6. Por fabor lesa Proverbionan 5:15, 5:19 i tambe Hebreonan 13:4. Despues dialogá ku otro. Kapítulo 7 — 1. Kon kada persona ta pensa tokante di finansa aktualmente?

76

2. Kon kada persona ta manehá finansa aktualmente? 3. Kua di e dos modelonan den e kapítulo akí boso ta skohe? Dikon? 4. Por fabor lesa Génesis 2:25. Kiko esaki ta nifiká pa e matrimonio? 5. Kiko esaki ta nifiká pa e parti finansiero?

77

6. Traha boso plan, kon pa manehá finansa den matrimonio i diskutí esaki ku pastornan.

78

Un palabra di kariño Un brasa yená ku amor Un sunchi sabroso Pordoná mi Danki Mi stima bo Nan ta parse di ta kosnan chikí den un matrimonio, pero ta nan ta yuda kada pareha yega na e kosnan grandi. Ta e kosnan chikí akí ta hasi ku un pareha por ta felismente kasá. Pastornan Raimy i Arlette Juliet

79

Kosnan chikí ku ta yuda kada pareha yega na kosnan

grandi.

Yena e siguiente evaluashon i haña informashon tokante di e áreanan den bo matrimonio ku bo mester traha riba dje. Sí Nò 1. Bo ta laga bo kasá sinti bon di su mes? 2. Bo kasá tin mag di koregí bo? 3. Bo komportashon ta kuadra ku loke bo ta bisa? 4. Bo kasá por bisa ku abo ta proteh’é?

5. Bo ta bis’é tur dia ku bo ta stim’é?

6. Bo kasá por papia ku bo sin miedu?

7. Bo sa enkurashá bo kasá?

8. Bo ta bisa bo kasá ora bo mester di su konsuelo?

9. Bo ta kapas pa siña for di bo kasá i balorá su opinion? 10. Bo ta gusta ta huntu ku bo kasá?

11. Bo gusta sera bo kasá konosí ku bo konosínan?

12. Bo kasá ta sinti ku despues di Dios, e ta esun mas importante?

13. Bo ta demostrá ku echo ku bo ta care pa bo kasá?

14. Bo ta skucha loke ta biba den dje?

15. Ora bo pensa riba bo kasá, bo ta haña gana di ‘smile’? 16. Bo ta pensa riba satisfasé bo kasá su deseonan?

17. Bo kasá por bisa ku bo gusta ta kuné?

18. Si bo a ofendé bo kasá, bo ta atmití i pidié pordon?

19. Bo sa ora bo kasá tin preokupashon òf doló?

Evaluashon di bo matrimonio

80

Sí Nò 20. Bo kasá ta sinti manera ku, bo trabou ta mas importante kuné? 21. Bo sa papia bon tokante di bo kasá?

22. Bo sa ninga bo mes algu pa bo duna bo kasá?

23. Bo ta konsultá ku bo kasá pa ku desishonnan grandi? 24. Bo ta konfortabel ku bo kasá maske kiko e tin bistí?

25. Lo bo bolbe kasa kuné si bo por a skohe?

26. Bo sa bisa bo kasá ku e ta importante pa bo?

27. Bo ta bis’é ku bo gust’é? 28. Bo sa bis’é bo ta kontentu ku bo a kasa kuné?

29. Bo ta sigur ku bo ta satisfas’é?

30. Bo ta papia ku rèspèt kuné? Resultado Si bou di 10 ta ‘sí’: bo mester ‘overhaul’ bo matrimonio. Si entre 10 pa 20 ta ‘sí’: tin kos di drecha. Si riba 20 ta ‘sí’: sigui asina i kuida bo kasá. Nos tin sigur ku si un pareha apliká tur loke ku nos a pone den e buki akí, e lo tin un matrimonio bendishoná.

81

Tata ku ta na shelu, Bo nòmber sea santifiká. Awe nos ta trese tur e matrimonionan dilanti di Bo trono i nos ta pidi Bo pa bendishoná kada pareha i yena nan ku Bo amor abundantemente. Ku lo tin harmonia i pas den kada pareha. Nos ta deklará prosperidat den e famia i ku for di kada matrimonio lo sali un generashon deboto. Danki Señor, pa Bo grasia ku ta riba nan. Spiritu Santu, guia nan den triunfo tur e dianan di nan bida, den e nòmber presioso di Bo Yu stimá Hesu-Kristu. Amèn.

82