LITURGI SABTU PENGARAPEN

Tema

“Jera I bas Dosa Nari”

TANGGAL 11 April 2020

A. PERSIKAPEN

Ertoto Guna Rekaman Kebaktin

B. KEBAKTIN

1. Kata Penaruh

Turang ras senina, wari enda bengket kita ku bas Sabtu Pengarapen, ija kita

ngerenungken erti keleng ate Dibata arah kematen Jesus Kristus. Kematen

eme hal si tuhu-tuhu ibiari manusia. Seh maka ncakapken kematen ras ngidah

tanda-tanda kematen pe enggo nambahi kebiaren. Emaka tambah me ateta

mesui di kune kalak si ikelengi kita lawes nadingken kita.

Pengertina enda me si ipelimbarui arah kita emperingeti kematen Jesus

Kristus wari enda. Jesus enggo bengket kudoni kematen, dingen naluken

kuasa kematen. Kematen pe la ngasup nirangken kita i bas keleng ate Dibata

nari. Seh maka ku doni kematen pe kita iperjuangkenNa dingen

iselamatkenNa. Kematen Kristus eme maba keselamaten dingen keterkelinen

man banta bage pe man kerina kalak si enggo mate i bas Kristus.

Mari dage sibaba pusuh ras ukurta ngadap i lebe-lebe Dibata, gelah idemiNa

kita alu pengertin ras pengarapen si mbaru. Si dahi dage Tuhan, ras kita tedis

dingen ras kita ngendeken : “Tuhan Demi aku Salu KataNdu”

Tuhan demi aku salu KataNdu, Tuhan demi aku salu KataNdu (iendeken)

Pusuhku bagi tambe kubaba ku pancurNdu, Tuhan demi aku salu KataNdu.

Tuhan demi aku salu dameNdu, Tuhan demi alu salu dameNdu

Pusuhku bagi tambe kubaba ku pancurNdu, Tuhan demi aku salu dameNdu.

2. Votum - Salam

L I bas gelar Dibata Bapa si mada kegeluhen, i bas gelar Jesus Kristus si

naluken kematen, ras i bas gelar Kesah si Badia si mereken pengertin

kerna erti kegeluhen ras kematen.

Perkuah ate ras dame i bas Dibata Bapa, i bas gelar Jesus Kristus ras

kerembaken Kesah si Badia, ras kita kerina gelah. Amin.

P Amin ….. Amin ….. Amin ….. (iendeken)

3. Berita Kerna Perbahanen ras Sura-sura Dibata (Invocatio)

L “Kam enggo mate ras Kristus, janah enggo ibebasken i bas kuasa-kuasa

si la teridah nari.” (Kolose 2 : 20a).

Erpalasken kata Dibata enda, sipuji ia alu radu ras ngendeken :

KEE No. 317 : 1, 2 “Sipuji Tuhan Arah Geluhta”

1. Si puji Tuhan arah geluhta,

si inget tetap ngaruhna

banta,

ban k’leng ateNa, nebusi

kita.

Terkelin kita si tek man

baNa.

2. Segedang g’luhta inget Dibata

Bas k’rina paksa ngaraplah

baNa

Tetap ukurta rembak ras Ia

Erban si ‘rguna ula erleja.

4. Kinata Kerna Kebiaren Manusia Nandangi Kematen

L Jesus bengket ku doni kematen. Ije pe IA nuduhken maka kematen

langasup naluken kuasaNa. Kematen Jesus nuduhken, maka kematen la

ngasup nirangken manusia ras Dibata. La kal ate Dibata kita bene i bas

dosa, seh maka ku doni kematen pe IA erdahin guna anak-anak si

ikelengiNa.

Kai nari ndia kebiarenta kerna kematen? I bas paksa teneng enda mari

situriken kebiarenta man Dibatanta.

(Paksa Teneng)

L Melala kal kita manusia eraru ate tupung kalak si ikelengi kita idilo

Dibata, lit pengakapta maka kalak si enggo mate nggeluh i bas ate mesui

dingen kelinon. Lupa kita maka Dibata nemani ia i bas kematenna. Seh

maka labo lit ingan si ngasup nirangken Dibata ras anak-anakNa.

Kekelengen ni Tuhan, i bas paksa teneng enda mari si ampeken

kebiarenta nandangi kematen man Dibata. Dingen si endesken kearun

ateta kerna kekelengenta si enggo leben nadingken kita.

(Paksa Teneng)

L Adi nulih kita ku bas isi pusuhta, situhuna banci jadi kita pe mbiar

ngalaken kematen, erkiteken lit pengakapta maka kematen e me kebenen

dingen kesirangen si rasa lalap ras anak jabunta. Lupa kita maka kematen

eme dalan si enggo ibentasi Tuhan Jesus guna bengket ku bas kegeluhen

si mbaru. Dingen kematen e jadi dalanta jumpa pagin ras kerina si

ikelengi kita i bas persadanta si rasa lalap iadep-adepen Dibata.

Kekelengen ni Tuhan, i bas paksa teneng enda mari dage si endesken

pusuh ras ukurta guna ipelimbarui Dibata gelah tangkas man banta

kematen e lanai jadi kebiaren.

(Paksa Teneng)

L Mari dage sipetetap ukurta alu ngendeken :

KEE No. 377 : 1, 2 “Kuakuken Me Dosangku”

1. Ku akuken me dosangku i lebe Tuhan

Megati aku lalar bas kegeluhenku.

Keleng ateNdu, pengarapenku.

I teruh perkuahNdu malem me pusuhku.

2. Erlebuh aku baNdu o Yesus Tuhanku

Alemi min o Bapa salah ras lepakku

Keleng ateNdu pengarapenku

Tedeh ‘teku ngidah belinna perkuahNdu

Keleng ateNdu pengarapenku

Tedeh ‘teku ngidah belinna perkuahNdu

5. Kata Dibata si Mpetetap Ukur Manusia

L “Selaku persuruhen Dibata, aku nehken kataNdu man banta kerina kita

si ngaloken keleng ate Dibata arah kematen Jesus, niNa:

“Sabap Kristus mate cukup sekali saja ngenca erkiteken dosa-dosa

manusia, janah sekali saja ngenca IA mate. IA kalak bujur, mate man

guna kalak perdosa, gelah banci kam ibabaiNa rembak ras Dibata”

(1 Petrus 3 : 18a).

Sipuji Dibata i bas kekelengen si icidahkenNa arah kematenNa, alu

ngendeken :

KEE No. 328 : 1, 2, 3 “Teruh Kayu SilangNdu”

1. Teruh kayu silangNdu,

Ku’ndesken geluhku.

Lau sumbul keg’luhen,

Maler kap man bangku.

Refrein :

SilangNdu, silangNdu,

E ku muliaken.

Seh ku surga me pagin.

Geluhku terkelin.

2. Teruh kayu silangNdu

Tergejap kelengNdu

Desken bintang si terang

Si erbanca senang.

3. Teruh kayu silangNdu

LiasNdu kuinget

I bas dalin geluhku

KelengNdu tersinget

6. Nehken Kata Dibata

a. Marilah sibegiken Kata Dibata si man ogenken ibas Kebaktin enda sini ibuat

ibas Markus 15 : 42 - 43.( Tunggal )

Jesus ikuburken

L Ope seh jam wari Sabat, reh me Jusup kalak Arimatea. Ia sekalak

anggota Pengadilen Agama si ihamati. Ia pe sekalak si tertima-tima

nandangi kerehen Kinirajan Dibata. Sendah enda wari Persikapen (e me

wari ope wari Sabat). E maka alu la biar-biaren Jusup pang ngadap man

Pilatus mindo mait Jesus.

Ketuahen me kalak si megiken kata Dibata dingen si makekenca i bas

kegeluhenna si teptep wari. Haleluya.

P Haleluya…. Haleluya…. Haleluya….

b. Khotbah : Matius 12 : 38 - 42

7. Pengakun Kiniteken

8. Nehken Persembahen

L I bas kita nehken Persembahen Pengataken Bujurta man Dibata si jadi

palas man banta ibuat i bas Jesaya 54 : 10 :

“Bicara deleng-deleng miser gia, uruk-uruk pe mundu-undu, tapi keleng

ateKu tetap la miser i bas kam nari, janah padan dame si Kubahan lalap

paguh la mundu-undu. Bage nina TUHAN si ngkelengi kam tetap”

Tupung si endesken persembahenta mari ras kita rende i bas :

KEE No. 323 : 1, 2, 3 “Sura-Sura Daging Lawanlah”

1. Sura-sura daging lawanlah tetap.

Je ‘di la kam talu tambah gegehndu.

Sura-sura jahat simbaklah tetap.

Ngaraplah man Yesus tentu kam menang.

Refrein : Pindo gegeh man Tuhan

gelah kam lalap paguh.

I b’reNa kita menang,

menahang ras senang.

2. Tadingken si jahat, olangi dosa

Ukurndu meciho la ercinengga

Pake kebenaren nggeluh bas terang

Ngaraplah man Yesus,

tentu kam menang Reff …

3. Geluh si mulia Ib’re Dibata

Man kal;ak si s’tia kinitekenna

Gelah la kam celus. lit ka psi natang

Ngaraplah man Yesus,

Tentu kam menang Reff …

Pertoton Persembahen ras Syafaat

9. Perpadanen Man Dibata

L Turang ras senina, enggo tangkas man banta maka arah kematen Jesus,

ituduhkenNa kuasa dingen keleng ateNa guna keterkelinen kalak si tek

man baNa.

P Lanai aku mbiar Tuhan, sabab enggo italukenNdu kuasa kematen si

ngiket aku. Kematen la ngasup nirangken aku i bas keleng ateNdu nari.

L Jesus Kristus nemani kita seh ku bas kematenta. Seh maka labo lit ingan

si ngasup nirangken kita ras IA.

P Malem kal ateku Tuhan i bas penemaniNdu. Lanai ateku aru nandangi

kematen si arus ku bentasi.

L I bas kita mpeteguhi perpadanendu man Dibata, si lanai mbiar nandangi

kematen, sipuji Tuhan i bas :

KEE No. 330 : 1, 2, 3 “Tuhan, Kam Me Si Permakan”

1. Tuhan Kam me Permakan,

Kami biri-biriNdu.

Kami tetap kap nggejapken

b’linna keleng ateNdu.

Tuhan Jesus, Juru S’lamat,

kami si k’rajangenNdu.

Tuhan Jesus, Juru S’lamat,

lami si k’rajangenNdu.

2. Kam Pengawal si setia,

Kam sekawal geluhku

Kam pedauhken k’rina dosa

Ndilo Kalak si lalar

Tuhan Jesus Juru S’lamat,

Ngendes kami man Bandu

Tuhan Jesus Juru S’lamat,

Ngendes kami man baNdu

3. PadaNdu ngaloken kami

Gia m’luat erdosa

Perdosa iurasiNdu

Dingen ipulahiNdu Tuhan Jesus Juru S’lamat,

Kam me Raja Penampat

Tuhan Jesus Juru S’lamat Kam me Raja Penampat

10. Pertoton Tuhan

11. Pengutusen Ras Pasu-pasu Dibata

L Bengketlah kegeluhenndu siteptep wari, saksikenlah ketetapen ukur ras

kinitekenndu maka Dibata la pernah nadingken kam seh rasa lalap. Guna

mpeteguhi ukur ras kinitekenndu, alokenlah pasu-pasu idur Dibata nari :

“Dibata, sumbul kemalemen ate e gelah si ncukupi keperlunndu guna

ndalenken si sentudu ras peratenNa. Janah Dibatalah erdahin i bas kam

arah Jesus Kristus gelah kam ngelakoken kai si ngena ateNa. Man

Kristuslah kemulian seh rasa lala” Amin.

P Amin… Amin… Amin… (iendeken)

.....ooo0ooo…..

Pdt. Tanda Pinem

GBKP Rg. Jl. Sei Batang Serangan