Aldo Tognon

‘Na oltra vita

Ogni sera, cô xe ‘l tramonto, vardo ‘l sol che ‘l vâ zò e scansèlo ‘n oltro zorno de ‘sta vita che vâ… de ‘sto tenpo ch’ el côre, che no ‘l se ferma mai e ch’ el vièn de lontan: de ‘sto tenpo ch’ el côre e ch’ el vièn de lontan.

Sarà longa ‘sta vita ? quanto la durerà ? La sarà curta o ‘nfinïa, comò ‘l sielo là sù o ‘sta spiaza basàgia de ‘sto mar e ‘ste onde che le vièn de lontan: de ‘sto mar e ‘ste onde che le vièn de lontan. Volaravo ‘ndà via, lontan, via co’l vento svolà… vèghe oltri païsi, oltri mundi, oltri oci ‘ncontrâ; la gnò anema libera e vê ‘l cuor che no ‘l sîa ‘ncadenao, respirà in libertà : la gnò anema libera, respirà in libertà.

La vita me dise che xe ‘rivao ‘l tenpo, de no’ vê paura, xe questo ‘l momento; farè ‘na preghiera a ‘l anzolo nostro de vê le so’ ale e podè svolà via.

‘Sto tenpo che ‘l sbrìssa de vìa le gnò mane no’ rîvo a fermàlo : xe aqua che còre, lusor d’ un mar grando e sensa cunfini.

Drento ‘sto “paradiso” me me sênto in prezon, duto belo e perfeto, Gravo, duto fàto pe’ me… ma le robe che vogio, la gnò vita e ‘l futuro, le xe oltra d’ un muro : la gnò vita e ‘l futuro le xe oltra d’ un muro. Ogni sera, cô xe ‘l tramonto, vardo ‘l sol che ‘l vâ zò e scansèlo ‘n oltro zorno de ‘sta vita che vâ… de ‘sto tenpo ch’ el côre, che no ‘l se ferma mai e ch’ el vièn de lontan: de ‘sto tenpo ch’ el côre e ch’ el vièn de lontan...

Copyright@2013