GRATIS DA www.musicaineuropa.it oppure www.accazeta.it

Canzoni Napoletane Classiche

'A casciaforte Maria Mari' 'A Frangesa Mme so' mbriacato 'e sole 'A tazza 'e cafe' Munasterio 'e Santa Chiara Anema e core (1850) Na sera 'e Maggio Catari' Na voce, na chitarra e 'o ppoco 'e luna Ciccio Formaggio Ndringhete ndra' Cicerenella Nini' Tirabuscio' Comme facette mámmeta? Nun e' peccato Core 'ngrato 'O marenariello Dduje Paravise 'O paese d''o sole Dicitencello vuje 'O sole mio 'E spingule francese 'O surdato nnammurato Fenesta ca lucive Piscatore 'e Pusilleco Funiculi' - Funicula' Reginella Guapparia Santa Lucia luntana I' te vurria vasa' Scalinatella Io, na chitarra e 'a luna Scètate (1887) Lazzarella Silenzio cantatore Lo cardillo Simmo 'e Napule paisa' Luna caprese Surriento d''e 'nnammurate Luna rossa Tammurriata nera Malafemmena Torna a Surriento Marechiaro Tu ca nun chiagne Voce 'e notte

'A Casciaforte Mangione - Valente

Vaco truvanno na casciaforte! E andivinate pe' ne fá che? Non tengo titoli, non vivo 'e rendita, non ci ho un vestito pe' cuollo a me!... Ma 'a cascia mi necessita... Pe' forza ll'aggi''a tené! Ce aggi''a mettere tutt''e llettere che mi ha scritto Rosina mia... nu ritratto (formato visita) d''a bonanema 'e zi' Sufia... nu cierro 'e capille, nu cuorno 'e curallo... ed il becco del pappagallo che noi perdemmo nel ventitré... Pe-re-pe-re-pe-re-ppe-ré.... Sono ricordi che in cassaforte, sulo llá dinto t''e ppuó' astipá... Quando mi privano del companatico, io 'ngótto e zitto senza sferrá... Lo so! La vita è tragica, ma 'a cascia...mme ll'hann''a dá! Ce aggi''a mettere tutt''e llettere che mi ha scritto Rosina mia... Il mozzone di una steárica (conficcato nella bugia), na bambola 'e Miccio, na lente in astuccio... e una coda di cavalluccio che mi ricorda la meglio etá! Pa-ra-pa-ra-pa-ra-ppa-rá....

Vaco truvanno na casciaforte! Ma a qua' casciere ce 'o vvaco a dí?...

Certe reliquie, cierti cimeli, si 'e ttiene 'a fore, pònno sparí!... San Casimiro martire... 'sta cascia, famm''a vení! Ce aggi''a mettere tutt''e llettere che mm'ha scritto Rosina mia, na cartella (di lire dodici) rilasciata dall'agenzía... Na máneca 'e sicchio, na crástula 'e specchio, na corteccia di cacio vecchio e un fracchesciasso color cakí! Pi-ri-pi-ri-pi-ri-ppi-rí....

GRATIS DA www.musicaineuropa.it oppure www.accazeta.it

'A Frangesa Mario Costa

Songo frangesa e vengo da Parigge: Io só' na chiappa 'e 'mpesa, ve ll'aggi''a dí! Pe' cumminciá, sapite... no, nun ve vrucculiate, io 'o tengo 'o 'nnammurato... cu me nun c'è che fá! Oh!..Oh!..Oh!..Oh!..Oh!..Oh!..Oh!.. Ma vuje mo che vulite? Ve prego 'e nun gridá! Oh!..Oh!..Oh!..Oh!..Oh!..Oh!..Oh!.. Si vuje nun 'a fenite, 'un pòzzo cchiù cantá! Io sóngo bona ma só' 'ntussecósa... vurría sapé na cosa, ma 'a veritá: Certo mme cuffiate, veco ca mo redite, Pecché mme lu ffacite? Gué jammo a franco 'o ssá'?! Oh!..Oh!..Oh!..Oh!..Oh!..Oh!..Oh!.. Ma vuje pecché redite? Ve piace 'e ve spassá!? Oh!..Oh!..Oh!..Oh!..Oh!..Oh!..Oh!.. Si vuje nun 'a fenite, 'un pòzzo cchiù cantá!

Aggio viaggiato e saccio tutto 'o munno, ma stu cielo affatato, sta sulo ccá!... 'A gente ride e canta e ghiètta a mare 'e guaje... Napule è bella assaje: I' ccá voglio restá... Ah!..Ah!..Ah!..Ah!..Ah!..Ah!..Ah!.. Spassámmoce e redimmo, si lu pputimmo fá... Ah!..Ah!..Ah!..Ah!..Ah!..Ah!..Ah!.. Nuje mo nce cunuscimmo e ghiammo a franco 'o ssá'!...

GRATIS DA www.musicaineuropa.it oppure www.accazeta.it

'A tazza 'e cafe' Capaldo - Fassone Vurría sapé pecché si mme vedite, facite sempe 'a faccia amariggiata... Ma vuje, quanto cchiù brutta ve facite, cchiù bella, a ll'uocchie mieje, v'appresentate... I' mo nun saccio si ve n'accurgite! Ma cu sti mode, oje Bríggeta, tazza 'e café parite: sotto tenite 'o zzuccaro, e 'ncoppa, amara site... Ma i' tanto ch'aggi''a vutá, e tanto ch'aggi''a girá... ca 'o ddoce 'e sott''a tazza, fin'a 'mmocca mm'ha da arrivá!... II Cchiù tiempo passa e cchiù v'arrefreddate, 'mméce 'e ve riscaldá..."Caffè squisito!..." 'o bbello è ca, si pure ve gelate, site 'a delizia d''o ccafé granito... Facenno cuncurrenza â limunata... Ma cu sti mode, oje Bríggeta, ................................................ III Vuje site 'a mamma d''e rrepassatore?... E i', bellezza mia, figlio 'e cartaro!... Si vuje ve divertite a cagná core, i' faccio 'e ccarte pe' senza denare... Bella pareglia fóssemo a fá 'ammore! Ma cu sti mode, oje Bríggeta, ................................................

GRATIS DA www.musicaineuropa.it oppure www.accazeta.it Anema e core (1850) versi di TITO MANLIO musica di SALVATORE D'ESPOSITO Nuje ca perdimmo 'a pace e 'o suonno, nun ce dicimmo maje pecché?... Vocche ca vase nun ne vonno, nun só' sti vvocche oje né'! Pure, te chiammo e nun rispunne pe' fá dispietto a me... Tenímmoce accussí: ánema e core... nun ce lassammo cchiù, manco pe' n'ora... stu desiderio 'e te mme fa paura... Campá cu te, sempe cu te, pe' nun murí... Che ce dicimmo a fá parole amare, si 'o bbene po' campá cu nu respiro? Si smanie pure tu pe' chist'ammore, tenímmoce accussí...ánema e core! II Forse sarrá ca 'o chianto è doce, forse sarrá ca bene fa... Quanno mme sento cchiù felice, nun è felicitá... Specie si ê vvote tu mme dice, distratta, 'a veritá... Tenímmoce accussí: ánema e core... ................................... Ti piace la musica classica napoletana?? Segui il link per acquistare CD o cassette. Puoi effettuare l'acquisto tramite "server sicuro" Fai click qui Ti piace la musica classica napoletana?? Segui il link per acquistare CD o cassette.

Puoi effettuare l'acquisto tramite "server sicuro" Fai click qui Catari' Di Giacomo - Costa Marzo: nu poco chiove e n'atu ppoco stracqua... Torna a chiovere, schiove... ride 'o sole cu ll'acqua. Mo nu cielo celeste, mo n'aria cupa e nera... Mo, d''o vierno, 'e ttempeste, mo, n'aria 'e primmavera... N'auciello freddigliuso, aspetta ch'esce 'o sole... 'Ncopp''o tturreno 'nfuso, suspirano 'e vviole... Catarí', che vuó' cchiù? 'Ntiénneme core mio: Marzo, tu 'o ssaje, si' tu... e st'auciello, songh'io...

Ciccio Formaggio Pisano - Cioffi

Te 'ncuntraje, te parlaje e m'innamorai di te... Mme guardaste, mme diciste: "Mi piacete pure a me..." Ma tutt''o bbene ca hê ditto sempe 'e mme vulé, è na buscía ch'è asciuta 'ncopp''o naso a te... Si mme vulisse bene overamente, nun mme facisse 'ncujetá da 'a gente, nun mme tagliasse 'e pizze d''a paglietta, nun mme mettisse 'a vrénna 'int''a giacchetta... Si mme vulisse bene, o mia Luisa, nun mme rumpisse 'o cuollo d''a cammisa... Si' na 'nfá'...si' na 'nfá'...si' na 'nfama... Te n'abù'...te n'abù'...te n'abuse... te n'abuse ca Ciccio Formaggio, nun tene 'o curaggio nemmeno 'e parlá! Si sapisse, si vedisse, dint''o core mio che nc'è! Cumpatisse... Mme dicisse: "Puveriello...ma pecché?" Ma 'ncopp''o core tu nce tiene 'e pile 'o ssá' ca nu barbiere nun ce abbasta p''e ttagliá!... Si mme vulisse bene overamente, nun mme facisse 'ncujetá da 'a gente... Nun mme tirasse 'e pile 'a dint''e rrecchie, nun mme mettisse 'o dito dint'a ll'uocchie, nun mme mettisse 'a neve dint''a sacca, nun mme squagliasse 'ncapa 'a ceralacca! Si' na 'nfá'........ .........................

L'altro giorno, ma che scorno: Vengo a casa e trovo a te spettinata, abbracciata 'nziem'a n'ommo...Bèh...ched è?! Mme rispunniste: "Chisto vene a te 'mpará comme se vasa quanno tu mm'hê 'a spusá..." Si mme vulisse bene overamente, nun mme facisse 'ncujetá da 'a gente... Nun mme menasse 'e streppe 'e rafanielle, nun mme mettisse 'a quaglia 'int''o cappiello, nun mme facisse stá, pe' n'ora sana, cu 'a pippa 'mmocca e cu 'a cannela 'mmano! Si mme vulisse bene overamente, nun mme facisse 'ncujetá da 'a gente... Nun mme pugnisse areto cu 'o spillone, nun mme mettisse 'a colla 'int''o cazone... Nun mme screvisse, cu nu piezzo 'e gesso, aret''o matinè: "Ciccí' si' fesso!" Si' na 'nfá'........ ..........................

GRATIS DA www.musicaineuropa.it oppure www.accazeta.it

Cicerenella Anonimo Cicerenella mia, si' bona e bella! Cicerenella tenéa nu ciardino e ll'adacquava cu ll'acqua e lu vino... Ma ll'adacquava po' senza langella... Chist'è 'o ciardino de Cicerenella... Cicerenella teneva na gatta ch'era cecata e purzí scontraffatta... La strascenava cu meza codella... Chest'è la gatta de Cicerenella... Cicerenella teneva nu gallo e tutta la notte nce jéva a cavallo... Essa nce jéva po' senza la sella... E chisto è lo gallo de Cicerenella... Cicerenella teneva nu ciuccio e ll'avéa fatto nu bellu cappuccio... Ma nu teneva né ossa e né pelle... Chisto è lu ciuccio de Cicerenella... Cicerenella tenéa na gallina che facéa ll'uovo de sera e matina... Ll'avéa 'mparata a magná farenella... Chest'è 'a gallina de Cicerenella... Cicerenella tenéa na pennata, e, tutta la notte, steva allummata... E ll'allummava co la lucernella... Chesta è 'a pennata de Cicerenella... Cicerenella teneva na vótte: mettea da coppa e asceva da sotto... E nun ce steva tompagno e cannella... Chesta è la vótte de Cicerenella... Cicerenella tenéa na remessa e nce metteva cavallo e calesse... E nce metteva la soja tommonella... Chesta è 'a remessa de Cicerenella... Cicerenella tenéa na tièlla,

frijeva ll'ove cu la mozzarella... e le ffrijeva cu la sarcenella... Chesta è 'a tièlla de Cicerenella... Cicerenella mia, si' bona e bella! Comme facette mámmeta? Capaldo - Gambardella

Quanno mámmeta t'ha fatta, quanno mámmeta t'ha fatta... Vuó' sapé comme facette? vuó' sapé comme facette?... Pe' 'mpastá sti ccarne belle, pe' 'mpastá sti ccarne belle... Tutto chello ca mettette? tutto chello ca mettette?... Ciento rose 'ncappucciate, dint''a mártula mmescate... Latte, rose, rose e latte, te facette 'ncopp''o fatto!... Nun c'è bisogno 'a zingara p'andiviná, Cuncè'... Comme t'ha fatto mámmeta, 'o ssaccio meglio 'e te!... E pe' fá 'sta vocca bella, e pe' fá 'sta vocca bella... Nun servette 'a stessa dose, nun servette 'a stessa dose... Vuó' sapé che nce mettette? Vuó' sapé che nce mettette?... mo te dico tuttecosa... mo te dico tuttecosa: nu panaro chino, chino, tutt''e fravule 'e ciardino... Mèle, zuccaro e cannella: te 'mpastaje 'sta vocca bella... Nun c'è bisogno 'a zingara p'andiviná, Cuncè'... Comme t'ha fatto mámmeta, 'o ssaccio meglio 'e te...

E pe' fá sti ttrezze d'oro, e pe' fá sti ttrezze d'oro... Mamma toja s'appezzentette, mamma toja s'appezzentette... Bella mia, tu qua' muneta!? bella mia, tu qua' muneta!? Vuó' sapé che nce servette? vuó' sapé che nce servette?... Na miniera sana sana, tutta fatta a filagrana, nce vulette pe' sti ttrezze, che, a vasá, nun ce sta prezzo! Nun c'è bisogno 'a zingara, p'andiviná, Cuncè'... comme t'ha fatto mámmeta, 'o ssaccio meglio 'e te...

Core 'ngrato (Cardillo, Cordiferro) Catarì, Catarí... pecché mm''e ddice sti pparole amare?! Pecché mme parle e 'o core mme turmiente Catarí'?! Nun te scurdá ca t'aggio dato 'o core, Catarí'... Nun te scurdá... Catarí... Catarí, che vène a dicere stu pparlá ca mme dá spáseme? Tu nun ce pienze a stu dulore mio?! Tu nun ce pienze, tu nun te ne cure... Core, core 'ngrato... T'hê pigliato 'a vita mia! Tutto è passato... e nun ce pienze cchiù. Catarí, Catarí... tu nun 'o ssaje ca fino e 'int'a na chiesa io só trasuto e aggiu pregato a Dio, Catarí... E ll'aggio ditto pure a 'o cunfessore: "Io stó a murí pe' chella llá... Stó a suffrí, stó a suffrí nun se pò credere... stó a suffrí tutte li strazie..." E 'o cunfessore, ch'è perzona santa, mm'ha ditto: "Figliu mio lássala stá, lássala stá!..." Core, core 'ngrato... T'hê pigliato 'a vita mia! Tutto è passato... e nun ce pienze cchiù Dduje Paravise (Melina, E.A.Mario) Duje viecchie prufessure 'e cuncertino, nu juorno, nun avevano che fá. Pigliájeno 'a chitarra e 'o mandulino e, 'nParaviso, jèttero a suná: - Ttuppe-ttù... - "San Pié', arapite!... ve vulimmo divertí..." "Site 'e Napule?! Trasite!

e facitece sentí..." "V'avimm''a fá sentí doje, tre canzone, ca tutt''o Paraviso ha da cantá: Suspire 'e vase...Museca 'e passione... Rrobba ca sulo a Napule se fa... E 'a sera, 'nParaviso, se sunaje e tutt''e Sante jèttero a sentí... 'O repertorio nun ferneva maje: "Carmela, 'o Sole mio, Maria Marí..." "Ah, San Pié, chesti ccanzone, sulo Napule 'e ppò fá... arapite stu barcone: 'A sentite 'sta cittá?... E, sott''o sole e 'a luna, vuje sentite sti vvoce, ca só' voce 'e giuventù... Si po' scennite llá, nun 'o ccredite?! Vuje, 'nParaviso, nun turnate cchiù!..." Ma, doppo poco, da 'a malincunía 'e viecchie se sentettero 'e pigliá: Suffrévano nu poco 'e nustalgía e, a Napule, vulèttero turná: "Mo, San Pié, si permettite, nuje v'avimm''a salutá..." "Site pazze! Che dicite? Nun vulite restá ccá?!" "Nuje simmo 'e nu paese bello e caro ca tutto tène e nun se fa lassá: Pusìlleco, Surriento, Marechiaro... 'O Paraviso nuosto è chillu llá!"

Dicitencello vuje (Fusco, Falvo) Dicitencello a 'sta cumpagna vosta ch'aggio perduto 'o suonno e 'a fantasia... ch''a penzo sempe, ch'è tutt''a vita mia... I' nce 'o vvulesse dicere, ma nun ce 'o ssaccio dí... 'A voglio bene... 'A voglio bene assaje! Dicitencello vuje ca nun mm''a scordo maje. E' na passione, cchiù forte 'e na catena, ca mme turmenta ll'anema... e nun mme fa campá!... Dicitencello ch'è na rosa 'e maggio, ch'è assaje cchiù bella 'e na jurnata 'e sole... Da 'a vocca soja, cchiù fresca d''e vviole, i giá vulesse sèntere ch'è 'nnammurata 'e me! 'A voglio bene... .......................... Na lácrema lucente v'è caduta... dicíteme nu poco: a che penzate?! Cu st'uocchie doce, vuje sola mme guardate... Levámmoce 'sta maschera, dicimmo 'a veritá... Te voglio bene... Te voglio bene assaje... Si' tu chesta catena ca nun se spezza maje!

Suonno gentile, suspiro mio carnale... Te cerco comm'a ll'aria: Te voglio pe' campá!.. 'E spingule francese (Di Giacomo, De Leva)

Nu juorno mme ne jètte da la casa, jènno vennenno spíngule francese... Nu juorno mme ne jètte da la casa, jènno vennnenno spíngule francese... Mme chiamma na figliola: "Trase, trase, quanta spíngule daje pe' nu turnese?" Mme chiamma na figliola: "Trase, trase, quanta spíngule daje pe' nu turnese? Quanta spíngule daje pe' nu turnese?" Io, che sóngo nu poco veziuso, sùbbeto mme 'mmuccaje dint'a 'sta casa... "Ah, chi vò belli spingule francese! Ah, chi vò belli spingule, ah, chi vò?! Ah, chi vò belli spingule francese! Ah, chi vò belli spingule ah, chi vò!?" Dich'io: "Si tu mme daje tre o quatto vase, te dóngo tutt''e spíngule francese... Dich'io: "Si tu mme daje tre o quatto vase, te dóngo tutt''e spíngule francese... Pízzeche e vase nun fanno purtóse e puo' ghiénchere 'e spíngule 'o paese... Pízzeche e vase nun fanno purtóse e puo' ghiénchere 'e spíngule 'o paese... E puó ghiénchere 'e spíngule 'o paese... Sentite a me ca, pure 'nParaviso, 'e vase vanno a cinche nu turnese!... "Ah, Chi vò' belli spíngule francese! Ah, Chi vò' belli spíngule, ah, chi vò?! Ah, chi vò belli spíngule francese! Ah, chi vò belli spíngule, ah, chi vò?!"

Dicette: "Bellu mio, chist'è 'o paese, ca, si te prore 'o naso, muore acciso!" Dicette: "Bellu mio, chist'è 'o paese, ca, si te prore 'o naso, muore acciso!" E i rispunnette: "Agge pacienza, scusa... 'a tengo 'a 'nnammurata e sta ô paese..." E i rispunnette: "Agge pacienza, scusa... 'a tengo 'a 'nnammurata e sta ô paese...

'A tengo 'a 'nnammurata e sta ô paese... E tene 'a faccia comm''e ffronne 'e rosa, e tene 'a vocca comm'a na cerasa... Ah, chi vò belli spîngule francese! Ah, chi vò belli spíngule, ah, chi vò'?! Ah, chi vò belli spíngule francese! Ah, chi vò belli spíngule, ah, chi vò'?!"

Fenesta ca lucive Fenesta ca lucive e mo nun luce... sign'è ca nénna mia stace malata... S'affaccia la surella e mme lu dice: Nennélla toja è morta e s'è atterrata... Chiagneva sempe ca durmeva sola, mo dorme co' li muorte accompagnata... Va' dint''a cchiesa, e scuopre lu tavuto: vide nennélla toja comm'è tornata... Da chella vocca ca n'ascéano sciure, mo n'esceno li vierme...Oh! che piatate! Zi parrocchiano mio, ábbece cura: na lampa sempe tienece allummata... Addio fenesta, rèstate 'nzerrata ca nénna mia mo nun se pò affacciare... Io cchiù nun passarraggio pe' 'sta strata: vaco a lo camposanto a passíare! 'Nzino a lo juorno ca la morte 'ngrata, mme face nénna mia ire a trovare!..

Funiculi' - Funicula' Turco - Denza

Aisséra, Nanninè', mme ne sagliette, tu saje addó'... Tu saje addó'... Addó', 'sto core 'ngrato, cchiù dispiette farme nun pò... Farme nun pò! Addó' lo ffuoco coce, ma si fuje, te lassa stá... Te lassa stá. E nun te corre appriesso e nun te struje sulo a guardá... Sulo a guardá... Jammo, jammo, 'ncoppa jammo ja'... Jammo, jammo, 'ncoppa jammo ja'... Funiculí - funiculá, funiculí - funiculá... 'Ncoppa jammo ja', funiculí - funiculá.... II Nèh jammo: da la terra a la montagna, no passo nc'è... No passo nc'è... Se vede Francia, Pròceta, la Spagna... e io veco a te! E io veco a te... Tiráte co li ffune, ditto 'nfatto, 'ncielo se va... 'Ncielo se va... Se va comm'a lo viento e, a ll'intrasatto, gué saglie sá'... Gué saglie sá'... Jammo, jammo, .........................

Se n'è sagliuta, oje né', se n'è sagliuta, la capa giá... La capa giá.. E' ghiuta, po' è tornata, po' è venuta...

Sta sempe ccá... Sta sempe ccá... La capa vota vota attuorno, attuorno, attuorno a te... Attuorno a te... Lo core canta sempe no taluorno: Sposammo, oje né'... Sposammo, oje né'... Jammo, jammo, .........................

Guapparia (Bovio, Falvo) Scetáteve, guagliune 'e malavita... ca è 'ntussecosa assaje 'sta serenata: Io sóngo 'o 'nnammurato 'e Margarita Ch'è 'a femmena cchiù bella d''a 'Nfrascata! Ll'aggio purtato 'o capo cuncertino, p''o sfizio 'e mme fá sèntere 'e cantá... Mm'aggio bevuto nu bicchiere 'e vino pecché, stanotte, 'a voglio 'ntussecá... Scetáteve guagliune 'e malavita!... E' accumparuta 'a luna a ll'intrasatto, pe' lle dá 'o sfizio 'e mme vedé distrutto... Pe' chello che 'sta fémmena mm'ha fatto, vurría ch''a luna se vestesse 'e lutto!... Quanno se ne venette â parta mia, ero 'o cchiù guappo 'e vascio â Sanitá... Mo, ch'aggio perzo tutt''a guapparía, cacciatemmenne 'a dint''a suggitá!... Scetáteve guagliune 'e malavita!... Sunate, giuvinò, vuttàte 'e mmane, nun v'abbelite, ca stó' buono 'e voce! I' mme fido 'e cantá fino a dimane... e metto 'ncroce a chi...mm'ha miso 'ncroce... Pecché nun va cchiù a tiempo 'o mandulino? Pecché 'a chitarra nun se fa sentí? Ma comme? chiagne tutt''o cuncertino, addó' ch'avess''a chiagnere sul'i'... Chiágnono sti guagliune 'e malavita!..

I' te vurria vasa' (V.Russo, Di Capua) Ah! Che bell'aria fresca... Ch'addore 'e malvarosa... E tu durmenno staje, 'ncopp'a sti ffronne 'e rosa! 'O sole, a poco a poco, pe' stu ciardino sponta... 'o viento passa e vasa stu ricciulillo 'nfronte! I' te vurría vasá... I' te vurría vasá... ma 'o core nun mm''o ddice 'e te scetá... 'e te scetá!... I' mme vurría addurmí... I' mme vurría addurmí... vicino ô sciato tujo, n'ora pur'i'... n'ora pur'i'!... Tu duorme oje Rosa mia... e duorme a suonno chino, mentr'io guardo, 'ncantato, stu musso curallino... E chesti ccarne fresche, e chesti ttrezze nere, mme mettono, 'int''o core, mille male penziere! I' te vurría vasá... ............................ Sento stu core tujo ca sbatte comm'a ll'onne! Durmenno, angelo mio, chisà tu a chi te suonne... 'A gelusia turmenta stu core mio malato:

Te suonne a me?...Dimméllo! O pure suonne a n'ato? I' te vurría vasá... ........................... Io, mammeta e tu Pazzaglia - Modugno

Ti avevo detto, dal primo appuntamento, 'e nun purtá nisciuno appriesso a te... Invece mo nu frato, na sora, na nepote... sola nun staje na vota: ascimmo sempre a tre! E mi hai promesso: "Domani chi lo sa... vengo io soltanto...soltanto con mammá!..." Io, mámmeta e tu... passiammo pe' Tuledo, nuje annanze e mámmeta arreto... Io mámmeta e tu... Sempe appriesso, cose 'e pazze: chesta vène pure ô viaggio 'e nozze... Jamm'ô cinema, a abballá... si cercammo 'e ce 'a squagliá, comm'a nu carabiniere chella vène a ce afferrá... Ah...Ah...Ah... ma, 'nnammurato, só' rassignato: Non reagisco più... Io, mámmeta e tu!... Io, mámmeta e tu!... Ma San Gennaro mm'aveva fatto 'a grazia: ll'ata matina nun ll'ha fatta aizá: Teneva ll'uocchie 'e freve, pareva ca schiattava, io quase mme credevo d'ascí sulo cu te... Nu filo 'e voce, però, truvaje mammá: "Da 'a piccerella ve faccio accumpagná..." Io, sòreta e tu... Jamm'ô bar ô Chiatamone: "Vuó' 'o cuppetto o vuó' 'o spumone?" "Chello ca costa 'e cchiù!" Pe' ricordo 'e 'sta jurnata, dint''a villa, ce hanno fatt''a foto... Vò' 'o pallone, vò' 'o babbá nun se fida 'e cammená... guardo a essa, guardo 'o mare... stó' penzanno 'e ce 'a mená...

Ah...Ah...Ah... ma, 'nnammurato, só' rassignato... non regisco più... Io, sòreta e tu!... Io, sòreta e tu!... Ammore mio, staje sempe cu 'e pariente... chesta famiglia mme pare na tribù... Arrivano 'a Milano, arrivano 'a ll'Oriente... e tutta chesta gente sta sempe attuorno a me... Na vecchia zia ca steva a Cefalù, venuta ccá, nun se n'è ghiuta cchiù... Io, zíeta e tu... poverina, è sofferente, ogne tanto, nu svenimento... io, zíeta e tu... Ll'uovo frisco, 'a muzzarella, cammenammo sulo in carrozzella... Stó' pavanno 'a ccá e 'a llá... 'E denare chi mm''e ddá?! O te lasso o, fra nu mese, stó' cercanno 'a caritá!... Ah...Ah...Ah... tu mm'hê 'nguajato... mme sposo a n'ata, nun ve veco cchiù... Mámmeta, sòreta e tu... páteto, fráteto e tu... nònneta, zíeta e tu... páteto, fráteto, nònneta, sòreta, sòreta, zíeta, zíeta, páteto, páteto, fráteto, fráteto, nònneta... nònneta, páteto...'o cane... ...Scusate giuvinò', io só' 'a bisnonna... só' turnata proprio mo da 'o 'spitale... Aaaaaaahhhhhh!!!!!

Io, na chitarra e 'a luna E. A. Mario Vatténne core mio, vatténne sulo p''e vvie sulagne... Chisá te cagne mo ca si' figliulo, chisá te cagne... E, giá ca tu si' nato cantatore, va' e canta si staje triste o 'e buonumore: Canta pe' te... Canta pe' te... e nun chiammá a nisciuna: Tu, na chitarra e 'a luna! II E nun te fá vení 'a malincunía p''e vvie ca sanno chi, pe' 'nganná, veneva 'ncumpagnia cu me cantanno... E, si mme tremma, 'ncopp''e ccorde, 'a mano... siéguete a cammená: Va' cchiù luntano! Canta pe' te... Canta pe' te... senza penzá a nisciuna: Tu, na chitarra e 'a luna! III E si truove a quaccuno e dice: "E comme, tu sulo? E chélla?" E si te dice 'e chélla pure 'o nomme, tu, scordatélla! E si chistu quaccuno fosse 'Ammore cágnate nomme e di': "State in errore: Canto pe' me, canto pe' me, nun voglio cchiù a nisciuna: Io, na chitarra e 'a luna!..."

Lazzarella Pazzaglia - Modugno

Cu 'e libbre sott''o vraccio e 'a camicetta a fiore blu, vuó' fá 'a signurenella 'nnanz'â scola pure tu... Te piglie 'a sigaretta quann''accatte pe' papá, te miette giá 'o rrussetto comme vide 'e fá a mammá... Lazzarè'!... Ma Lazzarella comme si'!? tu a me mme piace sempe 'e cchiù, e vengo apposta pe' t''o ddí, vicino â scola d''o Gesù... Tu invece mme rispunne: "Eggiá, io devo retta proprio a te... Pe' me ll'ammore pó aspettá, che n'aggi''a fá?...nun fa pe' me!..." Ah, Lazzarella! ventata 'e primmavera... Quanno passe tutt''e mmatine, giá te spiecchie dint''e vvetrine, sulo nu cumplimento te fa avvampá... Ma Lazzarella comme si', tu nun mme pienze proprio a me, e ride pe' mm''o ffá capí ca perdo 'o tiempo appriess'a te!

Mo vène nu studente 'nnanz'â scola d''o Gesù, te va sempe cchiù stretta 'a camicetta a fiore blu... te piglie quatto schiaffe tutt''e vvote ca papá, te trova nu biglietto ca te scrive chillu llá... Lazzarè'!... Ma Lazzarella comme si', ce si' caduta pure tu... Ll'ammore nun te fa mangiá te fa suffrí, te fa penzá... Na sera tu lle dice : "No" Na sera tu lle dice : "Ma" ma si nu vaso te vò' dá faje segno 'e "sí", senza parlá... Ah, Lazzarella, 'o tiempo comme vola: Mo te truove tutt''e mmatine, chino 'e lacreme stu cuscino... Manco na cumpagnella te pò aiutá!

Ma Lazzarella comme si'!? Te si' cagnata pure tu... e te pripare a di' stu "Sí", ma dint''a cchiesa d''o Gesù!

Lo cardillo Anonimo Stó' criscenno no bello cardillo... quanta cose ca ll'aggi''a 'mpará: Ha da ire da chisto e da chillo, li 'mmasciate isso mm'ha da portá!... Siente ccá bello mio: llòco 'nnante, nc'è na casa, na nénna nce sta, tu la vide ca nun è distante: chella nénna haje da ire a trová! II Si la truove ca stace dormenno, pe' na fata, gué, non la pigliá... No rommore non fá co' li ppenne... gué, cardí', tu ll'aviss''a scetá!? Si affacciata po' sta a lo barcone, pe' na rosa ll'aviss''a pigliá? Gué, cardí', vi' ca llá tu te stuone... va' vatténne cardí', nn''addurá!... III Si la truove ca face ll'ammore, 'sto cortiello annascùnnete ccá... 'Nficcancillo deritto a lo core e lo sango tu mm'haje da portá... Ma si penza...vatté' chiano chiano, zitto zitto te nce haje da azzeccá, Si afferrá po' te vò' co' la mano, priesto 'mpietto tu ll'haje da zompá... IV Si te vasa o t'afferra cianciósa, tanno tu ll'haje da dire accossí: "Lo patrone pe' te non reposa...

poveriello, pecché ha da morí?" T'accarezza, te vasa...ah, viato cchiù de me tu si' certo cardí'... Si co' tico cagnarme mm'è dato, voglio, doppo, davvero morí! Luna caprese Ricciardi - Cesareo Ohéee!... Cu me cantate 'sta canzone... vuje ca suffrite 'e ppene de ll'ammore... Capre, ve pò 'ncantá cu na parola... I Só' accumparute 'e stelle a primma sera, tutta Tragára luce 'mmiez'ô mare... na fascia 'argiento sott''e Faragliune e nu mistero 'int'a 'sta notte chiara. Notte 'e silenzio e i', mo, chesta canzone, cantá vulesse a chi mm'ha affatturato... Tu, luna luna tu, luna caprese, ca faje sunná ll'ammore a 'e 'nnammurate... adduorme a nénna mia ca sta scetata e falla 'nnammurá cu na buscía. Tu, luna luna tu, luna busciarda, famme passá sti ppene 'e gelusia e fa' ca nénna fosse tutt''a mia... Tu, luna luna tu...Luna caprese!... II E mo ca pure 'o mare s'è addurmuto e 'e nnuvole, li stelle, hanno stutato, dint'a sti bbracce meje, passione amara, io te vurría tené cu nu respiro... Ma è inutile, è destino, ca stu core, canta surtanto pe' chi dice no!

Tu, luna luna tu, luna caprese, .................................................. Luna rossa Vian - De Crescenzo Vaco distrattamente abbandunato... Ll'uocchie sott''o cappiello annascunnute, mane 'int''a sacca e bávero aizato... Vaco siscanno ê stelle ca só' asciute... Fischio......................... E 'a luna rossa mme parla 'e te, Io lle domando si aspiette a me, e mme risponne: "Si 'o vvuó' sapé, ccá nun ce sta nisciuna..." E i' chiammo 'o nomme pe' te vedé, ma, tutt''a gente ca parla 'e te, risponne: "E' tarde che vuó' sapé?! Ccá nun ce sta nisciuna!..." Luna rossa, chi mme sarrá sincera? Luna rossa, se n'è ghiuta ll'ata sera senza mme vedé... E io dico ancora ch'aspetta a me, for''o barcone stanott'ê ttre, e prega 'e Sante pe' mme vedé... Ma nun ce sta nisciuna...

II Mille e cchiù appuntamente aggio tenuto... Tante e cchiù sigarette aggio appicciato... Tanta tazze 'e café mme só' bevuto... Mille vucchelle amare aggio vasato.... Fischio......................... E 'a luna rossa mme parla 'e te, ................................................... Malafemmena Totò Si avisse fatto a n'ato chello ch'hê fatto a me, st'ommo t'avesse acciso... e vuó' sapé pecché? Pecché 'ncopp'a 'sta terra, femmene comm'a te, nun ce hann''a stá pe' n'ommo onesto comm'a me... Femmena, tu si' na malafemmena... a st'uocchie hê fatto chiagnere, lacreme 'e 'nfamitá... Femmena, tu si' peggio 'e na vipera, mm'hê 'ntussecato ll'ánema, nun pòzzo cchiù campá... Femmena, si' doce comm''o zzuccaro... peró 'sta faccia d'angelo, te serve pe' 'nganná!

Femmena, tu si' 'a cchiù bella femmena... te voglio bene e t'odio: nun te pòzzo scurdá... II Te voglio ancora bene, ma tu nun saje pecché... pecché ll'unico ammore si' stato tu pe' me!... E tu, pe' nu capriccio, tutto hê distrutto oje né'... Ma Dio nun t''o pperdona chello ch'hê fatto a me... Femmena, ................. A Marechiaro (Di Giacomo, Tosti) Quanno spónta la luna a Marechiaro, pure li pisce nce fanno a ll'ammore... Se revòtano ll'onne de lu mare: pe' la priézza cágnano culore... Quanno sponta la luna a Marechiaro. A Marechiaro ce sta na fenesta: la passiona mia ce tuzzuléa... Nu garofano addora 'int'a na testa, passa ll'acqua pe' sotto e murmuléa... A Marechiaro ce sta na fenesta.... Chi dice ca li stelle só lucente, nun sape st'uocchie ca tu tiene 'nfronte! Sti ddoje stelle li ssaccio i' sulamente: dint'a lu core ne tengo li ppónte...

Chi dice ca li stelle só lucente? Scétate, Carulí, ca ll'aria è doce... quanno maje tantu tiempo aggi'aspettato?! P'accumpagná li suone cu la voce, stasera na chitarra aggio purtato... Scétate, Carulí, ca ll'aria è doce!.. Maria Mari' V. Russo - Di Capua Arápete fenesta! Famme affacciá a Maria, ca stóngo 'mmiez'â via... speruto d''a vedé... Nun trovo n'ora 'e pace: 'a notte 'a faccio juorno, sempe pe' stá ccá attuorno, speranno 'e ce parlá! Oje Marí', oje Marí', quanta suonno ca perdo pe' te! Famme addurmí, abbracciato nu poco cu te! Oje Marí', oje Marí'! Quanta suonno ca perdo pe' te!

Famme addurmí... oje Marí', oje Marí'! II 'Mmiez'a stu ciardeniello, ce ride 'a malvarosa... Nu lietto 'e fronne 'e rosa aggio fatto pe' te... Viene che 'a notte è doce, 'o cielo ch'è nu manto... Tu duorme e io te canto 'a nonna a fianco a te... Oje Marí', oje Marí', ................................. III Pare che giá s'arape na sénga 'e fenestella... Maria cu 'a manella, nu segno a me mme fa! Sòna chitarra mia! Maria s'è scetata!... Na scicca serenata, facímmole sentí: Oje Marí', oje Marí', ................................ Mme so' mbriacato 'e sole Titomanlio - D'Esposito Sciure ca mme parlate 'e Primmavera, quanno nascite vuje, mme ride 'o core... Bello è 'o paese mio, addó' ll'ammore, sape ca tutto ll'anno ha da cantá: Mme só' 'mbriacato 'e sole, mme só' 'mbriacato 'e mare, 'e ll'uocchie 'e sti ffigliole, d''e vvarche e d''e llampare... Mme trèmmano 'e pparole e vuó' sapé pecché? Mme só' 'mbriacato 'e sole...

Mme só' 'mbriacato 'e te!... II Sona 'a campana e dá ll'avummaria: pace e silenzio dóce quanto maje... Cádeme 'mbraccia e doppo, ánema mia, cchiù sottavoce canta appriesso a me: Mme só' 'mbriacato 'e sole... ............................................... Munasterio 'e Santa Chiara Galdieri - Barberis Dimane?...Ma vurría partí stasera! Luntano, no...nun ce resisto cchiù! Dice che c'è rimasto sulo 'o mare, che è 'o stesso 'e primma...chillu mare blu! Munasterio 'e Santa Chiara... tengo 'o core scuro scuro...

Ma pecché, pecché ogne sera, penzo a Napule comm'era, penzo a Napule comm'è?! Funtanella 'e Capemonte, chistu core mme se schianta, quanno sento 'e dí da 'a gente ca s'è fatto malamente stu paese...ma pecché? No...nun è overo... no...nun ce créro... E moro cu 'sta smania 'e turná a Napule... Ma ch'aggi''a fá?... Mme fa paura 'e ce turná! Paura?...Sí...Si fosse tutto overo? Si 'a gente avesse ditto 'a veritá? Tutt''a ricchezza 'e Napule...era 'o core! dice ch'ha perzo pure chillu llá! Munasterio 'e Santa Chiara... 'Nchiuse dint'a quatto mura, quanta femmene sincere, si perdévano ll'ammore, se spusavano a Gesù! Funtanella 'e Capemonte... mo, si pèrdono n'amante, giá ne tènono ati ciento... ca, na femmena 'nnucente, dice 'a gente, nun c'è cchiù! No...nun è overo... No...nun ce crero... E moro pe' 'sta smania 'e turná a Napule! Ma ch'aggi''a fá... Mme fa paura 'e ce turná! Finale: Munasterio 'e Santa Chiara... Tengo 'o core scuro scuro... Ma pecché, pecché ogne sera, penzo a Napule comm'era penzo a Napule comm'è?!... Na sera 'e Maggio Pisano - Cioffi Quanno vien'a 'appuntamento guarde 'o mare, guard''e ffronne, si te parlo nun rispunne,

staje distratta comm'a che. Io te tengo dint''o core, sóngo sempe 'nnammurato ma tu, invece, pienze a n'ato e te staje scurdanno 'e me... Quanno se dice: "Sí!" tiènelo a mente... Nun s'ha da fá murí nu core amante... Tu mme diciste: "Sí!" na sera 'e maggio... e mo tiene 'o curaggio 'e mme lassá?! II St'uocchie tuoje nun só' sincere comm'a quanno mme 'ncuntraste, comm'a quanno mme diciste: "Voglio bene sulo a te..." E tremmanno mme giuraste, cu na mano 'ncopp''o core: "Nun se scorda 'o primmo ammore!..." Mo te staje scurdanno 'e me... Quanno se dice: "Sí!" .................................. Na voce, na chitarra e 'o ppoco 'e luna Rossi - Calise

Na voce, na chitarra e 'o ppoco 'e luna... e che vuó' cchiù pe' fá na serenata!? Pe' suspirá, d'ammore, chianu chiano, parole doce, pe' na 'nnammurata... "Te voglio bene...tantu tantu bene... luntano 'a te nun pòzzo cchiù campá....." II Na voce, na chitarra e 'o ppoco 'e luna... e comm'è doce chesta serenata... 'A vocca toja s'accosta cchiù vicina e tu t'astrigne a me cchiù appassiunata... Cu na chitarra e nu felillo 'e voce, cu te vicino, canto e só' felice... "Ammore, nun pòzzo cchiù scurdarme 'e te..."

Ndringhete ndra' Cinquegrana - De Gregorio

Carmenella è na bella figliola!... vénne ll'acqua gelata, â stagione... Gelata, â stagione... Gelata, â stagione... Comme spriémme stu bellu limone, tu mme spriémme stu core, Carmè'... Stu core Carmè'... Stu core Carmè'... Tutt''a vònno a 'sta bella acquajola, ma nisciuno s''a piglia, pecché?... Tutt''a vònno a 'sta bella acquajola, ma nisciuno s''a piglia, pecché?... E pecché?...Pecché...ndrínghete ndrá, 'mmiez'ô mare nu scoglio nce sta... tutte vènono a bevere ccá pecché...ndrínghete, ndrínghete, ndrá! Dint''e ffeste, nu giovane 'e fore, ll'ha veduta e s'è fatto tantillo... S'è fatto tantillo... S'è fatto tantillo... S'è scurdato 'e mammélla e tatillo e a 'o paese nun vò' cchiù turná... Nun vò' cchiù turná... Nun vò' cchiù turná... Carmenè' ve vulesse spusare! Giuvinò', nun è cosa...pecché... Carmenè' ve vulesse spusare! Giuvinò', nun è cosa...pecché... E pecché?...Pecché...ndrínghete ndrá, .............................................................

E' passato nu bellu surdato... s'è fermato vicino a Carmela... Vicino a Carmela... Vicino a Carmela... Sta manella 'int'a ll'acqua se gela, si mm''a stienne t''a 'nfoco Carmè'... T''a 'nfoco Carmè'... T''a 'nfoco Carmè'... Mo fernesco sta ferma e te sposo... Capurá' nun è cosa...pecché... Mo fernesco sta ferma e te sposo... Capurá' nun è cosa...pecché... E pecché?...Pecché ndrínghete ndrá, ...........................................................

Ma tenesse 'o marito 'ngalera? Carmenella nun è mmaretata... Nun è mmaretata... Nun è mmaretata... Ma tenesse 'a parola 'mpignata? Carmenella ll'ammore nun fa... Ll'ammore nun fa... Ll'ammore nun fa... Ma ched è, nun lle giova 'o marito? Ma pecché nun se vò' mmaretá? Ma ched è, nun lle giova 'o marito? Ma pecché nun se vò' mmaretá? E pecché?...Pecché ndrínghete ndrá, ...........................................................

Nini' Tirabuscio' Califano - Gambardella

Chillu turzo 'e mio marito nun se pò cchiù suppurtá! Ll'aggi''a cósere 'o vestito: Mm'aggi''a mettere a cantá! Tutto è pronto! Stó' aspettanno na scrittura p''a firmá: Nun appena che mm''a danno, vaco fore a debuttá! Ho scelto un nome eccentrico: "Niní Tirabusciò" Oh! Oh! Oh! Oh! Oh! Oh! Addio mia bella Napoli, mai più ti rivedrò!... Oh! Oh! Oh! Perderai Tirabusciò! Ne cunosco tante e tante ca nun só' cchiù meglio 'e me... e cu 'e llire e cu 'e brillante só' turnate da 'e tturné... 'A furtuna, s'è capito, 'ncopp''e ttavule se fa!... Ca fatiche e ghiétt''acito, che risorse puó' sperá?... Aíz''a vesta, smuóvete! E' ll'epoca ch''o vvò'... Oh! Oh! Oh! Oh! Oh! Oh! Addio mia bella Napoli, mai più ti rivedrò!... Oh! Oh! Oh! Perderai Tirabusciò!

Pe' cantá nun serve 'a voce, è 'o partito ca nce vò'... po' 'e ccanzone miette 'ncroce ca faje "bisse" quante vuó'! Dai il tuo cuore 'ncopp''a piazza ai più ricchi "abitué..." Vide po' si 'un fanno 'a mazza ll'ate artiste 'nnanze a te! E' chesta 'a vera tattica 'e na sciantosa 'e mo... Oh! Oh! Oh! Oh! Oh! Oh! Addio mia bella Napoli, mai più ti rivedró!... Oh! Oh! Oh! Perderai Tirabusciò!

Nun e' peccato Rossi - Calise La la la la la... la la la la la... la la la la la...la la... Si mme suonne 'int''e suonne che faje, nun è peccato!... E si, 'nzuonno, nu vaso mme daje... nun è peccato!... Tu mme guarde cu ll'uocchie 'e passione, io te parlo e mme tremmano 'e mmane... e si chesto pe' te nun è bene, mme saje dicere 'o bbene ched è? Si 'sta vocca desidera 'e vase... nun è peccato! Ma vestímmolo 'e vita stu suonno che 'a freve ce dá... E tu abbràcciame, cchiù forte astrìgneme... pecché 'ammore ca siente pe' me, peccato nun è!... La la la la la... .................

'O marenariello (Ottaviano, Gambardella) Oje né, fa' priesto viene! nun mme fá spantecá... ca pure 'a rezza vène ch'a mare stó' a mená... Méh, stienne sti bbraccelle, ajutame a tirá... ca stu marenariello te vò sempe abbracciá. Vicin'ô mare, facimmo 'ammore, a core a core, pe' nce spassá... Só marenaro e tiro 'a rezza: ma, p''allerezza, stóngo a murí... Vide ca sbatte ll'onna comm'a stu core ccá; de lacreme te 'nfonne ca 'o faje annammurá... Viene, 'nterr'a 'sta rena nce avimm''a recrijá; che scenne la serena... io po' stóngo a cantá. Vicin'ô mare,

...................... Oje né, io tiro 'a rezza e tu statte a guardá... li pisce, p''a prijezza, comme stanno a zumpá!... E vide, pure 'e stelle tu faje annammurá... ca stu marenariello, tu faje suspirá... Vicin'ô mare, .....................

GRATIS DA www.musicaineuropa.it oppure www.accazeta.it 'O paese d''o sole Bovio - D' Annibale Ogge stó' tanto allero ca, quase quase, mme mettesse a chiagnere pe' 'sta felicitá... Ma è overo o nun è overo ca só' turnato a Napule? Ma è overo ca stó' ccá? 'O treno steva ancora 'int''a stazione quanno aggio 'ntiso 'e primme manduline... Chist'è 'o paese d''o sole, chist'è 'o paese d''o mare, chist'è 'o paese addó' tutt''e pparole, só' doce o só' amare, só' sempe parole d'ammore! II 'Sta casa piccerella, 'sta casarella mia 'ncoppo Pusilleco , luntano, chi t''a dá?... 'Sta casa puverella, tutt'addurosa 'anèpeta, se putarría pittá: 'A ccá nu ciardeniello sempe 'nfiore e de rimpetto 'o mare, sulo 'o mare!!! Chist'è 'o paese d''o sole,

......................................... III Tutto, tutto è destino... Comme putevo fá furtuna a ll'estero s'io voglio campá ccá? Mettite 'nfrisco 'o vino!... Tanto ne voglio vévere, ca mm'aggi''a 'mbriacá... Dint'a sti qquatto mure io stó' cuntento: mamma mme sta vicino e nénna canta: Chist'è 'o paese d''o sole, ......................................... GRATIS DA www.musicaineuropa.it oppure www.accazeta.it 'O sole mio Capurro - Di Capua Che bella cosa na jurnata 'e sole!... N'aria serena doppo a na tempesta... Pe' ll'aria fresca pare giá na festa... Che bella cosa na jurnata 'e sole!... Ma n'atu sole cchiù bello, oje né', 'o sole mio, sta 'nfronte a te... 'O sole, 'o sole mio, sta 'nfronte a te... sta 'nfronte a te! II Lùceno 'e llastre d''a fenesta toja; na lavannara canta e se ne vanta... e pe' tramente torce, spanne e canta, lùceno 'e llastre d''a fenesta toja... Ma n'atu sole .....................

III Quanno fa notte e 'o sole se ne scenne, mme vène quase na malincunia... sott''a fenesta toja restarría, quanno fa notte e 'o sole se ne scenne... Ma n'atu sole ...................... 'O surdato nnammurato Califano - Cannio Staje luntana da stu core, a te volo cu 'o penziero: niente voglio e niente spero ca tenerte sempe a fianco a me! Si' sicura 'e chist'ammore comm'i' só' sicuro 'e te... Oje vita, oje vita mia... oje core 'e chistu core... si' stata 'o primmo ammore... e 'o primmo e ll'ùrdemo sarraje pe' me! II Quanta notte nun te veco, nun te sento 'int'a sti bbracce, nun te vaso chesta faccia, nun t'astregno forte 'mbraccio a me?!

Ma, scetánnome 'a sti suonne, mme faje chiagnere pe' te... Oje vita.... III Scrive sempe e sta' cuntenta: io nun penzo che a te sola... Nu penziero mme cunzola, ca tu pienze sulamente a me... 'A cchiù bella 'e tutt''e bbelle, nun è maje cchiù bella 'e te! Oje vita.... Piscatore 'e Pusilleco Murolo-Tagliaferri Piscatore 'e stu mare 'e Pusilleco ch'ogne notte mme siente 'e cantá, piscató', sti pparole só' lacrene pe' Maria ca luntana mme sta!... Dorme 'o mare...Voca, voca... Tutt'è pace attuorno a me... Ma pecché, ma pecché mm'hê lassato, mentr'io moro, stanotte, pe' te!? II

Casarella d''o Capo 'e Pusilleco, spónta 'a luna e te vène a vasá... Quanta notte aggio perzo guardánnote, quanta juorne aggio visto schiará!... Dorme 'o mare...Voca, voca... ................................................ III Zitto oje core, ca 'nterra Pusilleco, veco n'ombra ca segno mme fa... Na manélla e na voce mme chiámmano: fra sti bbracce Maria vò' turná... Dorme 'o mare...Oje bella viene!... 'Ncielo 'a luna saglie e va... Vita mia! Vita mia mme vuó' bene? Ca si è suonno nun farme scetá... ........... Dorme 'o mare...Voca, vo'...

GRATIS DA www.musicaineuropa.it oppure www.accazeta.it Reginella (Bovio, Lama) Te si fatta na vesta scullata, nu cappiello cu 'e nastre e cu 'e rrose... stive 'mmiez'a tre o quatto sciantose e parlave francese...è accussí? Fuje ll'autriere ca t'aggio 'ncuntrata fuje ll'autriere a Tuleto, 'gnorsí... T'aggio vuluto bene a te! Tu mm'hê vuluto bene a me!

Mo nun ce amammo cchiù, ma ê vvote tu, distrattamente, pienze a me!... Reginè, quanno stive cu mico, nun magnave ca pane e cerase... Nuje campávamo 'e vase, e che vase! Tu cantave e chiagnive pe' me! E 'o cardillo cantava cu tico: "Reginella 'o vò bene a stu rre!" T'aggio vuluto bene a te! ......................... Oje cardillo, a chi aspiette stasera? nun 'o vvide? aggio aperta 'a cajóla! Reginella è vulata? e tu vola! vola e canta...nun chiagnere ccá: T'hê 'a truvá na padrona sincera ch'è cchiù degna 'e sentirte 'e cantá... T'aggio vuluto bene a te! ........................ Santa Lucia luntana E. A. Mario Partono 'e bastimente pe' terre assaje luntane... Cántano a buordo: só' Napulitane! Cantano pe' tramente 'o golfo giá scumpare,

e 'a luna, 'a miez'ô mare, nu poco 'e Napule lle fa vedé... Santa Lucia! Luntano 'a te, quanta malincunia! Se gira 'o munno sano, se va a cercá furtuna... ma, quanno sponta 'a luna, luntano 'a Napule nun se pò stá! II E sònano...Ma 'e mmane trèmmano 'ncopp''e ccorde... Quanta ricorde, ahimmé, quanta ricorde... E 'o core nun 'o sane nemmeno cu 'e ccanzone: Sentenno voce e suone, se mette a chiagnere ca vò' turná... Santa Lucia, ............ III Santa Lucia, tu tiene sulo nu poco 'e mare... ma, cchiù luntana staje, cchiù bella pare... E' 'o canto d''e Ssirene ca tesse ancora 'e rrezze! Core nun vò' ricchezze: si è nato a Napule, ce vò' murí! Santa Lucia, ............ Scalinatella Bonagura - Cioffi Scalinatèlla, longa

longa longa longa Strettulélla strettulélla, addó' sta chella 'nnammuratèlla? Nun spónta ancora... zuc zuc zuc zuc: zucculillo zucculillo, pe' 'sta viarèlla scarrupatèlla! Addó' mme ne vogl'í, t''o ddico...e crídeme... addó' se ne pò ghí chi è stanco 'e chiágnere?! Scalinatèlla saglie 'ncielo o scinne a mare cercammélla trovammélla, pòrtame a chella sciaguratèlla! Chella s'è 'nnammurata 'e nu pittore ca pitta Capre e parla furastiero... e i' porto 'mpiétto nu dulore 'e core e sento che mm'accide stu penziero! Scalinatèlla longa longa ecc. A ghiuorne a ghiuorne parte nu vapore... A ghiuorne 'ammore mio se vótta a mare! Scètate (1887)

versi di FERDINANDO RUSSO musica di MARIO COSTA Si duorme o si nun duorme bella mia, siente pe' nu mumento chesta voce... Chi te vò' bene assaje sta 'mmiez'â via pe' te cantá na canzuncella doce... Ma staje durmenno, nun te si' scetata, sti ffenestelle nun se vonno aprí... è nu ricamo 'sta mandulinata... scétate bella mia, nun cchiù durmí! II 'Ncielo se só' arrucchiate ciento stelle, tutte pe' stá a sentí chesta canzone... Aggio 'ntiso 'e parlá li ttre cchiù belle, dicevano: Nce tène passione... E' passione ca nun passa maje... passa lu munno, essa nun passarrá!... Tu, certo, a chesto nun ce penzarraje... ma tu nasciste pe' mm'affatturá... Ti piace la musica classica napoletana?? Segui il link per acquistare CD o cassette. Puoi effettuare l'acquisto tramite "server sicuro" Fai click qui Ti piace la musica classica napoletana?? Segui il link per acquistare CD o cassette. Puoi effettuare l'acquisto tramite "server sicuro" Fai click qui

Silenzio cantatore Bovio - Lama Zitta, stanotte nun dicere niente: cádeme 'mbraccia, ma senza parlá... Dòrmono 'e ccose nu suonno lucente, nu suonno 'e na notte d'está. Marí', dint''o silenzio, - silenzio cantatore - nun te dico parole d'ammore, ma t''e ddice stu mare pe' me!... II Dimme: stanotte si' tutta d''a mia? Ll'uocchie tuoje belle mme diceno 'e sí... No, cu 'sta luna, nisciuna bucía sta vócca buciarda pò ddí!... Marí', ..............

Simmo 'e Napule paisa' Fiorelli - Valente

Tarantella, facennoce 'e cunte, nun vale cchiù a niente 'o ppassato a penzá... Quanno nun ce stanno 'e tramme, na carrozza è sempe pronta n'ata a ll'angolo sta giá: Caccia oje nénna 'o crespo giallo, miette 'a vesta cchiù carella, (...cu na rosa 'int''e capille, saje che 'mmidia 'ncuoll' a me...) Tarantella, facènnoce 'e cunte, nun vale cchiù a niente "'o ppeccomme e 'o ppecché..." Basta ca ce sta 'o sole, ca c'è rimasto 'o mare, na nénna a core a core, na canzone pe' cantá... Chi ha avuto, ha avuto, ha avuto... chi ha dato, ha dato, ha dato... scurdámmoce 'o ppassato, simmo 'e Napule paisá!... Tarantella, stu munno è na rota: chi saglie 'a sagliuta, chi sta pe' cadé! Dice buono 'o mutto antico: Ccá se scontano 'e peccate... ogge a te...dimane a me! Io, nu poco fatto a vino, penzo ô mmale e penzo ô bbene... ma 'sta vocca curallina cerca 'a mia pe' s''a vasá! Tarantella, si 'o munno è na rota, pigliammo 'o minuto che sta pe' passá... Basta ca ce sta 'o sole, …………..

Tarantella, 'o cucchiere è n'amico: Nun 'ngarra cchiù 'o vico addó mm'ha da purtá... Mo redenno e mo cantanno, s'è scurdato 'o coprifuoco, vò' surtanto cammená... Quanno sta a Santa Lucia, "Signurí', - nce dice a nuje - ccá nce steva 'a casa mia, só' rimasto surtant'i'..." E chiagnenno, chiagnenno, s'avvía... ...ma po', 'a nustalgía, fa priesto a ferní... Basta ca ce sta 'o sole, ........................

GRATIS DA www.musicaineuropa.it oppure www.accazeta.it

Surriento d''e 'nnammurate Bonagura - Benedetto Loggia 'e Surriento... tu, 'nnanz'ô specchio 'e stu mare, na gran signora ca se 'ntulètta mme pare. Aria 'e Surriento, saglie da 'e vville addurose! Ca vònno, 'e spose, 'e sciure 'arancio addurá... Surriento, Surriento, Surriento d''e 'nnammurate... Te saccio p''e bbracce abbracciate cu 'a felicitá... Te sanno 'e nnuttate d'argiento d''e sserenate, Surriento d''e vvócche vasate, d''e mmane astrignute, pe' ll'eternitá... II Cielo 'e Surriento, purtaje, pe' te, chesta seta, nu brigantino, ca jéva 'a ll'India a Gaeta... Mare 'e Surriento, addó' truvaje stu culore, chillu pittore ca te venette a pittá?... Surriento, Surriento, Surriento ............................... Finale: Te sanno 'e nnuttate d'argiento d''e sserenate... Surriento, Surriento, Surriento d''e 'nnammurate....

Tammurriata nera Nicolardi - E. A. Mario Io nun capisco, ê vvote, che succede... e chello ca se vede, nun se crede! nun se crede! E' nato nu criaturo niro, niro... e 'a mamma 'o chiamma Giro, sissignore, 'o chiamma Giro... Séh! gira e vota, séh... Séh! vota e gira, séh... Ca tu 'o chiamme Ciccio o 'Ntuono, ca tu 'o chiamme Peppe o Giro, chillo, o fatto, è niro, niro, niro, niro comm'a che!... 'O contano 'e ccummare chist'affare: "Sti fatte nun só' rare, se ne contano a migliara! A 'e vvote basta sulo na guardata, e 'a femmena è restata, sott''a botta, 'mpressiunata..." Séh! na guardata, séh... Séh! na 'mpressione, séh... Va' truvanno mo chi è stato ch'ha cugliuto buono 'o tiro: chillo, 'o fatto, è niro, niro, niro, niro comm'a che!... Ha ditto 'o parulano: "Embè parlammo, pecché, si raggiunammo, chistu fatto nce 'o spiegammo! Addó' pastíne 'o ggrano, 'o ggrano cresce... riesce o nun riesce, sempe è grano chello ch'esce!" Mé', dillo a mamma, mé'...

Mé', dillo pure a me... Ca tu 'o chiamme Ciccio o 'Ntuono, ca tu 'o chiamme Peppe o Giro, chillo...'o ninno, è niro, niro, niro, niro comm'a che!... Torna a Surriento E. De Curtis - G. B. De Curtis Vide 'o mare quant'è bello! spira tanta sentimento... Comme tu, a chi tiene mente, ca, scetato, 'o faje sunná! Guarda guá' chisti ciardine, siente sié' sti sciure 'arancio... nu prufumo accussí fino, dint''o core se ne va... E tu dice: "Io parto, addio!" T'alluntane da stu core... Da la terra de ll'ammore, tiene 'o core 'e nun turná?! Ma nun mme lassá, nun darme stu turmiento... Torna a Surriento: famme campá!... II Vide 'o mare de Surriento che tesore tene 'nfunno: Chi ha girato tutt''o munno, nun ll'ha visto comm'a ccá! Guarda, attuorno, sti Ssirene ca te guardano 'ncantate e te vònno tantu bene: Te vulessero vasá!... E tu dice: "Io parto, addio!" .............................

Tu ca nun chiagne (Bovio, De Curtis) Comm'è bella 'a muntagna stanotte... bella accussí, nun ll'aggio vista maje! N'ánema pare, rassignata e stanca, sott''a cuperta 'e chesta luna janca... Tu ca nun chiagne e chiágnere mme faje, tu, stanotte, addó staje? Voglio a te! Voglio a te! Chist'uocchie te vonno, n'ata vota, vedé! Comm'è calma 'a muntagna stanotte... cchiù calma 'e mo, nun ll'aggio vista maje! E tutto dorme, tutto dorme o more, e i' sulo veglio, pecché veglia Ammore... Tu ca nun chiagne e chiágnere mme faje, tu, stanotte, addó staje? Voglio a te! Voglio a te! Chist'uocchie te vonno, n'ata vota, vedé!..