1

win u tdրt

WIN U TDEΓWT

2

« Nous naissons tous fous. Quelques-uns le demeurent. »

Samuel Beckett « En attendant Godot »

3

Asayes1 yura. Amerdul. Tifawt. Tafuyt ar d-tettali. Tazdayt yuli ugeḍrur tbedda g yir n ubrid g ur illi awed yan. Ikcem-d yan urgaz ilsan takustimt s ammas n usayes (seg tesga tayeffast) ibedd ddaw tezdayt. Isars tissufra-nnes ɣef yan iselli. Ku tikkelt iseksew tassaɛet-nnes, yasey allen ɣer ijgal. Ar itganna.

DANI Uress mani-t. Waqila isul iṭṭes, nekkin ar i-issa usemmiḍ g umerdul-ddeɣ. Is d-nziɣ, midd maḍleɣ allig izrey. I mek izrey, amek tetteggaɣ ad dduɣ ɣer lfilaj add heyyaɣ iwriqqen-inu. Ttuɣ ur seqsaɣ awed yan g iɣrem mantur ayed itetteffeɣ. Imaɣ allig ur seqsaɣ ? Awed nekkin itsent tikkal ! Igra diɣ aseksew ɣer tassaɛt-nnes. Netta ihezza-d iɣef yinniy yan uterras inmala-d (ikcem-d asayes seg tesga tazelmaṭ).

BIHI (Imel-t s uḍad ammi ira ad innaɣ) Mayed da tgannad ? Ha ! Ini mayed da tgannad da ?

DANI Ur tessind ad tinid « Tifawin », « Azul », « Bonjour » !

BIHI (Ammi ur as isella. Inmala ẓars) Ur ɣurrek tettafaɣ yan wagiṛṛu ?

DANI Ur da kemmiɣ !

1 La scène

4

BIHI

Kan wučči ?

DANI Ur da tettettaɣ ! (Ifesta Dani, ar iseksiw abrid.)

BIHI Tameɣra ayed d-kkiɣ ! Inɣa-i laẓ, iriɣ ad kmiɣ. Taddart taggug ! Ur ɣiyeɣ ad nn-lekmeɣ mek ur ččiɣ. Uran ifadden-inw !

DANI Ur iddi ka ! (Inmala Bihi ɣer Dani. Isnaɣes-t.)

BIHI Ssneɣ-k ! (Ur tt-degs yuwiy Dani.) Tellid awed keyyin ger williɣ istey Muɣa amm wulli, yawi-ten s iccki. Dani n Hennu ! (Iseksew tiseggwin-nnes ammi tkarent s medden. Ibedda, iseksew ɣer agdud2) Ad awen ggalleɣ ɣas netta. Ur i-tɛeqqaled ? Tsettu-ik Fransa ! (Iddem ar ittirir) A Fransa tiḥergit ag tamud … Awa tiḥergit ag tamud ! Wenna nn-iddann iɣer-d i wayeḍ ad nn-iddu. Awa ad nn-iddu ! (Ildid Dani tismaqqalin-nnes, isers-tent ɣef wanzaren-nnes)

DANI Amejjuḍ ! Ur k-ukizeɣ. Twessird bla luqt.

BIHI 2 Le public (qui assiste à la pièce)

5

Tamazirt-ddeɣ tessenkerd icibann i teslemyiwin, daccen a nekwni tuta tudert s tiqqeṛt. Addud ad ak ssitiɣ ifassen, ssudmeɣ-ak awed ayerri !

DANI Uhu ! Gwdeɣ ad i-takerd !

BIHI

Ur qqimiɣ da tettakreɣ ! Aɣuleɣ iɣef-inw. Tekka ɣifi. Dɣi da tetteggaɣ hill ammi mmuɛḍreɣ !

DANI

Daccen, ur ɣuri mayed tettakred ! Γas awal ayed sawleɣ !

BIHI (Irẓem ifassen) Iwa addud !

DANI Ur ḥmileɣ ad i-iṭṭas awed yan tifawt. Add tali tafuyt ukwan… (Ibbey awal. Iɣal is isella i udida n kra n ukameyyu.)

DANI Waqila netta aya ! Imaḍel-nn ass-a !

BIHI Mani wanna ?

DANI

Bu ukameyyu ittawin ɣer lfilaj.

BIHI Mayed da tgannad ?

DANI

6

U Tdeɣwt !

BIHI Annayeɣ-t g tmeɣra. Iswa-tt allig urda iseksiw mani g isrus iḍarren. Sawleɣ-as iɣal idd nekkin ayed igan legṛisun-nnes.

DANI (S taduyt) Mek iswa imkinnaɣ ur inni ad yiɣiy ad issudu. « Boire ou conduire, faut choisir » imkinna ittini rriklam.

BIHI Ur idd netta ayed issudun. Memmis dɣi ayed yumẓen adɣar-nnes.

DANI

Ayennaɣ ag imaḍel. Tasuta-ddeɣ tedda ɣer arwas. Ur tri ad tili tawuri. Ur tli awal. Ur tri ad tenker zik. Awiss mayed tra ?

BIHI

Awed memmis illa g tmeɣwra. Iswa-tt awed netta. Annayeɣ-t. Selleɣ-as allig inna i bab-nnes hat idda ad ikcem ɣer taddart ad igen imiq urta iddi ɣer lfilaj.

DANI

Iswa netta d bab-nnes ?

BIHI Ih, g yiwt talqerɛat !

DANI

Tasuta n tgira n ddunit ! Tennfel aya. Is ur illi kan yiwen yaḍen ilan akameyyu ar ittawi medden ɣer ssuq ?

7

BIHI Uhu ! Γas netta ayed illan. Imaɣ keyyin allig ur d-tuwiyed kan ṭṭumubil seg Fransa. Teffeɣ-d g luqt trid, tekcemd g luqt trid.

DANI Zriɣ-tt-nn. Daccen, ur asen igi i yiberdan amm wi ɣas akameyyu n U Tdeɣwt. Ṭṭumubilat n Fransa lqaqent. Amm tṛumyin. Ur ɣiyent i wanecta n ugeḍrur d uẓru. (Ifesta. Iga ammi da iswingim.)

BIHI Nniɣ-ak annayeɣ-t ar issa netta d bab-nnes. Ku yan s tebyirt-nnes. Ika-i agirru d walf frank. (Yusi iḍudan s anzaren-nnes ar ten-ikeṭṭu.)

DANI U Tdeɣwt ?

BIHI Ih ! Awa ɣas mer ufiɣ yan wagirru. Ad kmiɣ gneɣ ddaw tezdayt-ddeɣ ar ammas n wass.

DANI

Merday d-iddi hill. Ad heyyaɣ iwriqqen-inw af ad uɣuleɣ ɣer twuriwin-inw. (Iseksew ɣer ijgal. Irnu iseksew g tassaɛt-nnes.)

DANI

I mani g d-tettawin anect-nnaɣ ssan ?

BIHI Wenna iran ad isew iddu ɣer Tinɣir neɣ Warzazat yawid ayenna ira. Γas ad ilin idrimen. Nitni ɣursen akameyyu d

8

idrimen. Isinen jadarmiya d lbulis. Da ten sswan, aǧǧen-ten ad zrin.

DANI Ur d-yusi. (Iɣwejdem Dani ɣef yan iselli. Yumeẓ iɣef ger ifassen, iqqim. Bihi ar ikeṭṭu iḍudan-nnes. Ihezza-d Dani iɣef-nnes.) Ammi sellaɣ i kan uẓegga.

BIHI Sellaɣ-as awed nekkin.

DANI Netta aya ! Tannayed. Ar i-tettinid tannayed-tt ar issa. Ur iɣiy ad ibedd. Ur akw rint tkerkas ak ffɣent. Imaɣ keyyin ur teswid ?

BIHI Swiɣ ! (Ibedda Dani) Swiɣ atag allig i-iẓber. Ur ččiɣ aḍu. Da i-imerrey (ifest). I mer nman ɣer lfilaj ?

DANI Tmuyded, telluẓed, teṛmid, tirid ad diɣ teddud ɣer ssuq ?

BIHI Acku ur ɣuri mayed sskareɣ !

DANI Add ilkem U Tdeɣwt, neddu !

9

BIHI Ur ɣuri Frank bu uxbu !

DANI Ad fruɣ ! (Iɣwejdem Bihi ɣef iselli.)

BIHI Dduhdaɣ ! Aɣ settawil ad sgunfuɣ, nenker ad nn-neddu ɣer lfilaj s uḍar. Ur wala yaggwug. (Yannay abhaḍ inyadda ɣer wudem n Dani amm tmalut.)

DANI S uḍar ?

BIHI Tasurift ḍart tsurift ar lfilaj !

DANI Ugar n 60 kilumitr s uḍar g umerdul war aman, ɣef ubrid g ur izerrey ɣas yiwen ukameyyu. Bu ukameyyu iswa-tt allig ur issuddi dat-as. Is tennfeld ?

BIHI Γas nniɣ-ak !

DANI

Han tafuyt tulid. Tegra-d asidd-nnes azeggwaɣ ɣef wakal. Netta urta d-iddi. Ur inni ad isal iṭṭes. Axes ur izriy. Axes ur gineɣ allig t-zegleɣ.

BIHI Nniɣ-ak uhu. Seksew udem n ubrid. Ur degs izriy awed yan.

10

DANI Nniyt ayed tennid. Abrid-ddeɣ init wakal, iga ammi ur ǧǧin degs izriy awed yan ukameyyu aseggwas aya.

BIHI Kigan aya nn-txeddemd g Fransa ?

DANI Sin iseggwasen ayed ur kkiɣ tamazirt. Sin iseggwasen g usemmiḍ d uxub n waḍu g lamin (la mine). Ussan-a ayed d-aɣuleɣ acku ilaq ad heyyaɣ kan iwriqqen. Ttuɣ ur saqsaɣ is isul da izerrey bu ukameyyu da. (Inmala Bihi ɣer Dani.)

BIHI Nker ad neddu ! Ad nuɣul ɣer iɣrem.

DANI Uhu.

BIHI Imaɣ ?

DANI Ad gganneɣ U Tdeɣwt.

BIHI Idd s nniyt tiṛumyin … (ar as ittini ka tama n umeẓẓuɣ) Itḥi-t Dani.

DANI Da tesḍiḍiyed ! Matta uberduz-ddeɣ ? Tlid aḍu n iqbi. Γaleɣ is i-tennid tekki-dd tameɣra. Ukwan uǧǧan-k ad tekcemd ɣer agensu s lḥalt-ddeɣ ?

11

BIHI Matta tmeɣra ? Imaɣ mayed yuwlen ur i-iɣri. Matta iɣrem g tella ?

DANI Dɣik ayed i-tennid tekkid yat tmeɣra, tinniyed tt-dinnaɣ.

BIHI Midd degsen ayed annayeɣ ?

DANI

U Tdeɣwt !

BIHI Ur ssineɣ awed yan U Tdeɣwt ula awed yan U Ufrekla ilan akameyyu g iɣerman-ddeɣ akw n Tfilalt. Waqila tuwey-ak kan trumiyt anelli ar teshencired !

DANI Is da ɣifi tetteṣṣad ?

BIHI Tɣaled is i-tufed iddeɣ telsid takustimt n juj frank ? Iddeɣ tegrid tuɣmest n nneqqwert. Mer ak qellibeɣ idmaren ad nn-degsen afeɣ ṭṭambbu lliɣ n Muɣa isul izegzaw. Amm tgezzayt usar iseffḍen. Amm ismeɣ. Yusi-kwen, ikkes kwen i tmizar-nnun, itkur ẓarrun lkiran amm inuguḍen n tfaska. Ass-a tɣalem is tgam iregzen. Yiwen urgaz ayed illan g lqist-ddeɣ. Ayed tt-gan : Muɣa. Yuf is qqimiɣ g tmazirt-ddeɣ ittu rebbi ula i-iḍbeɛ Muɣa amm teddellaḥt. Ad nsegzil awal. Nekkin ak aǧǧeɣ. Hayyi ddiɣ. Qqim dinnaɣ amm wanuḥ. Ggann U Tdeɣwt ar dd-iddu, mek d-idda. (Yumeẓ abrid. Ika tiɣwerdin i Dani.)

12

DANI Ad i-taǧǧed ɣas nekkin da ! Uɣul-d aɣ-ak girru !

BIHI Ur t-yad riɣ !

DANI Iwa ini-i hill is izrey midd uhu !

BIHI Ismar wawal. Lmed ad tegganned. Anṣuf-issek g tmizar n uganni. Tin usselku. Tin ddu ar asekka. Uɣul-d tadeggwat. Ek-as talqehwat. Ssudem afus. Ih a sidi, ih a lalla. Wenna ɣur ur illi sidi-nnes ɣurs lalla-nnes. Ad ur tqejjamed afus k-iceččan. Igdi iddren yuf izem immuten. Ggann ! Dɣi add iddu. Ur inni ad imaḍel.

DANI Uɣuled ad neg atag !

BIHI Sut ɣas keyyin ! (Iseksew ɣer agdud inna :) Ira ad i-iseɣ s wagirru d walkis n watag imkilliɣ sɣan likubuy lizandyan s leqraɛi n lwiski.. (Iɣwejdem diɣ Dani ɣef iselli, iḥḍu abrid)

DANI Ur illi awed yan. Tafuyt taɣ akal. Tmenya telkem. Akameyyu ur izriy. Wa ad yili ijra-as ka. Ugar n ka. Ssuq ad yili da itmermuḍ s medden. Id lbiru reẓmen. Leqhawi da degsen tettufkant. Nekkin ɣwejdmeɣ ɣef iselli g umalu n tezdayt ar tgannaɣ. (Isella i kra n yiwen iddad. Ihezza iɣef, yaf-d yan uterras dat-as.)

13

ATERRAS Ur ɣurrek tettafaɣ yan wagirru d yan walkis n watag.

DANI Ur awed trid yat tberruyt n uraxsas s ifelfel, tadunt d tamart n umɣar d yat tzuḍa n usekkif ?

ATERRAS Ad ak ifek rebbi lxir ! (iɣwejdem ar itganna)

DANI Mayed da tgannad ?

ATERRAS

Atag, agirru d uraxsas !

DANI Is tɣaled id larmi di salu (armée du salut) aya ! Nker !

ATERRAS Bu Ikerkas !

DANI

Ur ɣuri mayed ak akkaɣ ! Matta tifawt-ddeɣ !

ATERRAS Sellaɣ-ak allig tsawled i Bihi ɣef girru d watag. Netta ur iri. Nekkin riɣten.

DANI

Ur ɣuri mayed ak akkaɣ !

ATERRAS Mayed da daddeɣ tesskard ?

DANI

14

Da tgannaɣ Bu Ukameyyu !

ATERRAS U Tdeɣwt ?

DANI Ih !

ATERRAS Trid ad izrey g ubrid-ddeɣ n wakal d iselliwen ?

DANI Abrid-a ayed ittawin ɣer lfilaj ! Midd zegleɣ ?

ATERRAS

(Iseksew s agdud) Anfal aya ! Sin iseggwasen aya ur izriy awed yan g ubrid-ddeɣ.

DANI Imaɣ ?

ATERRAS Acku hayyan abrid yaḍen. Sxatrent. Izrey ḍart taddart-indeɣ (imel-as tasga tayeffast).

DANI Nekkin da tgannaɣ U Tdeɣwt g ubrid immuten ur yad itekka awed yan. Aya ayed trid ad tt-tinid ?

ATERRAS

Tessaɣed.

15

DANI Nekkin lulaɣ g iɣrem-inn illan afella n tewrirt. Seg mayed suleɣ meẓẓiyeɣ ayed izerrey ukameyyu da, g ubrid-ddeɣ. Keyyin… (Yannay yan urgaz inid aɣyul, ikkad tanila-nnsen. Γas iẓra-t uterras irul.)

BU UΓYUL

Axes ur ak isxub umxib-ddeɣ aḍu. Hat ikka-as ka geras d leɛqel-nnes.

DANI

Uhu. Netta ira ad ikmey, nekkin ur ɣuri girru !

BU UΓYUL (Iseksew s agdud) Ur ɣurs girru ! Ar t-ittini s wudem-nnes azggwaɣ ! Riɣ ad iniɣ s wudem-nnes awraɣ ! Mayed aɣ igan g wudem-nnes ! Iwriɣ neɣ izggwaɣ, ur aɣ iddi ka !

BEERI Imaɣ ?

BU UΓYUL Ur tɣiyed ad tidired g tmizar amm ti bla tabaɣa. Amm tbaɣa amm yirden, amm waman (Ifesta, iga ammi da itxemmam) Tabaɣa terwas tudert ! Ini-i mayed da tesskared da ?

DANI

Da tgannaɣ U Tdeɣwt !

BU UΓYUL U Tdeɣwt ?

16

DANI Riɣ-nn ssuq !

BU UΓYUL U Tdeɣwt umẓent jadarmiya ayed i-inna yan urgaz acku ur iri ad asen ik 400 n waryal.

DANI Maka ur iqqimi da izerrey g ubrid-ddeɣ ayed i-inna uterras d-tufid. Imaɣ allig irul iddeɣ k-yannay ?

BU UΓYUL

Wennaɣ ur issin mayed itteqqis. Innfel igellin sin iseggwasen aya. Nnan-ak tsečča-as kan taɛrabt imkuraren g usekkif.

DANI Reɛbaɣ !

BU UΓYUL

Rra … (Iwta urgaz aɣyul imun d ubrid-nnes bla ad irnu kan wawal yaḍen. Immatter-t Dani. Argaz iney aɣyul s ḍart.)

DANI Mayed yaɣen tamazirt-ddeɣ ? Is akw ican ka medden-ddeɣ midd nekkin a mi-uyellan igḍaḍ. (Iseksew g tassaɛt.) Lɛecra. Isul urta izriy. Waqila ad uɣuleɣ ɣer taddart, ssketreɣ taserdunt, dduɣ s lfilaj. Maka ur nniɣ ad nn-guluɣ ard teɣley. (Iɣwejdem ɣef iselli. Ar itganna. Tezrey ɣifs yat tmeṭṭuṭ d-yusin tazdemt n ifessiyen, tseksew digs. Imiq tbedd. Ibedd awed netta.)

17

DANI

Ur trid awed kemmin yan wagirru ?

TAMEṬṬUṬ Ssiḍan. Ad aɣ yari rebbi i tennfel. Axxid aterras yusi-t ungi n timmuɛḍert. (Tesserfa tawada. Teggwed.)

DANI Anfal ! Iwa han tameggarut. (Ira ad iɣwejdem, yiselli i Bu Uɣwyul yaɣul-d. Yannay-t allig d-iggez seg uɣyul-nnes.) Imax allig d-yaɣul ?

BU UΓYUL (Ikcem-d s asayes) Ur ɣurrek tettafaɣ kan girru ?

DANI Ur ɣuri tabaɣa, maka ɣuri aluqqiden ! Mer ufiɣ ad kmiɣ awed nekkin yan wagirru (Yusi iḍudan s imi-nnes ig ammi da ten-ikeṭṭu). Yiwen «Gulwaẓ » !

BU UΓYUL Gulwaẓ ?

DANI Ifessus amm walim.

BU UΓYUL Win twetmin ayennaɣ. Yuf is da tkemmid lkiḍ n sskwer neɣ alim ula Gulwaẓ.

DANI Matta tbaɣa tetnadad ?

18

BU UΓYUL

Kaẓa Spuṛ neɣ Markiz !

DANI Ur da kemmiɣ Kaẓa. Da i-tesduferru idmaren ar tsussu tuɣmas.

BU UΓYUL

Acku ur tgid argaz !

DANI Ur giɣ azgaz ?

BU UΓYUL (Ammi ur as isella) Nekkin itsent tikkal ig ur ɣuri idrimen neɣ i-inɣa yiɣef, ad ak ggalleɣ ar da kemmiɣ imezran.

DANI Ad ilint turin-nnek rwasent areḥbiy. Tiberkanin amm ugwlim. Ad tilid aḍu n iɣwyal mi tekmid imezran.

BU UΓYUL Tikkal. Yuf wenna igan aɣyul g tmizar-ddeɣ, ig ammi ur yukiz amya. Awed iɣef n tissegnit. Isseknu iɣef, imun d twili. Tili ameksa neɣ ur t-tli.

DANI Iɣef d-iffɣen ad ityabbay !

BU UΓYUL Ad ittuknaf !

DANI Ad ixnunnes g wakal !

19

BU UΓYUL

Ad yaccek unaɣiz-nnes !

DANI Ad tt-ttun imawen !

BU UΓYUL

Ad itettusfeḍ seg twengimin.

DANI Ammi ur ǧǧin ikki !

BU UΓYUL Ammi ur ǧǧin illi.

DANI Ammi … (iseksew ɣer agdud, ifest.)

BU UΓYUL Mek ak isella umɣar ad ak kksen tabasbburt-nnek. Ur teqqimi Fransa ! Ad tekked itsen wussan ger ifassen-nnsen. Ak sennemrurin.

DANI Ifassen n mi ?

BU UΓYUL Win winna ur ittubdaren. Ur ɣursen ismawen ula udmawen.

DANI Ad aneɣ yari rebbi !

20

BU UΓYUL Awed rebbi ur ɣurs mayed issker. Wi ur t-ssinen. Ula ten-issen. Seqsa-i nekkin issnen. Ak amẓen gren-k s sbitar n imeɛḍar, ad ak seǧǧiwnen lekninat ard tuɣuled amm waddellaḥ. Ur tennid ad tisined awed mayed temsed ula mani g tellid. Ad laḥk.

DANI Tekka ɣifek a yigellin.

BU UΓYUL (Ammi ur as isella) Ur rin ad jjujin awed yan. Da tnadan ɣas mayed ssenfalen. Ak ssuɣlen amm kra n igdi neɣ aɣyul. Cca tbedded, rra teddud. Ad teshiwwid bla ad tirid. I yučči, ula mayed ak nniɣ ɣef wučči aɣ akkan ! (ifest) Ur ɣurrek tettafaɣ kan wučči ?

DANI Aɣrum n wass naṭ !

BU UΓYUL Takustimt, takrabaṭ d uɣrum n wass naṭ ?

DANI Aya ayed illan.

BU UΓYUL Ur ɣurrek girru ula učči. Mayed ɣurrek ? Takustimt ? Wenna k-yannayen s tkustimt d tekrabaṭ d wareksen iberkanen ammas n umaɣa-ddeɣ ad yiɣil idd kan unfal d irulen seg sbitar.

DANI Lsiɣ imki acku riɣ ad dduɣ ar lbiru.

21

BU UΓYUL Tɣaled idd ad deg k-hezzan allen acku telsid takustimt ?

DANI I mayed tɣaled ? Hat Aṛmani aya ?

BU UΓYUL Wi ur ssinen Aṛmani ula rremmani. Mek trid ak seksun ilaq ad tɣerded id 400. Yiwet tama n tayeḍ. Meqqar telsid azeggwar neɣ tabarda, ɣas ad kḍun aḍu n idrimen ad uɣulen ammi lan tawuri-nnsen. Ak raren d-bnadem. Ad ak llɣen areksen.

DANI (Iseksew areksen-nnes) I mek ur kḍin aḍu n idrimen ?

BU UΓYUL Ak ttun !

DANI

Ad i-ttun ?

BU UΓYUL Uɣul-d ssimana d-iddan ! Neɣ d-iffeɣ ka degsen ẓarrek nnican yini-ak « Ek-id lqehwa, hayyaɣ-ak tiwriqqin-nnek », ɣiyen awed ad ak inin is ran lḥelwa.

DANI Ayennaɣ as d-uwiɣ taxenciyt tameẓẓant n lḥelwa g tissufra-inu. Seg ccawec ar leqqayed, ad akw mḍin lḥelwa n Fransa.

BU UΓYUL Riɣ ad mḍiɣ !

22

DANI (Iṭṭas tissufra-nnes) Trid ad temḍid ?

BU UΓYUL Nurzeɣ. Manekt aya ur ččiɣ kan ḥalawa inmen. Iṭṭfen iɣef-nnes.

DANI Ad ak tt-keɣ (ildid yiwt seg tissufra-nnes, ik-as-tt, iqqim ar degs iseksiw).

BU UΓYUL

Ta ? Da tettunza g ssuq n Tinejdad. Awed icirran meẓẓiynin ur tt-ḥmilen. Ugin-tt.

DANI Imaɣ ?

BU UΓYUL Acku ur degs mayed itetta awed yan. Da tetettemra g tuɣmas amm ulǧǧiḍ. Nenurez ad narem tin Fransa. Nker ad neddu s iɣrem. Ad ak mleɣ lḥelwa ilaq ad tseɣd.

DANI Ur ɣiyeɣ ad mmectgeɣ seg udɣar-ddeɣ !

BU UΓYUL Tettuten-ak degs wakwmamen ?

DANI Da t-tgannaɣ !

BU UΓYUL Mani wanna ?

23

DANI

U Tdeɣwt !

BU UΓYUL Mer lliɣ g udɣar-nnek add awiɣ yat ṭṭumubil amm tiddaɣ n iṛumiyen. Tin imerdal d idurar. Ad ssnekreɣ ageḍrur g iberdan-ddeɣ. Ur nniɣ ad gganneɣ awed yan memmis n tmeṭṭuṭ ig U Tdeɣwt neɣ U Γris. Ad geɣ win iɣef-inw.

DANI Af ad ad tged win iɣef-nnek ilaq ad tilid iɣef-nnek. Nekkin ad gganneɣ U Tdeɣwt.

BU UΓYUL Waqila tesduhda-k tafuyt (inmala ẓars isers-as afus ɣef uyerri) Tella degk tawla.

DANI Irɣa iɣef-inw !

BU UΓYUL Kkes tafista-nnek tsud kan waman. Neɣ sew kan Uspru neɣ Kalmin (Calmine).

DANI Mani g trid ad afeɣ Asepru ?

BU UΓYUL

Nniɣ is illa g tissufra-nnek (ifest ar iseksiw agdud). G imerdal-ddeɣ, ur teswi tudert n medden awed akwmam. Irban tsul da ten-tneqqa tawla. Ussan-a snat terbatin ayed immuten. Ini-i imaɣ ?

24

DANI Imaɣ ?

BU UΓYUL Tiɣardmiwin !

DANI Imaɣ ad ur tent awin ɣer sbitar ?

BU UΓYUL

Aḥanu n tarda n imettinen ayed illan g iɣrem, ur idd sbitar. Ur degs ɣas asafar azeggwaɣ. Tenɣa-k tdist ? Asafar azeggwaɣ. Tawla, taruẓi, iɣef, amraz … akw imuḍinn ɣursen yiwen usafar. Azggwaɣ d stilu.

DANI Stilu ?

BU UΓYUL Af ad aznen s Tinejdad neɣ Tinɣir add tekked fermasyan. Ur tennid ad nn-tawḍed ard immet unna itgannan.

DANI Γiyeɣ ad mmteɣ da ?

BU UΓYUL

Tɣiyed ad temmted s tawla ammas n umerdul-ddeɣ urta izriy U Tdeɣwt.

DANI Γas da teshencired ! Tessenɣid-i iɣef s wanecta n wawal. Ur ssineɣ makwen yaɣen g tmazirt-ddeɣ. Wenna teṭṭasd ikectu-d ɣifk ar ak itteteqqis. Wenna tseqsad iqqis-ak tudert-nnes, ixittan d ikerfisen. Wenna g tseksud isiwel-ak ɣef usselku, tittut, tafuyt ineqqan iɣwyal, imerdal war

25

aman, war tudert ula almu, id lbiru iseɣlacan, iberdan ur ten-igin, imnebḍen imazdaren, imɣaren ibelhasen irwasen iyḍan, id sbitar g ur llin isafaren, ifremliyen ula iḍbiben, iɣerman war trisinti, war aman, war afraḥ, irban war likul, war areksen, iɛerrimen war asirem, tiwetmin ur itgannan ɣas ad awlent af ad iɣiyent ad ffɣent tamazirt, tislemyiwin neqqant tɣardmiwin, tiwetmin ittemtaten ig da ttarunt. Wenna teggwid issengey asif n mkerḍul.

BU UΓYUL Trid ad ak siwlen ɣef ileǧǧigen, tafsut, tayri. Tifidi ayed d-tessenker tmazirt-ddeɣ g wulawen n medden d ɣef tdiwwa n iɣwyal d iserdan. Awed yan as-inejmen.

DANI Ur idd tamazirt. Winna degs inebḍen ayed as iččan udem, ssummen-as iɣsan. Maka (iseksew s agdud) yiwt tɣawsa ayed i-isserɛaben. Kud tettinin tenɣa-ten tmara d xub n waḍu, bennun timezgidiwin anect n ddunit. Ad tinid tifidi ɣef tadawt n iɣrem. Ur ǧǧin nnin : Nkerat ad nebnu yat likul, yat taddart n idlisen. Uhu, Timezgida a ɣef asen iḍra wul. Iwa merday kwen akw aɣent.

BU UΓYUL Ad ẓẓallen ttun ! Amm tmezgida amm likul. Da kerrzent tittut. Da tt-sselmadent. Da seffḍent inelliten d twengimin ẓẓunt degsen iɣed d usirem.

DANI Asirem. Wenna issirimen ikna. Asirem d-aganni. Wenna itgannan da itteqbal ayenna ɣifs ikkan d waddad g idder. Ar ittini : Iwa kan wass add iddu … add tneqqer tafuyt meqqar iɣwezzif yiḍ … d kigan n iwaliwen yaḍen isselmaden kennu, ar sganen medden.

26

BU UΓYUL Iwa mek iga usirem takerkast, hatin awed keyyin da teskirkised ɣef iɣef-nnek. Da tessirimed ad izrey U Tdeɣwt.

DANI Tidet !

BU UΓYUL

(Inyadda ɣef usayes seg uyeffas ar azelmaḍ, yuɣuld). Tessend-tt ?

DANI U Tdeɣwt ?

BU UΓYUL Is t-tessend ?

DANI Ur ǧǧin t-annayeɣ. Ur ssineɣ mani g as llant wallen. Mer izriy dati ur nniɣ ad tt-akzeɣ.

BU UΓYUL Meqqar ur t-tessind, teffeɣ-dd seg taddart-nnek, af ad tt-tegganned.

DANI Acku nnani-i hat da izerrey ku yass g ubrid-ddeɣ.

BU UΓYUL Ukwan tamned-tten ?

DANI Imaɣ ad ur ten amneɣ ?

27

BU UΓYUL Ǧǧin tannayed akameyyu-nnes ?

DANI Ur ǧǧin !

BU UΓYUL Tessend amek iga ?

DANI

Ur ssineɣ !

BU UΓYUL Tessend iɣrem g izdeɣ ?

DANI Ur ssineɣ !

BU UΓYUL I Mayed tessend ?

DANI Amya !

BU UΓYUL Ad tilid tessend ka ?

DANI Ssneɣ is nn-riɣ lbiru. Ssneɣ awed idd ɣas U Tdeɣwt ayed iɣiyen ad i-yawi.

BU UΓYUL Ssektey-id isem-nnek !

28

DANI Ur ak t-nniɣ ! Nekkin Dani n Hennu.

BU UΓYUL Ek-id yan wagirru a Dani. Hat inɣa-i iɣef s tfelsuft-nnek.

DANI Ur ɣuri girru, maka ɣuri lḥelwa.

BU UΓYUL Iwa efk-id snat. Ifadden-inu da tettergigin s laẓ. Yiwt ad tt-ččeɣ, tayeḍ ad tt-fkeɣ i uɣyul-inw. Da as ttiɛjib lḥelwa kigan meqqar da as treẓẓa tuɣmas. Aɣulent akw d- tiberkanin. Aɣyul-inw da as ittiɛjib awed ccukula. Aɣyul n temdint !

DANI Γuri awed aɣrum n wass naṭ !

BU UΓYUL Ur da tettettaɣ aɣrum insan !

DANI Maqqar k-yaɣ laẓ ?

BU UΓYUL Ikkes-it uḍbib.

DANI Ikkes-as učči n uɣrum ?

BU UΓYUL Aɣrum insan !

29

DANI

Aḍbib ayennaɣ ! I girru insan ?

BU UΓYUL Awed netta. Ayenna akw insan ugiɣ-t.

DANI Awal ak qqiseɣ, insa awed netta.

BU UΓYUL Ayennaɣ as i-inɣa yiles (ibedd), d wancucen, d iɣef, d ugerḍ. Awal insan iɣiy ad i-ineɣ. Digi lalirji n wawal insan !

DANI

I wenna irɣan ?

BU UΓYUL Da t-inn ssiwiḍeɣ i umɣar ! Ur da inessa g imi-inw. Awal irɣan amm uxwedmiy. Amm tmessi. Mek iqqima ard issker adɣar g imi-inw neɣ g ugerḍ-inw ad i-ineɣ. Awal amm wa, slutef-t, ssufeɣ-t.

DANI (Ika-as lqerɛa n waman) Aɣ-ak ssired imi-nnek seg wawal insan. Ssired awed timeẓɣin-nnaɣ as-isellan. Af ad tidired. Ur ilaq ad temmted tsaled tmeẓẓiyed.

BU UΓYUL Ad ɣifi inin medden « Igellin, inɣa-t wawal » ! (issared udem, iḥrit s ufus n tmelsit-nnes) Ahya ur iri Muɣa add yuɣul ad diɣ istey iɛerrimen. Hat ggudin ! Ran akw ad ddun.

30

DANI Ur iɣiy !

BU UΓYUL Ur yad aɣ iḥmil ? Nurmal, degneɣ kigan n txendallast !

DANI Uhu. Immut !

BU UΓYUL

I yiɛerrimen-ddeɣ t-itgannan add yuɣul ?

DANI Wenna immuten hat immut ! Ur iɣiy add yuɣul !

BU UΓYUL (Iɣwejdem ad ittru) Ur telli kan Tamuɣat ? Ad tawi tiwetmin. Hat krefsent, ixub-asent waḍu g gar tamazirt-ddeɣ. (Ibedda, ineqqeṛ akal ittemran g tmelsa-nnes) Nker ad neddu. Ad nn-nesselkem awal. Muɣa Immut, awed yan t-issnen.

DANI Ur ɣiyeɣ !

BU UΓYUL Imaɣ ?

DANI Da tgannaɣ U Tdeɣwt ! Gwdeɣ ad fɣeɣ adɣar izrey. Daccen, seksew mayed d-ikkan abrid. Awiss mayed ira. (Beddan. Ikcem-d yan urba ameẓẓan s asayes.)

DANI

Mayed trid ?

31

ARBA

Idd keyyin ayed igan …

BU UΓYUL Netta ayed da itgannan U Tdeɣwt.

DANI Fest. Aǧǧ arba ad isiwel.

ARBA U Tdeɣwt ayed id-yuznen.

DANI I mayed ira ?

ARBA Inna-ak hat ur inni ad imaḍel. Qqen ad izrey.

BU UΓYUL

Mantur ?

ARBA Ur ssineɣ. Ur ɣuri aneɣmis-nnaɣ !

BU UΓYUL

Asekka. Ayyur yaḍen. Aseggwas yaḍen. Usar ! Mantur ?

ARBA Ur i-inni. Azerruy ad izrey.

BU UΓYUL Imkinna izrey wass-ddeɣ !

DANI

32

(I urba) Tessend-tt ?

ARBA Yah ! Ameksa-nnes ayed giɣ.

DANI Imaɣ allig k id-yuzen ?

ARBA Acku issen is da t-tgannad g udɣar-ddeɣ.

DANI Amek iga allig issen ?

ARBA Nniɣ-as-t. Annayeɣ-k tifawt n wass-a, ssneɣ idd netta ayed da tgannad.

DANI Mani-t dɣi ?

BU UΓYUL

Da ɣifek iskirkis umeksa-ddeɣ (yuzen afus s akal ad yasi tiselli, irul urba.) ! Ur ḥmileɣ tikerkas d ikerkasen. Arba-ddeɣ da iskirkis.

DANI

Mayed ak t-innan ?

BU UΓYUL Ẓriɣ-t g wallen-nnes. U Tdeɣwt ur t-ssinen iwessaren daccen a yirban n wass naṭ.

DANI

33

Waqila nniyt ayed da tettinid. Maka netta inna-aɣ iga ameksa-nnes.

BU UΓYUL Ur i-tumind, tamned arba ameẓẓan. Ur inni ak izel ɣas nniyt-nnek. Texxa nniyt ! Arba neɣ awessar. Ikerkas ! Arba ur issin awed mani g tella Tdeɣwt, daccen ad yisin imezdaɣ-nnes. Ad ak iniɣ tayeḍ : Ur iɣiy ad ig ameksa-nnes acku U Tdeɣwt ur ɣurs ulli ula tiɣeṭṭen.

DANI I mayed ɣurs ?

BU UΓYUL Ur ssineɣ !

DANI (Iɣwejdem) Tɣiyed ad teddud s iɣrem ad aɣ d-tawid kan girru ?

BU UΓYUL Han awal, ur idd amm win umeksa bu tkerkas (yazen afus ad yameẓ idrimen.)

DANI Iwa ddu !

BU UΓYUL Awid idrimen. Is tɣaled is da da ittufka fabuṛ. Ur ɣuri awed frank. (Ika-as idrimen, iffeɣ Bu Uγyul asayes. Iɣwejdem diɣ Dani. Iddem ar iseffeḍ akal ɣef warksen-nnes iberkanen. Ikcem-d yan urgaz bu ujellabiy umlil ar itettey g usayes.)

34

AGWERRAM Γaleɣ is kḍiɣ aḍu n imerɣan !

DANI Ka da ishenciṛ s war girru, ka ikḍa imerɣan. Hat amerdul aya. Mayed teččam ass-a ? Mayed temsed keyyin ?

AGWERRAM

Nekkin Agwerram ayed giɣ. Ur ččiɣ aḍu (iseksew s tissufra n Dani) Liɣ azgen g uyenna akw illan g tissufra-ddeɣ.

DANI Γas azgen ? Nnan imezwura « Ayenna yannay ugwerram winnes ayed iga, ayenna ur yannay ila degs azgen ». Keyyin trid amur g uyenna ur igin winnek ? Is da tnadad awal ?

AGWERRAM Wenna tt-issekren isxiter-tt. Nekkin riɣ azgen.

DANI Ad nn-tenmilid tissufra-inw ak sgunzreɣ tged agwerram, U Merɣad neɣ awed U Tdeɣwt.

AGWERRAM

Mayed illan g tissufra ?

DANI Aɣrum abazin.

AGWERRAM

Asit ! Ur yad tt-riɣ !

35

DANI Ad degs teččed azgen ccil-ak ! Trid azgen, ad tt-tawid.

AGWERRAM

Uhu. Riɣ imerɣan. Da keṭṭuɣ aḍu-nnsen !

DANI Dɣik ayed izrey umɣar, inna-i idda s kra n tmeɣra.

AGWERRAM

Mani ? Γur mi ? Mantur ?

DANI Mek trid ad rareɣ ɣef iseqsiten-nnek, teččed azgen g ubazin.

AGWERRAM

Gwdeɣ ak tut tunant n ugwerram !

DANI Imaɣ tsul kan tunant yugren taddeɣ ? Inna-as uɣyul : « Rnud awed azreg. Ammecteg ur yad as ɣiyeɣ » Igwerramen amm keyyin ayed d-isaggzen amuttel ɣef tmazirt-ddeɣ.

AGWERRAM

Mani g tella tmeɣra ? Matta iɣrem ? Riɣ imerɣan. Nitni ayed igan tabaɣa-inu. Ig ur ten-ččiɣ da digi tettaweɣ tfekka, da tettiriɣ ad nnaɣeɣ, da tdahdaɣ. Ig degsen suyeɣ iḍudan da tettakiɣ d usgunfu irrus afella n wul-inw. Imkinna ran gint imerɣan. S uksum, bla aksum. Γas ad gen imerɣan. Imerɣan, imerɣan ! (iga ammi da asen iqqwar. Kud tt-ittini, itettey g usayes.)

36

DANI Tunant aya ! Anecta akw ɣef imerɣan ? I seksu ?

AGWERRAM

Ad ur i-tettinid gan awed seksu !

DANI Imerɣan d seksu. Aya ayed akkan i medden ittuɣran. Imaɣ ɣran-ak ?

AGWERRAM

Awed yan ur i-iɣri. Maka ig iga ka tameɣra da ittisin idd ad iliɣ. Da keṭṭuɣ aḍu n lidam nekreɣ ẓars.

DANI

Keyyin ayed igan muc ! (s taḍsa)

AGWERRAM Nekkin ! Tessend isem-inu ?

DANI

Keyyin tetyassned kigan. Mayed ur issinen muc ? Bu Imerɣan !

AGWERRAM

Ma ɣur imerɣan ?

DANI : U Tdeɣwt ayed inna umɣar ! (irul ugwerram, iffeɣ asayes)

AGWERRAM

Imerɣan ! Imerɣan !

DANI :

37

Reẓmen medden imawen-nnsen g tmazirt. Ur yad ggwiden !

BU UΓYUL (d-yaɣulen)

Ur yad ggwiden i mi ?

DANI Uɣul-id a yawal-inw !

BU UΓYUL

Awal amm ifiɣer. Ig d-iffeɣ urda ittuɣul. Skuḥḥ-t-id ! Hat imi ag akw llant.

DANI

Γas ar swingimeɣ. Nniɣ-as ur yad qqimin medden da regglen imawen-nnsen.

BU UΓYUL

Ayennaɣ ag degsen zedɣen yizan !

DANI Nnan-as i ufeṛṛan mania k d-ikka wafa. Inna-asen imi-new.

BU UΓYUL

Memmis n ifesti d-awal.

DANI Memmis n wawal d-ifesti.

BU UΓYUL

Qqen imi-nnek, mun d uḍar-nnek

DANI

38

Qqen aḍar-nnek, mun d imi-nnek !

BU UΓYUL Icekkamen n umexzen ffren g tmalut n waɣwyayen.

DANI

Igidar lan imeẓɣan !

BU UΓYUL Ur da ibezzeg ubaw g imi.

DANI

Awal amm wuccen. Rẓem-as ittec-k !

BU UΓYUL Awal amm tmessi. Amm uxwedmiy.

DANI

Wenna ifestan injem.

BU UΓYUL Wenna inejmen ifesta.

DANI

Assa win iwaliwen !

BU UΓYUL Asekka win ifesti. Ahya ! Ur tennid mayed nnan.

DANI

Awed yan innan. Awed yan isawlen. Iẓil useggwas. Neǧǧiwen anẓar. ǧǧiwnen wactal. Medzent wulli d tiɣeṭṭen. Ur aɣ ixeṣṣa waḍu.

39

BU UΓYUL Ad ak t-ig rebbi d-amuttel. Wenna ak isellan ad yini nezdeɣ g tgeldit n Ddanimark. Anẓar ur d-yuggi tamazirt seg lli. Actal ikkefruri s fad. Ur neǧǧuwin awed aɣrum. Ixub-aɣ waḍu. Nenurez g mayed igan ka. Nekwni hat ur akw namu !

DANI

Iwa ddu ar ass g tessend is tamud tuɣul-dd neɣ tulid s Tmesna ad tcetkad.

BU UΓYUL

Urta i-tennid mayed nnan !

DANI Qqimiɣ ass akw mayed ila g tafuyt ɣas nekkin. Da sawaleɣ d iɣef-inu.

BU UΓYUL

I mayed ak ittini yiɣef-nnek ?

DANI Is ilaq ad dduɣ s iɣrem.

BU UΓYUL

Γas aya ?

DANI Mek ur i-tumind tseqasad iɣef-inw. Hakin hatin (imel-as iɣef-nnes)

BU UΓYUL

Axes ur ak inni ka yaḍen, teffer-tt ɣifi ?

40

DANI Imaɣ is innfel. Netta da ittiri ifesti. Ikna, ifest. (Ibedda Dani, isnem tafistat-nnes, iddu ar ammas n usayes iddeɣ isella i yat tkabart ar tettirir. Iṛṛeẓ tameẓẓuɣt.)

TKABART Ut-at s ufus tutim s uḍar tinim s imi iḥya lmalik. Iḍra uduku, asi-t a Ḥbi, kkenn ḍari s imi n lbiru, tinid s imi, iḥya lmalik. Utat s uḍar …

DANI Matta taqqwurt-ddeɣ ?

BU UΓYUL Yat tkabart ayed itettiriren. Tumeẓ abrid ɣer lfilaj. Riɣ ad idsen muneɣ.

DANI Mani girru ?

BU UΓYUL

Tergel ṣṣaka. Amezzenzu imun idsen awed netta. Ad teddud ?

DANI

S uḍar ?

BU UΓYUL Imaɣ is ur tgid argaz ?

DANI Tafuyt da tɣelli. U Tdeɣwt riɣ ad tt-gganneɣ. Akwen ittec yiḍ g umaɣa ur llin waman, ula asidd. Ad degs texlum. Mecta as tellam ?

41

BU UΓYUL Axwemmic n medden. Nker mun idneɣ. Ad nameẓ abrid, nger izlan. Ur nenni ad nakey d iɣfawen-nneɣ ard nn-ngulu.

DANI Imaɣ allig nn-tram lfilaj ?

BU UΓYUL

Ur tessind id ɛid lɛerc asekka.

DANI Imaɣ aɣulen da t-tetteggan diɣ ?

BU UΓYUL Asekka ayed tella lficṭa dat lmarci. Ad diɣ akw tessidd tmazirt. Ad neddu add nekk. Ad niẓir ccixat da tettirirent, ar ceṭḥent. Ad nerceq acku nezwa, tneɣ-aɣ taɣart. Ad nekmey, nsew nettec. Tessend ig tella lficṭa, da tettekkureɣ axriḍ s lbunat. Ass g ur ufiɣ girru, kmiɣ-tent.

DANI Ur ǧǧin kkiɣ lficṭa-nnaɣ !

BU UΓYUL Iwa nker. Ad yili U Tdeɣwt illa-nn dinnaɣ.

DANI Ur nniɣ ad ẓars dduɣ !

BU UΓYUL

Tabbant ! Utat s ufus tutim s uḍar… (Iffeɣ asayes)

42

Isul Dani ibedda, ikcem-d umɣar.

AMΓAR Keyyin diɣ aya ? Taɣul-dd ?

DANI Ih, aɣuleɣ-d seg Fransa. Mayed temsed ?

AMΓAR Annayeɣ-k ass-naṭ tɣwejdemd g udɣar-ddeɣ ar tgannad kan yiwen.

DANI Tifawt n wass-a ayedd ddiɣ. Waqila kan yiwen yaḍen ayed tannayed ?

AMΓAR Amɣar n iɣrem ayed giɣ ! Ssneɣ mayed akw ittejṛun g iɣerman-ddeɣ. Ssneɣ mayed itgannan d mayed da tgannan. Ass-naṭ, tellid da. Nurzeɣ ad isineɣ mayed da tgannad seg wass-naṭ.

DANI Da tgannaɣ U Tdeɣwt ad izrey !

AMΓAR I mek ur izriy ?

DANI Uɣuleɣ-d asekka. Iqqen-inn lfilaj !

AMΓAR

43

I mek ur d-iddi asekka ?

DANI Uɣuleɣ-d nnif n usekka.

AMΓAR Ad nn-ssiwḍeɣ awal i umexzen !

DANI Imaɣ mayed ssekreɣ ?

AMΓAR Tameskanit3 aya !

DANI Γas nekkin ammas n umerdul g yir n ubrid g ur izerrey awed yan. Tameskanit ? Γef mi ? Imaɣ ?

AMΓAR Kraḍ wussan aya tbeddid da. Ku yass ternu-dd kan tɣawsa. Yiwen wass tuwidd aman, wayeḍ aberrad n watag, taserkamt n waman, aluqqiden, talkaccat. Ass-a tuwidd taqiḍunt. Asekka tzedɣed da. Nnif, tinid-aɣ iga winnek.

DANI Mani taqiḍunt d-uwiɣ ? Daccen nekkin da tgannaɣ U Tdeɣwt. Riɣ-nn lfilaj. Mek ur izriy ass-a uɣuleɣ-d asekka. Amerdul-ddeɣ win teqbilt ayed iga. Ur igi winnek ula iga win umexzen.

AMΓAR Annayeɣ medden da tbeddan, zzrin ass ddaw tezdayt. Maɣef da tsawalem ?

3 Manifestation

44

DANI

Awi-tt g iɣef-nnek. Mek trid ad tisind maɣef da sawalen, tɣwejdmed awed keyyin ddaw tezdayt af ad tisellid.

AMΓAR Γuri tawuri. Ur sulaɣ awal.

DANI Awal ayed igan tawuri-nnek. Da t-tettawid isul irɣa ar tt-tsuddmed g umeẓẓuɣ n leqqayed. Awal as tedderd. Netta ak-iseččan. Netta ak-isswan. Netta as tellid. Netta ak-imezlen. Tacekkamt ak issaɣulen d-argaz. Axendallas. Amazdar.

AMΓAR Ameẓ imi-nnek !

DANI Aqerqaṛ ! Ddaw akw medden. Ur da ak ibezzeg ubaw g imi.

AMΓAR Ad ak ggalleɣ a mer ur ixater wudem n bab-nnek ɣuri, ssiwiḍeɣ-k-inn i lbiru, reggleɣ ɣifk s ufus-inu tiflut n tebniqt. Ad ak ikkes umexzen tabasbburt-nnek. Ad tuɣuled takessa mek tt-tufid. Asekka, ad ur k-id ttafaɣ da !

DANI Mek ur uzriy ass-a add uɣuleɣ asekka.

AMΓAR Mek teqqimid da ad ak d-awiɣ imxezniyen.

45

DANI Imaɣ ?

AMΓAR Azref aya !

DANI Azref n mi ? Nekkin da tgannaɣ akameyyu. Ur riɣ awal. Ur ukireɣ, ur nɣiɣ.

AMΓAR Keyyin tbeddid acku trid ad tinid i medden hat ur ɣurreɣ abrid, hat nettuselka, netyattu, issatem-aɣ umexzen.

DANI Anect-nnaɣ akw !

AMΓAR Keyyin da tetteggad sseyasa !

DANI Nekkin ɣas da tgannaɣ.

AMΓAR

Aganni sseyyasa ag yamu. Awal n leqqayed aya.

DANI Iwa mayed trid ad tt-ssekreɣ ?

AMΓAR Ad ur tɣimad g yiwen udɣar. Ig teddid, tuɣul-dd.

DANI Af ad i-tinid tgid tawada. Ur idd yad tameskanit.

46

AMΓAR Mek llan ugar n sin hat tawada. Hat degs sseyyasa imkinna-ak nniɣ.

DANI Tenna nessker dɣi nili g ufus. Mek nɣwejdem g umalu yini-i sseyyasa, mek beddiɣ neɣ ddiɣ hat sseyyasa. I mek ɣerdeɣ ɣef tadawt ? Imki ? (Iɣerd ɣef wakal, allen g yigenna)

AMΓAR Trid ad tinid, inɣa-aɣ umexzen ? (Iɣwejdem. Yusi Dani taqamuct d-ikkes nnig wafa.)

DANI Ad tsud yan walkas ?

AMΓAR Rrecwa ayennaɣ !

DANI Is d-truled seg 36 midd imkinnaɣ ayed tgid ? Nekkin hat urta ukizeɣ mak yaɣen. Γwejdem ad tsud atag.

AMΓAR Awal da i-izebbeṛ. Da i-isenbuttul. Ira add iffeɣ. Ilaq ad nn-yaweḍ. Yaɣ amm tirrgin. Mek ɣifs swiɣ atag, ad tt-sexsiɣ.

DANI Amek tetteggad ad nn-tesselkemd awal ?

AMΓAR Da tetnuyeɣ akameyyu.

47

DANI Amm nekkin amm keyyin. Da akw netganna U Tdeɣwt g tmazirt-ddeɣ. Qqim. Ameẓ akal tsud yan walkis. Ad neggann s sin. (Iɣwejdem umɣar. Yumeẓ alkis, isxwabb.)

AMΓAR Mani g tegnid iḍ izrin ? Ddiɣ-d iḍ n wass-naṭ ar ddaw tezdayt ur k-ufiɣ.

DANI Gniɣ g taddart-inw. I keyyin ?

AMΓAR Γur yan ureḥḥal. Ar tgannaɣ U Tdeɣwt allig ḍrant tillas. Nsiɣ ddaw txamt. Ur i-tennid mayed trid lfilaj.

DANI Riɣ ad seggmeɣ kan tewriqqin. I keyyin ?

AMΓAR Ad nn-ssiwḍeɣ yat tezdemt n wawal (ifesta). Akeṛfes ayed gan id lbiru.

DANI

Imaɣ ?

AMΓAR Ddu ar asekka. Awid lqehwa. Is tessend kan yiwen. Ur illi wenna itsenyan. Axub n waḍu. Wenna iran ad iheyya kan tewriqt ammi idda s lgirra (Iswa atag g lkis) iḥla watag-nnek. Win Fransa aya. Ur ɣurrek tettafaɣ yat tbakiyt. Nniɣ-ak (iseksew tiseggwin-nnes ammi iggwed) amexzen-ddeɣ iffeɣ iɣef-nnes. Aɣulen da tettren i medden cahadat lḥayat !

48

DANI Mayed igan ayennaɣ ?

AMΓAR

Ur akw ssinen wi is nella. Ur ssineɣ matta uherdun asen igran taddeɣ g iɣef. Cahadat lḥayat. Ccahada is tsuled tedderd. Meqqar tellid datasen, urda k-ttinniyen. Ur akw ssinen is tellid. Is tedderd, is da tettasid unfus, is ɣurrek izerfan. Af ad isinen is tellid, ilaq ad tefrud 600 n waryal. Tin ttanber (timbre). Da tferrud af ad tilid.

DANI Acku ssnen is nemmut meqqar tsul teẓleg-aɣ tudert.

AMΓAR Ur ɣurrek tettafaɣ yan wagirru (inker, inyuddu ammi da iswingim). Ilaq ad nessker kan tmeskanit ɣef uya. Iwa mayed tennid ?

DANI Gwdeɣ ad i-ttren ccahada-nnaɣ ! Ur ɣuri telli.

AMΓAR Ur inni ad ak tt-ikkes uḍbid. Ad ur teggard leḥsab ! Irẓem aqwrab-nnes itkaren s iwriqen, ildid yiwet tifert. Hatten. Ur akw iggunni, ibdu ar tt-itetturu. Iddeɣ ikemmel, ildid ṭṭambbu, isuḍ degs, isert ɣef tewriqt. Iẓẓel-as-tt. Dɣi, issen umexzen is tsuled tedderd. Ad ur tettud ad tseɣed ttanber, sselseɣ-t ɣef tewriqt.

DANI Iffeɣ-ak-tt !

49

AMΓAR Tella kan lqehwa ? Tisent n ufus !

DANI Tuklald talqehwatt ! (Sellan i udida n kan ṭṭumubil, bedden g yiwet tikkelt)

AMΓAR Hayyi ad dduɣ ad seksuɣ matta wann. Mek izrey U Tdeɣwt tinid-as ad i-iggann. (Iddu. Iqqima Dani ɣas netta. Ikkes-d areks-nnes ar t-izerru. Iles-t diɣ.)

DANI Tameggarut aya ! Cahadat lḥayat ! Is nedder midd nemmut ? (Iga atag g walkis, ar ittirir) Idda Muɣa s areḥbiy n lqelɛa … Yusi igiman kullu ! A lbabur. Ttuɣ-tent ! Tazgawt n umzil ag taɣ tmazirt-ddeɣ. Yaɣul udɣar g beddiɣ amm zzawit. Wenna d-iddan ibedd, ad isiwel. (Tekcem-d yat tmeṭṭuṭ g tesga tayeffast, tazdemt ɣef tadawt. Tbedda.)

TAMEṬṬUṬ

Idd memmis n tgellint n Hennu aya ? (Tbedda ar degs tseksiw. Inmala ẓars Dani allig as issadem afus.)

DANI Riɣ ad nn-zriɣ ar ɣurrem urta aɣuleɣ a Xalti Bica.

BICA Mani Ḥemmu, is ɣurs tga lman ?

50

DANI Ur illi mayed am ffreɣ. Kigan aya ur t-annayeɣ !

BICA Ur yad da txeddmem g yiwen udɣar ?

DANI Netta ayed iddan (ifest, iseksew tiseggwin-nnes, inmili ɣer Bica) Seg mayed imun d yat tṛumiyt ayed ur t-annayeɣ. Waqila idda s Bariz ayed i-nnan. Ur illi mayed amm ffreɣ a xalti Bica. Ammi as tga imkuraren. Iḍra ɣef wudem. Ur ssineɣ matta ṭṭalb n iṛumiyen as d-yarun aleḥruzen s tekref memmim.

BICA

Mek tufid anaɣiz-nnes tinid-as han tameṭṭuṭ-nnes taɣul s ɣur lahl-nnes. Ini-as tenna-ak mma-nnek azen-d tabrat n ureẓẓum i tmeṭṭuṭ-nnek. Hat ur tt-yad riɣ.

DANI Ikka inna-i ira ad as irẓem af ad yawel taṛumiyt.

BICA (Tɣwejdem s akal, ar t-tesnuy i yiɣef-nnes) Nekkin riɣ ad yawel utt tmazirt iherran. Ur idd amm tfenyant-ddeɣ iggann ard tehrara, yugin ad iddu s igran d umerdul. Tra add tenker tafed lqehwa d uɣrum irɣan, kunfitur d wudi ujden-as affella n ṭṭabla. Is tɣiy tṛumiyt ad teddu s azeddam, add tagem aman g teɣbalut. Yuccka memmi, umẓent imkuraren n iṛumiyen. Igellin a memmi !

DANI Ur yuccki ka. Ad tt-nadaɣ ar tt-afeɣ. Iniɣ-as inaruzen-nnem akw.

51

BICA Mantur ayed trid ad tuɣuled ?

DANI

Ssiman d-iddan.

BICA Zrid ar ɣuri ad ak keɣ lḥerz t-ibeṭṭun d tṛumiyt.

DANI (Iga ammi ur isella i mayed tenna) I mayed am tga ddunit ? Ur da kem-ittaɣ ka a xalti ?

BICA Ur i-isenbuttil ɣas Ḥemmu. Yuger ɣifi rrumatizm !

DANI Is tella kan tmeɣra g iɣrem ?

BICA Imaɣ is xiḍen medden ad gen timeɣriwin. Tezwa. Burent terbatin. Iɛerrimen aɣulen kkan ddaw twetmin. Uǧǧan tiwenziwin, da tteggan awed ẓillu, aglen kan tberbucin g igerḍawen-nnes. Da tettinniyed ka degsen tiɣiled idd tarbat. I keyyin urta trid ad tawled ?

DANI

Uhu a xalti !

BICA (Tesmatter tazdemt-nnes, tameẓ abrid) Iwa mek trid ad tawled tinid-it, ad ak ɛenteɣ tirbatin iherran. Zri-nn asag d-taɣuled seg lfilaj.

52

DANI

Udmawen-ddeɣ d imraraten amm wi ayed i-ismeqqten tamazirt-ddeɣ. Usar ttuɣ ajmil-nnek a Muɣa. (Yannay Bihi iddad g tnila-nnes. Add ikcem g tnila tayeffast).

BIHI Tsuled da ?

DANI

Imaɣ allig d-taɣuled ?

BIHI Riɣ ad isineɣ is tsuled da.

DANI Suleɣ da acku urta izriy. Da tgannaɣ !

BIHI Mayed da tgannad ?

DANI Nniɣ-ak-t yad tifawt n wass-a !

BIHI Ur ɛeqqaleɣ. Ssektey-id !

DANI (S uzɛaf) U Tdeɣwt !

BIHI Ur iqqimi da izerrey da. Izzenza akamyyu-nnes. Dɣik, izdeɣ g Tinɣir.

53

DANI Ur idd ayennaɣ ayed i-tennid diddaɣ !

BIHI

Ku tikkelt d winnes. Ur da tettiɛeqqileɣ i mayed nniɣ (iga ammi da ittergigi) Tafuyt tra ad teɣley. Da-i itteqqes usemmiḍ. Ur ɣurrek tettafaɣ kan jjakiṭa n Fransa, neɣ kan tmelsit isserɣan.

DANI Trid atag ?

BIHI Iẓrem wul-inu s watag. Mek ɣurrek lqehwa …

DANI Ur telli lqehwa, maka tella lmunaḍa.

BIHI Cwips, Kuka, Fanta … Tenna illan. Teḥla ɣuri lmunaḍa.

DANI

Ur awed trid kan talgaḍutin ad ttent tesmund d lmunaḍa ?

BIHI (Iɣwejdem) Awid !

DANI Nker. Tɣaled is ṭṭfeɣ lqehwa daddeɣ. Hat amerdul aya. Illa watag d uɣrum insan. Abazin.

BIHI Ttec-t ɣas keyyin.

54

DANI

Illa awed wudi mek trid ad tamsed aɣrum abazin, tegganned ad izrey. Netta ayed tgannaɣ awed nekkin.

BIHI U Tdeɣwt ?

DANI Uhu. Yan uɣyul umlil bu wallen tizegzawin issektren s igeddiden itkaren s wudi. Da izerrey ku yass g udɣwar-ddeɣ. Ku tikkelt g yannay kan yiwen, ibedd yaǧǧt ad isuy neɣ iɣwma aɣrum-nnes s wudi. Nekkin kigan n tikkal ayed umseɣ aɣrum-inw abazin s wudi-nnes imarɣen. Ur da as ferruɣ. Da-as ssudumeɣ iɣef iniɣ-as Tanemmirt. Hill.

BIHI Iwa ad tt-gganneɣ awed nekkin. Mek illa wudi fabuṛ. Ad tt-hagwmeɣ. Daccen ɣuri luqt. (Idda ar ammas n usayes iseksew tiseggwin, ar itnada aɣyul)

DANI Add iddu. Ur iɣiy ad iqqim ur izriy. (Festan s sin. Ku yan degsen d mayed da isskar. Dani ar isniɣis tafistat-nnes, Bihi ar ikeṭṭu iḍudan-nnes)

BIHI (Ihezza iɣef) Ur tɣiyed awed ad i-tked kan tɣawsa ?

DANI Amm mi ?

55

BIHI

Inna-aɣ Hru Nayt Maxux izzenzan jjuḍit n Fransa g ssuq n Tinɣir is … (ifest)

DANI

Is mi ?

BIHI Ur ɛeqqaleɣ isem-nnes ! Ek-id yan walkis n watag. (Ik-as-t). Ih ass n Bunani busantim ! Inna-aɣ da d-ssufuɣen Irumiyen ayenna akw lan, iɛban, ifeckan, id bacekliḍ. Da ten srusen dat tadderwin-nnsen. Wenna ten-iran yasi-ten. Hru da itettekkur akameyyu-nnes ar tixemmuyin, yawid akw tiɣawsiwin-nnaɣ s tmazirt. Ar izzenza. Yiwen useggwas sɣiɣ ɣurs yan bacekliḍ awraɣ. Nnimirwaḥd !

DANI

Ayenna d-ittawi ɣas ayenna s gran medden. Ayenna ur rin.

BIHI Iwa nekwni nra ayenna ur rin ! Mer ufiɣ ad dduɣ awed nekkin ɣas add tettawiɣ jjuḍit-nnaɣ.

DANI Ur iwhin ad teddud.

BIHI Ayennaɣ as riɣ ad ak ssutreɣ yan usekkin maka kukreɣ kigan.

DANI Ayed tt-igan ?

56

BIHI

Asag taɣuled, tazend-id kan kuntṛada.

DANI Ur tɣiyed i lexdemt n Irumiyen.

BIHI (Isuf idmaren) Γiyeɣ awed i tin wudayen. Γiyeɣ i mayed igan tamara. Ad ur ɣifi tettegwded.

DANI Ssneɣ idd argaz ayed tgid. Wenna d-ilulan, igem g umerdul-ddeɣ bla awed yan yiwes, issgem degs icirran, isxiter-ten, hat nnig urgaz ayed iga.

BIHI Awed tiwetmin n umerdul-ddeɣ gant iregzen ?

DANI Ugar n iregzen. Imeṭṭa ayed gant !

BIHI Ur i-tennid manekt !

DANI I mi ?

BIHI Kuntṛada ?

DANI Fabuṛ ! G wudem n Rebbi !

57

BIHI Ur ilaq !

DANI Mayed trid ad tt-tinid ?

BIHI

Ilaq ad ak fruɣ. Ad zzenzeɣ snat tigratin, snat tiɣeṭṭen, snat tfullusin, snat wulli, fruɣ-ak.

DANI

Nniɣ-ak ur ilaq.

BIHI Riɣ ad ak ssudmeɣ iɣef !

DANI

(Yuzen ifassen af ad ur t-yaǧǧ add inmili ẓars) Ula maxef !

BIHI Argaz ayed tgid. (Ifest imiq) Ini-i iwa ur ɣurrek tettafaɣ kan jjakiṭa, neɣ kan tmelsit irɣan, inɣa-i usemmiḍ. Riɣ awed kan lqehwa neɣ kan watag.

DANI Uɣul-d asekka. Add akw tafed ayenna trid ddaw tezdayt-ddeɣ.

BIHI I mek izrey U Tdeɣwt ?

58

DANI

Add tafed ayenna trid ddaw tezdayt. Imaɣ ur tessind idd nekkin a mi ttinin « Baba Wafuy». Amm « Papa Noël » n Irumiyen. Ayenna g nurzen medden da asent sruseɣ ddaw tezdayt.

BIHI Isawel-aɣ ɣifs Hru. Imel-aɣ tterswira ids iga g Bariz. Argaz azurar bu tmelsa tizggwaɣin d tamart taɣwezzaft. Da itettaylal g yigenna, iney yan uɣyul bu wafriwen. Da ikeccem s tadderwin ammas n yiḍ yaǧǧ kigan n tɣawsiwin ddaw useklu i yicirran.

DANI Netta ayennaɣ ! (Inker Bihi, iddu bla ad yini awed yan wawal. Idda ad iffeɣ asayed, iger-d aseksew ɣer Dani, inna-as :).

BIHI Amm uɣyul amellal bu wallen tizegzawin amm U Tdeɣwt-nnek. Awed yan izrin. (Ildi-d aɣrum abazin as ika Dani, ibdu art itetta.)

DANI Awed Hru-ddeɣ isawalen d ibujadiyen-ddeɣ ! Aɣyul itettaylalen ! (Ibdu ar iskikiy taṭsa imiq ibedd iddeɣ yannay amɣar yaɣul-d).

59

Ikcem-d umɣar. Izmummeg. Yuwid aɣrum.

AMΓAR Ssneɣ idd ad tsaled da.

DANI Mani d-tekkid ?

AMΓAR Tameɣra. Uwiɣ-ak-d aɣrum. Axwebbaz yaṭfuten. Griɣ-ak awed imiq n uksum, amm yissif n lmeswak, agensu n uɣrum.

DANI Iffeɣ-ak-tt ! I mayed igan tameɣra ?

AMΓAR Imaɣ ur ak ɣrin ?

DANI Awed yan i-iɣran. Imaɣ mayed yuwlen ?

AMΓAR Imaɣ ur tessind ?

DANI Ur ssineɣ ka.

AMΓAR U Tdeɣwt ayed igan tameɣra i memmis. Ayennaɣ ag ur izriy.

DANI

60

Mayed da tettinid ?

AMΓAR Γwejdmeɣ ids g yiwt ṭṭabla. Udem s udem. Nečča, neswa, neḍsa. Nekkin ayed asen iseggmen akw tiwriqqin n waggwal. Tislit tsul tmeẓẓiy. Tsul tga tametrugt. Urta telkim ɣef waggwal.

DANI Ar t-tettinid s wudem-nnek azeggwaɣ. Ur tennemruriyed. Ur deg k-teqqimi terbat ?

AMΓAR Awed nettat tra.

DANI Mek diɣ tra hat awal yaḍen ayennaɣ. Nitni gan tameɣra, nekkin ar i-issa usemmiḍ da. Ar t-tgannaɣ.

AMΓAR Nniɣ-as-t. Ad ak ggalleɣ ar as t-nniɣ. Inna-i tifawt n usekka ad izrey.

DANI Seg yimi-nnek s igenna.

AMΓAR Inna-i ak seqsaɣ. Ir ad yisin is da tezzenzad kan id kuntṛada ?

DANI Llant !

AMΓAR Riɣ yiwt awed nekkin.

61

DANI

I tawuri-nnek ?

AMΓAR Ad tt-ttuɣ !

DANI Ad ak yili g iɣef, hat ur illi wawal g Fransa. Ur illi mami tuwid awal. Ur llin awed imawen g tɣiyed ad tt-tesmutterd. Medden da xeddmen s ifesti. Mek tsuled trid ad texdemd g wawal, yuf-ak is teqqimid g tmazirt. Ar mek trid ad texdemd g Fransa, ilaq ad tisined ad tesmutterd ifesti seg imawen n medden, tesselkm-tt-inn i wenna issaɣen ifesti. Tɣiyed ?

AMΓAR Ifesti irra-i. Ur as ɣiyeɣ. Awal ayed igan tawuri-inw. Da t-smuttureɣ g imawen, qqnen neɣ reẓmen, da t-ssififeɣ, stiɣt, rnuɣ-as i ku aneɣmis imiq n tisent d isufir d tkamamt af ad yiṭfit g umeẓẓuɣ. Ku yan sselkmeɣ-as-nn awal-nnes. Ku ass imkinnaɣ. Netta ayed da tetteẓẓuɣ. Netta ayed da meggreɣ, netta ayed da serwateɣ. Netta ayed da smuttureɣ s teɣrar. Da t-ssaɣ imkiddaɣ issa uḥerda azwu. Awal d-tudert-inu. Tamazirt-ddeɣ akw tuli ɣef wawal. Γas ɣef wawal, isigniw n wawal d isaffen n uledduy d tkerkas. Tedduxma s wawal !

DANI Ur telli luqt i wawal g Fransa. Ayenna tsawled bbin-ak-t-inn g teɣrad.

AMΓAR

Nekkin d wawal amm iḍudan. Ur nniɣ ad tt-zriɣ !

62

(Sellan i yan udida irwasen win ukameyyu.)

DANI Netta aya waqila. Iqqima g wawal-nnes.

AMΓAR Jjip n jadarmiya aya. Han dinna kkiɣ (irul umɣar. Iɣwejdem Dani.)

AJADARMIY Bedd !

DANI (Ibedda Dani s tawda) Hayyi beddiɣ !

AJADARMIY Tiwriqqin-nnek ! (Ika-as takerḍa-nnes) Mani anfal-ddaɣ ak-isawalen ?

DANI

Amɣar ? Ikka da (imel-asen tasga tayeffast), ar ireggwel ammi iggwed.

AJADARMIY Mayed da tesskared da ?

DANI

Da tgannaɣ akameyyu.

AJADARMIY (Ar iseksiw tiwriqqin as ika Dani, imiq ildid yat tifert g llan kigan n yismawen. Iseksew s ajadarmiy wiss sin.)

63

Ur illi g llista a ccaf ! (iseksew g Dani). Akameyyu ? Matta ukameyyu tetgannad ?

DANI

Win U Tdeɣwt !

AJADARMIY Abrid-ddeɣ ur iqqimi da degs izerrey awed yan.

DANI

Seg mantur ?

AJADARMIY Sin iseggwasen aya !

DANI Nekkin riɣ-nn lfilaj. Seg tifawt zik aya tgannaɣ U Tdeɣwt.

AJADARMIY Uɣul ɣer iɣrem tamẓed aṭaksi. Illa ubrid yaḍen iseggmen. Tassaɛt taweḍ-tt-nn lfilaj.

DANI Maka Amɣar, Bihi d iregzen akw d-mlalaɣ da ran ad ddun s lfilaj. Zedɣen g iɣrem. Imaɣ ur ssinen is llan iṭaksiten ? Imaɣ allig da tgannan amm nekkin ?

AJADARMIY Winnaɣ akw infalen ayed gan. Imeɛḍar. Nesmatter-ten, nawi-tend ɣer iɣrem. Neffer-ten da ayenna ɣef izerrey ɛid lɛerc nessuɣul-ten ɣer lfilaj. Ku yass nawey-asen-d učči. Dɣi da ten nesmuttur yiwen s yiwen amm iɣejden.

DANI

64

Nekkin izzrin ass akw mayed ila ar tettemraraɣ awal d imeɛḍar. Yiwen ika-i akw cahadat alhayat. (Ikkes-t-dd ik-tt i ujadarmiy)

AJADARMIY Wa Bassu ! Ikka iga aselmad g tesdawit. Ṭṭambbu-ddeɣ win sbitar n imeɛḍar. Nker ak-inn sselkmeɣ i yiɣrem.

DANI Uhu !

AJADARMIY Imaɣ ?

DANI Riɣ ad gganneɣ U Tdeɣwt. Gwdeɣ ad ffɣeɣ adɣar izrey.

AJADARMIY WISS SIN

Aǧǧ-t ad iggann awed Sidna Σisa mek ira. Aǧǧ-t ad iggann U Dra-nnes !

DANI

Is izrey U Dra, netta, midd isul ? (Ddun bla ad ɣifs raren, iqqim ɣas netta. Ḍrint tillas.)

AKSIL AZERGI Dujenbir 2019/Yennayer 2020

G Bariz/Lil